一篇潮文改變一生: 第十三章
時光流逝，由我剛開始係網上賣褲至今已過左大約三個幾星期，今日我又去到銀鈴擺檔之處，佢一如以往早早就已經SET好個檔。
其實我一直都很好奇？銀鈴佢賺埋都唔少啦！做咩仲要咁辛苦呢？
「HELLO！」
銀鈴經常都見到我，但係每次見我都係笑得咁開心：「龍大哥！」
我蹲下拿起其中一幅畫望下，個衰女包真係越來越勁，好似進步無止境咁……
「銀鈴呀！多口問下妳丫！今個月妳替我畫左咁多褲，仲唔夠錢洗咩？做咩仲要日日都擺檔咁辛苦呀？」
佢笑一笑，笑聲清澈，不愧係銀鈴：「唔係呀！不過呢！係度擺檔其實好好架！畫多D人像對基本功好有幫助，而且同多D唔同既人畫畫，聽佢地講下D人生經驗，其實都好有用處架！」
好！做人唔忘本！銀鈴果然係一個不可多得既好女仔，我都果然無睇錯人！
我拿出五千蚊，交比佢，厚厚一疊一百蚊紙，嚇左佢一大跳！
「嘩！咁多？我…我畫唔切呀！」銀鈴一臉無奈。
「唔洗擔心，哩D花紅來既，袋起佢，畫褲錢下次先再同你另計！」
佢隻眼碌到跌出來咁滯：「吓？唔得！做咩比咁多錢我？無功不受祿，我唔可以無啦啦收你D錢！」
我笑左笑：「傻架妳？無咩功呀？妳日日同我畫褲唔係做野咩？」
佢都係耍手擰頭：「我咪收左你D畫畫錢law，你次次都比足我架啦！」
個傻妹都係唔肯收，雖然我份人係仆街，但係我至尊重哩D有一門手藝既人，而且我深明佢哩門手藝係幾咁有價值，點可能只值每條三十蚊丫！加上我好清楚人材先係最重要既財產，所以我夾硬都要塞比佢。
「我話妳值妳就值，我從來唔做蝕本生意既！妳呀！有錢去租過間好D既房住啦！仲有一陣好即刻去出返個電話，而家搵妳幾鬼唔方便呀！」
佢雙手捧住個幾千銀，仍是一臉難以置信！
「袋好D錢啦！」我再次強而有力地拍一拍佢膊頭，轉身離去。
暫時又計算下而家既資產總值：現金9642蚊人仔、兩包雲煙、一張賭枱，再加一門網上生意！
仲有一件小插曲差D唔記得同大家講，係關於銀鈴的夢想！
無耐之前，我終於上過去銀鈴屋企，原來佢父母雙亡，身世都幾可憐，佢只係租左一間細細既房間居住，個次我無咩做，諗住了解下哩個o靚妹仔多D，就係佢收檔時主動請纓替佢執D野返去，順手八掛……應該係了解搵食伙伴的背景。
上到去，發現間房細都不突止，仲要好鬼混亂，一D都唔似女仔房……
我好難咁先搵到張椅坐下，四周觀察，發現佢全屋除左幾件傢俱，同埋少量日用品之外，就只有畫、畫具、畫、畫具、畫同埋畫具！
我好正路咁問：「銀鈴，妳第時係咪想做畫家呀？」
我本來幻想佢九成都係想儲錢去法國學畫，夢想係完成心目中一幅點點點意境既畫，或者係將童年時見過某某消失左的風景重現世上之類，點知答案卻出乎意料……
「我想做漫畫家！」
吓？漫畫家？係強國做漫畫家？有得諗咩？
只見佢開始圍繞她的夢想，開始滔滔不絕起來，見佢眼神中充滿神彩，仿似想帶我領悟一個精彩的世界！
「我哩度有個作品呀！比你睇下丫！」
佢好似細路仔同人分享心愛玩具咁樣，將手上一本釘裝粗糙既自家製漫畫遞比我！
睇睇個封面…咦！正喎！原來主角咪係第一次見佢擺檔時個女巫GIGI同女刺客？即刻揭開望望先！
咩話？男主角係一個貌不驚人既骸骨戰士……有無搞錯呀？咁既設定一D都唔吸引喎！妳個銀鈴丫！識唔識作故仔架？主角應該係個好似我咁有型有款既性鬥士先得架嘛！
不過銀鈴D畫功真係靚，所以都係吸引左我睇落去……
故事係圍繞個骸骨戰士同兩位美人係一個奇異世界內的各種經歷，嗯嗯，睇睇下又幾好睇喎，去左另一個時空，跟住點呢？追埋先……
………………
…………
……
...
