「失」婚大作戰: （十二）

我地三個飲飽吃醉，到凌晨一點幾先散場。

我同肥榮見聽日係禮拜，索性唔返屋企，上安仔屋企過一晚夜
。
三條麻甩佬啱先飲酒飲到醉醉地，入到屋兩個訓落地下，一個就訓上床（肥榮一條友霸曬）。

「肥榮、安仔，我有個問題想問下你地…」

我半醉半醒咁問二人：「假如，我話假如，你地好鐘意好鐘意一個女仔，鐘意到想同佢結婚嗰隻，但係有一日你發現個女仔，竟然係你失散多年嘅妹妹，咁你地會點做？繼續同佢一齊，定抑或分手？」





「阿妹正呀，識食一定食阿妹！」肥榮講完發出一下猥瑣嘅笑聲。

「你估拍AV咩肥榮，自己個妹都搞，正一變態。」安仔張開口，打一聲喊露。

「唓~橫掂我都無阿妹，都係FF下啫。」肥榮回應。

「咁安仔呢，俾你你會點做？」我問。

「咪分手囉，唔通搞亂倫？」





「但係如果你真係，好鐘意好鐘意好鐘意嗰個人，鐘意到唔捨得同佢分開呢？」

「唔捨得都要分開架，除非你唔介意亂倫，又或者你催眠自己，催眠到自己唔當嗰個係你個妹。」

「催眠自己？點催眠？」

「呢啲我隨口講下之嘛，做咩咁認真？」

「無，我都係隨口問下。」





安仔隨口噏，但係我又真係咁傻，花時間諗催眠到底work唔work，雖則明知呢個只係某程度上嘅自欺欺人。

諗諗下唔知點解又諗起，細個睇金庸嘅《天龍八部》，裡面個角色段譽溝親啲女都係自己個妹，點知到尾卻發現原來自己係阿媽同另一個男人生嘅，原來親生老豆一直係另有其人。

你地話如果我都唔係自己老豆生嘅，咁我同Wendy咪唔算亂倫，就能夠照樣結婚生仔。

唉...

我歎一口氣，心諗真係無陰功，自己居然可憐到，寄望自己阿媽紅杏出墻。

安仔同肥榮已經訓著左，仲打緊鼻鼾。

疲倦再加上酒精影響，我合埋眼後，好快都訓著左。

「叮鈴鈴——叮鈴鈴——」





電話鈴聲響起。

迷迷糊糊之中，我喺褲袋拎出電話接聽：「喂？邊位？」

「阿康，你喺邊呀？仲未見人嘅？」

「Wen…Wendy？你揾我咩事？」

「下？你唔記得左啦？你今日約左我入西貢，我依家到左彩虹，咁你呢？」Wendy問。

我望下床頭嘅鬧鐘，原來我地幾個一覺訓到下晝三點都未起身。

原定嘅計劃我地三個應該係朝早七點幾，就入西貢準備表白嗰嘢，到準備咁上下，我就會出返市區接Wendy。





到夜晚就會帶對方到沙灘，向佢表白。

現在計劃已變，我無法赴約：「Wendy，我臨時有啲事，所以嚟唔到，唔好意思。」

「哦，咁好啦，唔阻你啦，bye bye。」從對方嘅聲線中，聽得出嗰種被人「放飛機」嘅不爽。

收左線後，我順便Block左佢，並刪除佢啲聯絡方式，包括電話號碼同Facebook，以防過去嘅我去揾對方。

安仔同肥榮仍然訓到不省人事，叫都叫唔醒，我費事理佢地，由佢地繼續訓，自己一個人走先。

琴晚飲左咁多酒，個頭訓醒後keep住赤赤痛。

我求其揾啲嘢食下填肚，跟住到屈記買盒解酒丸。

行到收銀處時，見到一個身材高挑，著住白色恤衫嘅男人。





我認得佢，佢亦認得我。

呢個男人就係Wendy嘅嗰個有錢仔上司。

「得你自己一個嘅？我琴日聽Wendy講，佢話約左你去西貢架。」個有錢仔問。

「我臨時有啲事無去到。」我答。

「其實Wendy呢，我就差唔多追到手架啦，到時希望你唔好再纏住佢。」

我冷冷一笑，無作回應。

然後佢繼續講：「佢依家都係揾你嚟攝時間嘅啫，到佢諗清楚就飛起你架啦，話曬我條件好你咁多，佢有乜理由揀你唔揀我。」





我微笑點頭，仍然無開聲回應。

到買完嘢離開，我兩個行出鋪頭，佢揸左架Benz。

喺佢開車之前，我行到車窗前同佢講：「其實，Wendy唔係嗰種膚淺嘅拜金女仔，如果你真係想追到佢，唔好淨係識買嘢送嘢，嘗試諗下啲心思嘢，例如係唱下歌彈下結他咁，不如揾日你試下唱首John Legend歌俾佢聽，話唔定就會成功。」

呢條有錢仔串就串啲，但睇個款都唔似係啲花花公子，假如Wendy同佢一齊，應該都會開心幸福嘅。

依家係下晝四點半，二十四小時嘅穿越時間得返四個鐘。

四個鐘之後，當我再打開眼，我唔會再喺教堂，身邊嘅嗰一個人都唔會再係Wendy。

我地間五年感情即將灰飛煙滅，猶如冬日裡呼出嘅空氣，一縷白色煙霧喺自己面前被冷風吹散，不留半點痕跡。

一段深厚嘅感情，四個鐘之後，將成為一段從未發生過嘅愛情。

所有回憶、所有記憶、所有經歷，全都一一喺我同Wendy記憶之中消失。

一諗到此，我就非常難受。

我將啱啱買嘅解酒丸捨棄，到七仔買左一打啤酒，嚟到碼頭再飲過。

呢刻我想灌醉自己，試圖用酒精麻醉自己，唔俾個腦有清醒嘅時間，去諗嗰啲曾經美好快樂嘅片段。

我飲完一罐又一罐，一打又一打，飲到個人斷曬片。

到再醒嚟嘅時候，第一眼見到嘅，係安仔同肥榮。