《前度超渡師》: 第十集-裙腳仔男友（一）
搞掂咗星瓊同衍皓嘅超渡之後，星瓊同女朋友就坐咗喺「前度超渡株式會社」到傾偈，好彩呢度淨係得兩個女人，如果多一個就變咗個墟，正所謂「三個女人一個墟」，但佢哋兩個講八卦嘅嘢程度絕對唔俾三個女人輸蝕，都係嘈到拆天嘅。
-
見佢哋傾得咁開心，我同腎仔都加入埋佢哋嘅對話，睇嚟我都幾有做女人嘅特質，都係咁鍾意講人是非。佢哋就分享下現今中學生拍拖嘅搞笑嘢，而我同腎仔就講下做前度超渡師嘅八卦嘢，話晒我都唔再係學生咁多年，連而家啲後生仔鍾意啲咩都唔太知，趁著呢個機會追貼返個潮流。雖然守則寫到明身為前度超渡師要保密客人嘅私隱，但唔通收咗工之後仲要跟「工作守則」咩，我睬你都傻啦！
-
最後我同星瓊、女朋友做咗朋友，互相交換咗Instagram。過咗一段時間之後，我從佢哋嘅post得知，佢哋兩個成為咗彼此嘅好姊妹，佢哋周不時一齊行街、食飯、睇戲。睇見佢哋嘅動態，我就喺度諗：明明佢哋之前係素未謀面，但而家係出身入死，糖黐豆嘅好姊妹，雖然我唔知佢哋平時傾咩，但我有啲好奇，究竟啲話題係咪都圍繞住衍皓呢？如果突然講咗同衍皓嘅回憶，對方又會唔會尷尬又或者妒忌呢？我真係好八卦啊！
-
喺工作時間，我係一個好熱衷於工作嘅人，同時亦都係大家認知嘅「前度超渡師」，要有返身為前度超渡師嘅準則，堅守自己嘅操守，但當收咗工之後，就係一個正常普通市民，再冇身份上嘅隔閡，所以成為當事人嘅朋友係冇問題㗎！
------
［總要在雨天，逃避某段從前，但雨點偏偏促使這樣與見。］
-
大地回春，每日個天都要落一場大雨先至肯收手，面對潮濕嘅天氣，個人就好眼瞓，基本上一無聊，坐喺到都可以瞓得著。
-
「嘩！出面好大雨呀，搞到我濕晒喇！」突然有個OL上班族嚟咗。
-
「唔緊要，慢慢嚟。歡迎光臨『前度超渡株式會社』，我係你嘅前度超渡師，請問你係咪有前度問題困擾需要由我去幫你超渡呢？」見佢狼狽嘅表情，睇嚟出面都應該幾大雨下。趁著我講返句經典例牌開場白之後，呢位OL亦都整頓好自己。
-
「啊！你間鋪頭真係好趣緻，點解會揀係風流場所隔離嘅？」話說『前度超渡株式會社』隔離正正就係一樓一。應該係話，呢幢大廈除咗我呢個舖位之外，其他都係色情場所，但點解會揀呢度，咪因為平租囉。
-
「係窮吖！同埋喺邊度都唔重要，呢度夠隔音就得啦！講返你先，你想超渡你嘅前度？」我都不妨老實咁同佢講，我冇錢啊嘛！
-
「我想超渡我並唔係我嘅前度，而係前度個阿媽，你係咪可以幫我㗎？」咦！我冇聽錯呀嘛？阿媽？
-
「Sorry，前度嘅邊個話？」為以防我又好似啱先咁樣懵下懵下，我決定問多次，聽清楚係咪真係前度個娘親。
-
「阿媽」OL斬釘切鐵咁講。
-
「你可以分享下點解你要超渡佢阿媽。」我伸出我隻手，示意OL可以講佢嘅故事。
------
（OL視覺）
-
我之前嘅男朋友係一位好臭脾氣嘅男仔，成日因為少少事而發我脾氣，最後因為我頂唔住佢啲脾氣就提出分手，而佢就覺得係我派綠帽俾佢戴。但事實上係我同佢分咗手之後都冇再拍拖。同佢講咗分手之後，佢就成為咗我嘅恐怖前度，成日搵我訴苦，話佢自己有抑鬱，好想去死。佢仲威脅我，如果我再唔同佢傾偈就去死。佢分咗手之後仲要我做佢朋友、做佢嘅樹窿、做佢嘅靈魂伴侶，當然我都冇理佢，開頭我係已讀不回佢，佢就不斷洗我版，去到之後，我真係再次頂佢唔順就Block佢所有contant。
-
我仲以為我Block咗佢之後就可以好輕鬆，放低一切煩惱，點知先係惡夢嘅開始。到佢阿媽煩住我，係吖，係佢阿媽啊！都二十幾歲人啦，仲要阿媽幫手。佢阿媽先係極品中嘅極品，明明係我哋兩個嘅感情事，關佢阿媽Q事咩。
-
佢阿媽WhatsApp我，問點解要搞到個仔唔開心。當我睇到之後，我呆咗，完全唔知點俾反應，跟住我就覆：「你知唔知道你個仔嘅脾氣係點㗎？」
-
高處未算高，佢阿媽就開始發射呢個連環機關槍，佢話我作為女朋友應該要接納佢個仔啲脾氣，應該要全心全意咁聽佢話，唔需要有自己嘅主見。
-
大佬，而家咩年代吖，男女平等、自由戀愛㗎嘛，乜而家仲興嗰啲盲婚啞嫁，仲要聽晒佢個仔話，咪搞我啦！
-
然之後就話我係賤女人、八婆，用啲好侮辱性嘅詞語鬧我，我一聽到呢啲說話真係好委屈，明明係佢個仔唔啱在先，我先同佢分手，佢阿媽竟然咁話我。我喺度諗，如果第時同佢結婚，未來咪要聽晒呢啲說話幾十年，我真係唔敢想像。好慶幸我盡早離場，免受言語中傷之苦。
-
聽到呢啲說話固然傷心，但之後呢句先最激㷫我，之前嗰啲都可以啞忍，當我聽到呢句之後，我爆咗出嚟，我再頂唔順佢哋兩個。
-
佢阿媽話我係拜金女，為咗錢先同佢個仔一齊。好老實嗰句，之前同佢出街食飯都係一人俾一次錢，唔係餐餐要佢俾晒，就連佢生日，我都送咗隻名貴手錶俾佢，但我自己生日呢，一次都冇收過佢送嘅禮物。如果咁都叫拜金，我真係好嬲囉！
-
我以為咁樣和平分手之後，大家應該仲可以繼續做朋友，因為我都仲好愛佢，將來睇情況再一齊返。點知佢對我越嚟越過份，特登接我收工，又瘋狂打俾我，我真係唔想再對住佢，佢好煩吖！
-
（OL視覺完）
-
（待續 To be continued）
IG：chingchingstory