「失」婚大作戰: （十三）
「喂阿康，你突然做咩呆左唔出聲？」肥榮身上著住加大碼嘅西裝西褲。
「點…點解…點解我仲喺呢度…」我見到自己返到嚟同一間教堂。
「未訓醒呀你？婚禮都未開始，你梗係仲喺度。」 安仔個頭gel到「臘臘令」。
「無可能，我同Wendy都無表白過，我地點會結婚？」
「你係咪真係有結婚恐懼症，搞到個人精神錯亂？」安仔摸一摸我額頭。
「當時你地兩個都喺度架，我都無同Wendy表白，何來結婚？唔好話我聽，我返到現實後，你兩個無阻止我表白呀下？」我追問二人。
「講咩呀你？你都無表白，係Wendy同你表白呀嘛，你唔係真係得左咩結婚恐懼症，家下驚到失憶下話？」安仔對我講。
下？Wendy同我表白？？？
忽然間，腦袋感到一陣昏眩。
隨之，有一啲畫面湧現眼前。
我見到自己身處喺一個沙灘，周圍有蠟燭砌左「I LOVE U」字形，然後有煙花略過夜空，同埋樂隊嘅演奏。
喺呢個環境下，Wendy向我示愛。
安仔講得無錯，我無表白，係Wendy表嘅白。
點解Wendy會同我表白？
「噔—」四周漆黑，一盞白燈射落嚟。
「竟然咁都唔成功，真係可惜。」Jacob坐喺梳妝台前食緊雪糕。
「你嚟得啱啦，你又話阻止開始就可以阻止結束嘅，殊不知我仲喺度見到你條友，一切如常，咩都無變過，」
「咁事實唔開始就真係唔會有結束，只係無預到Wendy會咁主動，開口同你示愛，呢樣我都無計架。」
「咁點解Wendy會同我表白？」
「其實都唔出奇嘅，最大可能咪就係根本Wendy一直都暗戀緊你，見等唔到你表白，咁就自己主動開口表白。」Jacob「筆」一啖雪糕。
「你話Wendy一直都鐘意我，所以同我表白？」
「睇怕就係啦。」
Jacob呢個講法聽落都合乎邏輯嘅，照咁推斷，Wendy之前一直無接受有錢仔上司嘅追求，莫非都係因為鐘意我嘅緣故？
我同佢喺一齊之前，一路都有啲曖昧，可能佢就喺曖昧期間鐘意左我，一直等緊我開口示愛，最後見等無可等，就決定自己做主動。
只但係，佢表白嘅形式又會同我嘅咁相似？
「咁樣功虧一簣，都真係幾唔抵。」Jacob丟棄手上食完嘅雪糕杯。
「已經試左四次都唔得，你仲有無辦法？」我問。
「無啦，我連最後一招我俾埋你，依家無曬辦法啦。」
「唔係呀嘛，得返唔夠五分鐘個婚禮就要開始，我家下想逃婚都唔知嚟唔嚟唔切，呢個關頭你先話無曬計？」
「咁我以為唔表白呢招實掂架嘛，點知咁都衰左，我真係無『橋』啦，一係你自己幫自己諗下，睇下仲有無辦法？」
「我有辦法就唔洗問你啦。」
「好啦，等我食多杯雪糕，激發下靈感，再幫你度一度。」Jacob喺衫袋拎出一杯雪糕。
而我都嘗試回想過往一啲點滴，諗下仲有咩時間點值得返去。
我一邊回想，心裡竟然一邊暗自慶幸，慶幸嗰啲昔日嘅回憶仍然存於腦中，並無消失。
講到尾，我始終係唔捨得捨棄呢段感情。
唔捨得捨棄嗰啲充滿愛嘅回憶。
「有！我諗到計！」Jacob突然大嗌出聲。
「頂你，咁大聲作死咩，差啲耳仔都你俾整聾。」我又俾佢嚇左一跳。
「Sorry sorry，一時激動大聲左，但我已經諗到你要返去邊一日。」
「邊一日？」
「顧城嘅詩係咁寫嘅，你不願…」
「得啦得啦，唔洗再重複，快啲講啦。」
「你同Wendy嘅開始並唔係從表白嗰一日計，而係由你地相識嘅嗰一日。」
「相…相識嗰一日？」
「你同Wendy係點識架？」Jacob問。
「我兩個係喺一場演唱會度識嘅，你唔會係建議我返去嗰一日，要我唔好同對方相遇下話？」
「係呀。」
