<<我有嘅超能力竟然係⋯>>: 第二章 畫面

空白嘅幾秒入面令我體驗到咩叫「走馬燈」，
我諗呢個就係類似人類感受到快將死亡前幾秒，大腦入面嘅潛意識岀現翻係眼前，俾我地回想有咩係開心同後悔。

奇怪嘅係入面嘅回憶好似唔係我嘅，呢幾秒我見到好矇矓嘅視覺。

有好多枝玫瑰花係地上面，同埋有一對男女。見到男仔著住套老西，周圍嘅聲只有車同路人嘅手機拍照聲。

呢個畫面好陌生，點解會咁嘅呢？呢個畫面又係屬於邊個㗎？唔通係啊勤嘅？好多想法係我腦中浮現，呢段時間痛楚都慢慢消退。我望住啊勤訓得咁舒服，又唔係忙，就俾佢休息下。

回想翻啱啱擺隻手係啊勤額頭上面果時嘅感覺，有少少麻痹感係手掌，同武俠小說咁用手吸人內功嘅感覺，之後啊勤就訓著，再有痛覺同走馬燈。





唔通我真係有超能力？唉，唔好諗咁多啦年輕人。

今晚嘅時間過得好快，我睇住youtube嘅直播就到左日岀嘅時間，而啊勤仲訓咗成晚，我叫醒佢同佢講「收工啦，仲訓，得你休息我唔駛休息啦下？」

「sorry啦，我都唔知點解會訓成咁，可能太攰」啊勤好唔好意思咁講。

「走啦，今晚再見啦，Bye！」我向住雪姐同啊勤揮一揮手就去搭小巴翻歸。

我今日同前幾日唔太一樣，精神異常地攰同好肚餓，所以食個早餐先翻去訓。





「沙爹牛肉通粉配腸仔煎蛋，多士，飲凍檸茶走甜啊唔該」我同個侍應啊姨講。

「各位早晨，今日由我為大家報導新聞...今早清晨時分係黃大仙下邨有一名男子從高樓墜下，警方正調查事件原因，初步估計係自殺案件⋯⋯」我望一眼個電視。

「哇！又跳樓，咁大壓力啊。跌落去咁鬼痛都敢跳，唉，俾我燒炭算鬼數啦！」有個啊叔自言自語講。

點解宜家個社會嘅人會講呢幾句說話，唔係可惜無咗一條生命同要珍惜自己嘅生命，而係代入自己要選擇自殺嘅時候會用較為輕鬆嘅方式。

野食終於到啦，我落咗大量胡椒粉落個通粉，大大加強咗沙爹同牛嘅味道，再用叉拮一下隻太陽蛋，用蛋黃配著鬆脆嘅多士一啖又一啖，最後用一啖清爽，充滿檸檬又有茶香嘅檸檬茶做結尾。





埋單後行翻上屋企嘅時候，諗梗一樣野，由19年到宜家，好多香港人都係生活係一個黑暗嘅地方。好多不滿，好多憤怒，好多痛心，好多團結嘅一刻充滿住大家。而如果我真係有超能力嘅話，有咩可以幫到手呢？唔好講到咁偉大，可唔可以幫到身邊嘅人呢？

我翻到屋企沖完涼就上咗床訓，而今日嘅我，好快地進入夢鄉～