<<我有嘅超能力竟然係⋯>>: 第一章 : 冰冷與痛楚

第一章 : 冰冷與痛楚

我呢一刻係大部分人所謂嘅隱世「催睡師」
亦都係不同男女嘅「聆聽者」
一切都由上一年嘅一月講起～～

又開始好煩悶嘅一日~

我係長翻通宵更嘅保安員。每一日翻工都無乜特別工作，係人哋眼中嘅廢青。





而我自己唔會睇小自己嘅工作，因為由我轉行果刻，我嘅知識比起之前增長咗唔少，起碼係人同人之間嘅溝通都唔會好似之前咁「毒」。

「喂!啊Dee，你今日又咁早翻嚟啊？你咁後生，又翻呢行仲要長期通宵，不如搵過份啦」雪姐語重心長咁對住我講。
「係啊！是但啦 ，生活艱難啊，咩都做住先啦」我其實唔太想理佢。
雪姐係啱啱結咗婚嘅女人，年齡唔太大，俾我嘅感覺就好似家姐咁，每件事都會以別人為先，一啲都唔自私。

我拎住個外賣上去休息室食，但呢幾日好奇怪，每日都好無食慾，亦都訓得唔太好。個人好攰同埋有啲好奇怪嘅感覺，當我迫自己訓覺嘅時候，隻右手會越嚟越震同埋會有少少痛楚

我食完個外賣就開始左我嘅工作，做晒例行公事之後就坐定定睇劇等收工。
「Dee，今晚睇乜好啊！我好難得先會同到你翻夜㗎」一位叫啊勤嘅同事問我。




「都係果味㗎啦，驅魔囉，呢幾年嘅劇都幾正啊。」我勁快就答咗佢。

點解我咁中意睇呢類劇？因為呢類劇可以睇得岀人類有幾咁容易俾邪念或者係黑暗面所侵占。就好似好耐之前大家會諗人類一岀世係善定惡，而我遇到過嘅或者接觸過嘅都係後者較多。

啊，係喎！唔記得介紹下呢位啊勤同事，高大同大隻。佢大我一年，有個拍咗拖兩年嘅女朋友，之前係做倉務員。之後因為搬咗岀嚟住要搵份高人工少少嘅工作，就嚟咗呢度做，係同我最似兄弟嘅存在，連放假都會一齊打機去街。

「啊勤啊，我呢排隻手好奇怪，有陣時會震得好犀利，又會痛咁，呢個情況通常都係我訓唔到要迫自己訓先會岀現」我望住自己隻手。
「我都成日訓唔到啊，你講到咁奇怪咁嘅？你唔好同我講你有起能力啊。咁大個人仲FF咁離地嘅野，哈哈哈哈！」啊勤滿面恥笑嘅樣對住我。

「係啊係啊！我有啊，你話你訓唔到啊嘛！我宜家就幫你實現訓覺嘅願望啊！」我講笑咁將隻手擺左係啊勤額頭上面。





奇怪嘅事情就係呢一刻發生左，「喝～呼～喝～呼」啊勤竟然打鼻鼾。「你唔好玩野好喎，死野！」我細細力拍下佢塊面。就係呢一秒入面有伴隨住痛楚同強烈嘅冰凍感覺滲入我嘅右手，我個腦係呢幾秒入面空白咗。