<<我有嘅超能力竟然係⋯>>: 第九章 回到起點
今次仲要係即時辭職嘅我仲補埋一個月人工即時走⋯聽落好無責任感，但其實公司對失去我完全唔會有任何影響。因為我翻工都只係睇劇打機，對工作數會有咩影響。
聽到我要辭退嘅同事們覺得好突然，每個人都即刻問我發生咗咩事。
但我都一一對佢地講，想好好休息一下，調理下身體狀況。
當然知道真相嘅只有啊勤知道，而我地兩個唔會唔捨得，因為一路都有聯絡大家。
我今次嘅辭職，比起以前咁多次嘅辭職唔同。
今次我唔係因為做得辛苦或者人工低而辭職，
而係為咗善用自己能力同幫助他人而辭職。
呢個就係我「催睡師」嘅起點。
我租咗一個好細嘅工廈單位，買一張按摩椅，再擺一張普通櫈就開始咗我呢個生涯。
起初我只係靠住係社交平台開post招攬客人，但完全無客肯上嚟。
「你咁樣唔太掂，不如我幫吓你啦！我做白老鼠，你就錄底成個過程，擺上網可能就會有啲人睇你係咪玩野㗎啦！」ok妹提議。
「都好啊，不過你有心事咩？有咩搞到你有時會訓唔到？」我好疑惑咁問。
「呢～果件事啊！你睇下就知㗎啦。」ok妹有少少驚。
以我所認識嘅ok妹，只有兩樣野會令佢驚。第一，昆蟲，第二⋯⋯⋯⋯我都唔太想講。
到咗ok妹收工嘅時間，我自然到咗佢公司門口，等佢收工嘅時候順便睇埋有咩可以同佢食，然後就上咗去拍呢段幫我宣傳嘅短片。
「咁開始㗎啦！」我示意。
我將手放去ok妹嘅額頭～準備好就開始睇憶。
今次我係回憶入面重要見到嘅，係周圍都係樹嘅地方，士多同廁所。
畫面翻翻嚟現實，ok妹用心寒嘅眼神望住我，好似已經知道我睇到啲咩，亦都開始講起件事。
「果日係我唔駛翻工嘅星期日⋯」ok妹說到。
一個凍冰冰嘅一日，我約咗一個朋友去行山，但唔係大多數人去嘅山路。
唔知大家住嘅地方後面有無一座山，而我住嘅地方就有，由我細細個開始其實已經好想行吓呢座山。
我同朋友著咗行山服裝，拎咗水同少量充飢嘅食物就開始咗呢個旅程。
「toby，今日行呢度緊唔緊張先？」ok妹問。
「少少啦，一開頭咁多樓梯，都唔知難唔難行啊。」toby回答。
「怕咩啊？平時我地都算有做開運動啊，無事嘅！」ok妹擺咗個V手勢。
兩個人開始咗腳步，猛烈嘅陽光帶住一絲暖意照耀住我地，可以話係冬天入面嘅甘露。
我地只係行咗頭十分鐘嘅樓梯，就已經開始有喘氣嘅感覺，望翻背後發現已經都算高，有少少成就感，我地用呢個位置做一個休息點，回翻氣就繼續前行。
「啲梯級又窄又唔平，行得真心辛苦。」ok妹對住toby講。
「唔係啊嘛，咁快就攰啊？我地有排行喎。」toby話。
「痴線，抖順條氣再行啦，大把時間。」ok妹答。
休息咗三分鐘，我地開始踏上旅途，而toby發現地下有張撲克牌，上面伴隨住樹葉同一隻毛毛蟲。因為我勁驚昆蟲，所以我大聲嗌咗下「啊！」toby亦俾我叫聲嚇親，即刻踢走張牌。
第二段路開始有翻少少嘅樹蔭，望下周圍嘅景色，大力聞樹木同花草嘅香氣，影下網紅相，
而估唔到呢張相會成為我地之後嘅惡夢。
「toby，你睇下你呢張相，有無覺得你後面呢忽有啲怪怪地嘅感覺？」我指住張相。
「幾好睇啊，係影到我有啲肥咁囉！你睇下我幫你影呢張同你幾大分別。」toby有啲不滿。