「嗚呀！跟住到底點呀？骨仔有無死到呀？有無下集快D拎埋出來！」
銀鈴笑笑：「唔…唔好咁激動先…」
我激動到捉住銀鈴條頸係咁搖：「骨仔唔好有事呀！你有事咁GIGI點算呀？仲有女刺客呢？女刺客應承過比骨仔中出架！妳唔好以為我唔記得呀！我唔理妳FF又好，猴子偷圖又好，妳快D出埋個後續比我J呀！」
「冷…冷靜D……」
「妳叫我點冷靜呀？嗚呀！我唔捨得骨仔呀！唔好比佢有事呀！」
「骨仔有無事我唔知，再…再係咁比你搖法…應該就我會死先…」
終於，原來都係未有續集，我本來想迫個衰女包快快手畫比我，但係佢緊持話係未有百分百信心能超越哩集之前，都唔會畫住，要好好地磨練一下……
頂！有無搞錯？咁吊人癮，你地話丫！邊有人好似佢咁衰架！
今日收到個電話，係細鬼打比我，原來不知不覺，已經到左月頭，可以去收數啦！
你話呢個世界有咩好得過，唔洗做又無啦啦有糧出？所以我帶住無比愉快既心事，返去漢陽路個地下賭場。
入到去，第一時間就入左辦工室，細鬼已準備好一切等我。
「龍哥！」
我笑一笑：「哥前哥後三分險，唔洗哥哥聲咁叫啦！」
「好呀！龍少！」
真係死仔包！是鬼旦理得佢點叫，最重要係收錢，佢拿出一袋銀紙，成袋放係枱面叫我點算。
我打開個袋一看，一紮紮花哩花綠既銀紙，看得人腎上線素急升！
「細…細鬼，哩度有幾多錢呀？」
佢交本數簿比我：「我點過，總共廿一萬六千，龍少你CHECK CHECK！」
我拿起其中一疊，用手指掃左掃，大約一疊有五十張！
我都懶得再點算，求其放返入袋，問左細鬼一個問題：「我地個場有幾多個手足架？」
「連荷官、睇場、會計，我地個場有廿五個人做野。」
「OK，你同我通知所有手足，今晚我請大家去食飯！」
「多謝龍哥！」
等齊D手足，我就同佢地去左間大海鮮酒家開餐，今次當然就唔會簡D會食痾人既鋪頭啦！
我叫到成枱都係餸，同手足們杯上杯落。席間，我發現細鬼真係一個話頭醒尾既o靚仔，至難得係，我留意到佢係言談間，好多時都不經意咁流露出佢對喪威係真心尊敬，雖然佢都算係一個仆街仔，但係不失為一個討人歡喜既仆街仔！
其實哩個飯局，除左想慰勞下D手足之外，我仲想索下料，想知多D喪威的勢力到咩地步，雖然我哩個月來都見過喪威幾次，但係每次都係出來飯聚吹水，無咩真正了解到佢……
同大家車天車地左一晚，佢地當然都有誇大吹水成份，但係經我分析之後，喪威果然係一個猛人，係廣州除左另一號人物可以叫做同佢平分秋色之外，都可以話係惡曬！
果然是一個大靠山！