「咁點得？咁即係Wendy會變成一個完全陌生嘅人？我接受唔到。」
「點會接受唔到，五年感情你都捨得，咁都唔爭在呢段相遇啦。」
「但…但係…你要Wendy喺我生命中完全消失，我寧願自己喺婚禮上玩消失…」我表示唔太願意。
「二零一五，七月二十二號，Blur演唱會，與她的第一次相遇。」Jacob卻趁我講緊嘢時，靜雞雞偷左我部電話嚟睇。
我拿拿臨搶返翻嚟：「有無搞錯呀你，未經批准就睇人電話。」
「點解張相影到咁濛，你係偷拍架？」佢問。
「係呀，張相係偷拍架。」
五年前嘅七月二十二號，係Blur嚟香港開演唱會嘅日子，亦都係我同Wendy相遇嘅一日。
當日Wendy就企喺我旁邊，因為現場好逼，所以我地兩個都企到幾埋。
個show睇到中途，佢無端端喺度喊。
咁我見到有一個女仔喺度喊，梗係展露一下紳士風度，遞左張紙巾俾佢。
就喺佢接過紙巾嘅時候，我同佢四目交投，就喺嗰刻我一見鐘情，深深俾呢個女人吸引。
至於佢其實並唔係喺度喊，只係鼻敏感，不停咁流鼻水同眼水。
平時我就怕醜仔嚟，唔敢主動同女仔傾計，但嗰日演唱會氣氛熱烈，加上自己對對方真係非常有好感，因此就膽粗粗撩佢講嘢。
傾傾下發覺原來佢同我一樣，張演唱門飛都係人地轉贈俾佢。
唔同嘅係佢並唔係咁鐘意Blur，或者應該講佢對Britpop唔係特別感興趣，純粹係因為唔想曬左張飛先過嚟聽。
佢話自己聽開R&B，喺咁多個外國歌手中，最鍾意係John Legend。
為左營造到自己同對方好似好有共同話題咁，我就扮曬嘢話自己都鐘意聽John Legend 。
到散場後，我有諗過向佢拎contact，可惜又淆底唔敢開口，仲好似個痴漢咁，偷偷地影佢，諗住留個紀念。
後來機緣巧合之下，喺搭車走嘅時候，偏偏又俾我喺同一架巴士度，撞見返對方。
難得上天俾多一次機會，我好好把握一次，主動坐埋去佢隔籬問佢攞電話。
我地兩個嘅故事就係咁樣開始。
「…♪Here comes the ice-cream man， Parked at the end of the road…」
當回過神來，我聽見旁邊嘅Jacob又口痕痕喺度唱歌。
佢唱嘅係Blur首 Ice Cream Man。
「好嘈呀你，唔好唱啦。」我叫停佢。
「嚟啦，再穿越多次啦，你唔改變過去，咁你同Wendy上床嘅事以後就會變成事實，無得再改變架啦。」
Jacob又攞返呢件事出嚟講，佢真係好q煩。
「頂，你講到咁，即係我無得揀啦。」我回應佢話。
「除非你有更好嘅方法啦。」
我思考片刻，然後答：「不如返去拍拖嘅第一日，我同佢講分手，你話得唔得？」
「無用架，就算穿越嘅你講左分手，但係過去嘅你之後都會照樣搵返Wendy。」
「咁…咁又係嘅…」
佢又講得無錯嘅，單憑我每次返去二十四個鐘，好難做到分手分得徹底。
跟住我問佢：「話時話，你識唔識得一啲催眠嘅魔法，即係可以令到我唔當Wendy係我個妹嘅嗰種催眠？」
Jacob搖一搖頭：「我淨係識得幫人穿越時空，並唔識得催眠。」
「乜你咁渣架，淨係得一種能力。」
「你想揾人催眠自己，呃自己一世呀？」Jacob問。
「係呃到一世我又唔拘。」
「可惜我幫你唔到。」
我嘆一口氣：「唉算啦，穿越埋最後一次，如果都係唔成功，咁我唯有做一次衰人，焗住要喺婚禮上逃婚。」
「好呀，一於就咁話，你試埋呢最後一次，假如真係唔得，咁我真係幫你唔到。」
於是喺Jacob協助下，我開展左最後一次時空穿梭之旅。
指向前方，我大嗌一聲：「哈利路亞 Jacob CHANCE！」