我地一路向上行，慢慢樹越嚟越多，陽光都開始照射唔到，周圍都係草，突然有啲好似有人行過啲草嘅聲音係後方發岀。
「喂！聽唔聽到有聲啊？」我問toby。
「你都聽到？我都聽到..啲草無理由會有人行㗎喎！」Toby擺岀奇怪表情。
突然有一團黑影係我地頭上面跌落嚟！我地嚇到跌落地。
「嘰嘰嘰⋯」一隻馬嬲搶走toby嘅背囊。
而突然陷入驚慌嘅我地又點會反應得到，過咗幾秒先有反應。
「我個背囊啊頂！我啲野食係晒入面㗎！」toby指住隻馬嬲。
但係我地又點會捉到隻馬嬲呢，望住隻馬嬲爬得越嚟越遠。
無奈之下，唯有繼續向前行，嚟到一個休息站。有一間士多，士多旁邊一個觀音像。
「哈囉！老闆係度嘛？」toby向住士多內部叫一叫。
一個人影快速行岀嚟。
「唉唷唔好意思啊！要你等咁耐，想要啲咩㗎？」老闆娘問，同時望咗一望toby。
「要枝水同一包糖啊唔該。」toby拎起兩樣嘢。
「無問題啊妹妹仔！你地今日嚟行山啊？小心啲行啊，行多一陣好翻翻落去啦。」老闆娘特別向住toby語重心長咁講。
「知道！我地會㗎啦，唔好擔心！嘻嘻。」toby覺得老闆娘好和藹可親。
買完嘢就再向上行，今次行入呢條路好黑，周圍只有樹枝同樹葉，唯一唔同嘅係，呢度光線超級唔充足，樹幹上面仲綁住一條紅繩。
我感覺超級唔舒服，就示意想走。
「我有啲唔係好舒服，不如落翻山好無啊toby。」我向toby講。
「好啊！反正唔知仲要行幾耐，又無風景睇，不過我要去去廁所先。」toby話。
佢見到遠處有一個公廁，但都無理咁多就入咗去，無幾耐toby就衝咗岀嚟捉住我走。
「走啦走啦！唔好留係度，快啲行！」toby拉住我走。
佢越拉越大力，仲行得好快，因為地面唔平又俾人拉住嘅我失平衡，差啲就扭親。
「Toby，搞咩啊，山路嚟㗎！行咁快好危險㗎！」我拉停toby急促嘅步伐。
佢無答我，默默咁拎起部手機，用自拍模式影住自己。畫面無任何動靜，直至佢轉去狗臉濾鏡。係畫面上嘅位置都偵測到人臉，我地兩個對望一下就立即不停跑。
呢一刻我乜都諗唔到，靜係想快啲落山。我地跑到去之前士多位置，停咗腳步。
「點解會咁㗎？我地係咪做錯咗啲咩啊？」我問。
「我都唔知啊，我真係無諗過會遇到啲咁嘅野！啱啱我去廁所果時，入咗廁格，一開頭無咩特別，痾痾下尿聽到有人關廁所門嘅聲，我咪問下係咪你囉，但係又無答我，之後我諗住抹乾淨就走岀去啦，點知又用晒廁紙。咪多口問下隔離有無囉，佢都係無應我，我就算數啦，反正都要翻去沖涼。但我見到地下有個影 ，咪向上望，點知一望就見到有個人頭對住我笑啊！我咪即刻跑岀嚟拉住你走。」toby好驚咁對住我講。
呢個時候，士多嘅老闆娘岀咗嚟。
「叫咗你地快啲落翻山㗎啦妹妹仔，你地係山腳果時係咪掂咗啲唔應該掂嘅野啊？」老闆娘問。
我地回想咗一陣，記翻起張撲克牌，仲諗起有人講過唔好亂掂地下嘅撲克牌。
「我地無意㗎，以後都唔敢啦。」我同toby同時講。
老闆娘叫我地裝翻幾枝香係觀陰像位置，拎咗兩張有啲經文嘅黃紙係我地全身掃三次。
「快啲走啦！唔好再上翻去啦！」老闆娘對我地講。
我地向老闆娘表示感謝同不停手合十道歉，走到路口位向後睇下，見到一個黑影係老闆娘身旁向我地揮手，我地就成枝箭咁衝落山。