《前度超渡師》: 第十一集-裙腳仔男友（二）
聽完OL嘅故事之後，我倒抽一口涼氣，我真係估唔到點解去到二十幾歲嘅男人面對啲感情問題都要搵自己老母幫手。凡事都靠老母，喺香港通常被稱為「裙腳仔」，你話係唔係「港孩」呢？咁我就有保留喇！話晒都廿幾歲人，應該叫「港佬」啦！
-
面對呢個「港佬」，我真係束手無策，當面數臭佢又驚傷害佢弱小嘅心靈，婉轉啲同佢講又驚佢get唔到，同佢阿媽講仲更加嘥氣，擺到明偏幫港佬㗎喇！真係諗唔到有咩方法令到港佬唔再煩住OL。
-
其實解決問題就係要港佬釐清返佢哋已經分手嘅事實，唔好再煩住OL，亦都要令OL唔再用所謂「朋友」嘅身份再聯絡，以免港佬諗多咗，以為佢同OL仲有機會發展。當然兩位接唔接受到又係另一個問題啦！
-
至於點樣可以要港佬重新知道個事實，更加要另佢阿媽清楚分手呢個問題唔係出自OL身上，而係佢個仔嘅問題，搞清楚返OL唔係拜金女，唔係八婆，係一個真心愛另一半嘅好女仔，只不過係唔想再受伯母嘅胡言蜚語。
-
即使OL以後唔會再接觸佢哋一家人，但我深信，OL都想佢哋嗰一家人可以改善自己嘅陋習，令到港佬搵個好女朋友，伯母就準備迎接好新抱。
-
所以今次嘅超渡，唔需要搵任何臨時演員、唔需要朋友嘅客串，只需要佢哋幾位上到嚟「前度超渡株式會社」，等大家有個平台可以講出大家嘅問題，到下次戀愛嘅就可以做得更好。
-
喺呢段戀愛入面，好多人都會覺得分手呢個責任係要港佬孭晒，而OL係冇錯。但請大家細心諗深一層，OL點解分手之後仲要繼續做住朋友呢？究竟係自己未放低港佬，俾機會港佬再追定點？我覺得分手之後唔應該咁快做朋友，等大家有啲時間沉澱冷靜下，做返朋友就之後再決定。
-
我將呢個計劃完完整整咁同OL講，佢好滿意我嘅計劃，反正打鐵趁熱，早啲搞掂，早啲脫離苦海。我哋即日都已經約實時間同港佬同佢老母上嚟「前度超渡株式會社」見面。始終唔想OL繼續受港佬分手之後嘅騷擾。傾好啲細節之後，OL因為有事而要離場，我亦都開始構思點樣進行會面嘅流程。
-
由於OL講得太詳盡嘅關係，由日頭講到夜晚，我亦都落街食個晚飯，食完返嚟先再度橋。
-
「靚女，要個豆腐火腩飯、飲熱奶茶。」落到樓下嘅茶記，嗌返個男人嘅浪漫，加返杯養精蓄銳嘅奶茶，簡直係一個完美嘅配搭。
-
飲飽食醉，行返上「前度超渡株式會社」嘅同時，理所當然有唔少風流場所嘅人兜售我，問我要唔要「出火」啦！咁我都一一拒絕，話晒我對阿姨冇興趣，而且我都一直諗緊OL嘅問題，話呢個選址係咪一個好地方識合超渡前度？
-
因為十個有九個男士上嚟都會俾人問需唔需要呢啲「服務」，上嚟又尷尬，落返地面又尷尬，好似要完呢啲「服務」之後咁樣，對男客人又唔好，而女客人又會俾隔離啲「鹹濕佬」問係咪喺到做，完全唔尊重女性。
-
我揀呢度作為地址嘅時候一早已經諗到呢個問題，但好老實，我真係冇多餘嘅錢去搵另外嘅選址，因為香港嘅租金真係太貴，客人又想交通方便、可達度高嘅地方，咁旺角呢度就梗係好啦！但商業中心啲租金唔係我呢啲小生意可以做到，唯有決定一啲舊樓，但舊樓嘅治安問題真係好嚴重，嚴重影響客人上嚟嘅意欲，所謂「魚與熊掌不可兼得」，所以從經濟成本嚟睇就揀咗呢度喇！
-
好彩嘅係，我設計裝修嘅時候，將呢度改造成好舒服嘅地方，柔和嘅燈光配淺淡色嘅牆身，加上多重隔音，阻隔隔離鄰舍進行「運動」時嘅噪音。我諗都應該可以令到上嚟嘅人暫時忘記隔離左右係一啲風流場所嘅地方啩。
-
你問我想唔想轉地方，我真係、真係好想轉，可惜貧窮真係限制咗我嘅想像囉！有錢嘅話，我都想搬去甲級寫字樓到做啦！
-
算！放負嘅說話呻完，係時候埋單返上去繼續做嘢，就算我好唔鍾意呢度，但自己有時都幾自豪喺度做嘅，明明隔離係啲風流場所，但我一次都冇需要用呢啲服務，證明我係一個好男人囉！夠專一同定性啊！
-
返到上去，見到腎仔已經睇緊我啱先同OL傾偈而寫低嘅筆記。腎仔睇完之後都話呢個男仔一啲都唔掂，冇理由咁大個仔仲要阿媽幫手，唔通第時「造人」嘅時候都要阿媽在場打氣加指導咩！
-
但呢個個案都有少少棘手，因為事主唔再係未成熟嘅學生，而係一個出咗嚟做嘢已經有一段時間嘅打工仔，話就話係裙腳仔，但自己都會有自己嘅思想、自己嘅價值觀，聽唔聽我哋嘅勸告都係一大難題。不過點都好，受咗當事人嘅委託就要盡全力去做。
-
雖然我、腎仔同港佬嘅年齡都係差唔多，傾談嘅時候都應該方便啲，可惜嘅係，佢呢種性格係唔會聽同年齡層嘅人講嘅嘢，佢唯一聽嘅就係地位高過佢嘅人，即係老母同埋上司。搵佢阿媽傾簡直係嘥氣，因為阿媽一定偏幫同盲目相信阿仔，所以可以幫到我哋手嘅，就係佢嘅上司。
-
但係作為一個上司點樣喺百忙之中抽空出嚟幫手進行超渡？況且咁大個人都會尷尬啦，返工又要對住，同埋上司有機會周圍唱港佬啲衰嘢，唔通仲係小朋友咁天真無邪咩？
-
所以點會搵上司啊！我都要留返港佬嘅面子㗎嘛，你知男人對自己嘅自尊心睇得幾重㗎啦！越少人知越好，費事要港佬難做。
-
我最後同腎仔決定，直接叫港佬上嚟傾，同佢講道理就有啲難，但我相信我可以憑自己嘅技巧感化到佢嘅。
-
（待續 To be continued）
IG：chingchingstory