一個A0毒L和O4女神的故事: 第十二章 嗰個女仔係你邊個

第十二章 嗰個女仔係你邊個

阿康被George推跌在地上，立即按著自己尾龍骨的位置，面露痛苦之情，看來撞在地面時弄傷了尾龍骨。

George︰「你究竟係咩人嚟㗎，都過咗兩年啦，你都仲要搵Athena？」

Athena︰「唔係呀！George，我慢慢再同你解釋返，我哋走啦，唔好拗喇！」

George︰「吓，依家咩事呀，你好似一啲都唔緊張咁。呢個係變態佬鄧逸康呀！」





阿康緩緩爬起身。他發覺George好像完全不知他成為了Athena的同事，情況好像他又在突然前來騷擾Athena一樣。

「我走先喇，拜拜！」阿康按著尾龍骨，緩緩離開。

George︰「喂，做乜見到我就走呀，你係要玩嘢吖嘛，你……」

Athena︰「唔好再講喇，我哋返屋企先講啦！」

**********





Athena在家中和George吵架。

Goerge︰「你做乜到依家先講，你同個變態佬做咗同事，仲要成個幾月，你都冇同我講！」

Athena︰「Sorry呀，我係要早啲同你講，但冇機會。」

George︰「咩冇機會呀，我哋一齊住㗎！」

Athena︰「你一係就要做公司嘢，一係就飲醉酒，一係就太攰瞓著咗，我點同你講喎！」





George︰「你宜家又怪我喎，我唔信個幾月連一個機會都冇！」

二人為了阿康而大吵一場。Athena覺得自己根本沒有機會開口，George則覺得Athena有事隱瞞他，而且還是關於他最討厭的人。

當晚二人又再一次分房睡。

**********

翌日，Athena回到公司，看見阿康已在，其餘同事則未上班。她看到阿康由辦公椅上站起來時，手仍然要按著尾龍骨，証明昨晚George的一推，真的令阿康受傷。

阿康：「咦，早晨呀，你咁早返嘅！」

Athena︰「你點呀，係咪仲係好痛，使唔使睇醫生？」

阿康：「吓，唔使啦，小事。」





Athena︰「跌親尾龍骨可大可小㗎，不如你依家就去睇醫生啦，我陣間同Johnson講返你請病假。」

阿康：「唔使喇，聽日我哋就要見客喇，話晒都係我第一次見客，我仲有好多嘢要同你哋傾，請咩假呀！」

Athena︰「Sorry呀！琴晚George佢太衝動，未問清楚就推跌你，攪到你整親！」

阿康：「唉，其實係我嘅問題，同你食完飯就好應該返自己屋企啦，傾傾吓又跟咗你行去你屋企嗰個方向，就俾George撞到。」

Athena︰「根本唔關你事，係我冇好好處理過呢件事。」

Athena向阿康講出自己並未在George面前提及過阿康成為了她同事的事。

阿康：「你唔需要擔心我呢個傷勢喎，你睇吓我張凳！」





Athena望向阿康的辦公椅，發現椅上早已擺放了一塊坐墊，坐墊近椅背的一方有一個洞，這是一個可以減低尾龍骨壓力的的坐墊。

阿康：「其實幾年前我跌親過條尾龍骨，呢個係舊患，有時坐得多都會有啲赤赤痛，所以我喺呢度day 1開始已經用緊呢個坐墊，唔關琴晚我跌親事。OK㗎喇，不如我哋傾返聽日個客嘅嘢啦！」

Athena聽到阿康的解釋，覺得阿康不想自己擔心，以免她太過自責，才輕描淡寫地帶過此話題。

**********

今天，對於阿康來說，是轉工以來的第一個挑戰。他跟Johnson和Athena外出見客，是阿康的第一次。為了今次會面，阿康已經連續預備了好幾晚，練好怎樣跟客戶present，希望有一個好開始。

可惜，來到對方公司的會議室後，他見到一個最不想遇到的人－一個叫Vicky的女生，也就是他七個曾追求過的女生的其中一位。

阿康當場呆了。Johnson介紹Athena和阿康給對方負責人認識，他也很遲才給予反應，Athena立即跟他耳語，叫他專心一些，奈何阿康根本集中不到精神。

近月來，阿康的溝通技巧已有進步，社交方面也進展不少。現在跟一個陌生人也能正常說話，除非是相近年紀的女性，可能還會有少少緊張。這有賴他跟Rachel多了溝通，以及得到Athena的接納。而好友Dylan也常常帶他去健身和打泰拳，多了興趣和多接觸了不同的人，這令他社交方面有一大進步。





可是，只有他曾追求過的女生例外。她們可算是他人生低潮時認識的人物，也是人生的污點之一。與他關係最差的，除了Athena之外，還有這個Vicky。

Vicky與其他阿康追求過的女生不同。其他的女生，一看見追求者是阿康，很早已經直接或間接地拒絕，完全沒有給予過阿康一絲希望。而Athena也是一開始太過間接地暗示不會接受阿康，令阿康誤會自己還有機會，從而發生了後續的騷擾事件。

只有這個Vicky，擺出一副來者不拒的模樣，很明顯，她是娘娘。她對於埋自己身的男性，都當作是兵一般去看待。不會直接拒絕對方，也不會太冷淡，但當對方覺得自己有機會成為大將軍的時候，便會開始不瞅不睬，若即若離，令對方忐忑不安，更容易對娘娘產生了一種「無論怎樣做，也要得到娘娘」的心態，以便她可將兵仔們玩弄於股掌之中。

阿康入世未深，很容易便墮入了Vicky的圈套。阿康覺得，難得有一位女生肯跟自己說話，而且肯理睬自己，感覺猶如被寵幸一樣。阿康決心要在Vicky身邊守候著，他相信終有一日，Vicky一定會感受到自己的好，會跟他在一起。

當然，故事的發展也是預料之內，阿康只是Vicky的步兵、後備兵，任由娘娘差遣，他只是娘娘身邊的一個侍從，毫無尊嚴可言。一時要他去元朗買這個，轉頭又要去筲箕灣買那個，接著又要幫她排隊取飛等位，但最終並不是和他一起晚餐，而是和另一個男性朋友。

這情況已持續超過半年，每件和Vicky有關的事，至今阿康仍歷歷在目。現在突然遇見Vicky，腦裡又再次閃起這些畫面，根本不能集中精神。

Athena︰「我嗰part已經講完，就等阿Jack介紹返呢批玩具嘅安全性測試報告。」





阿康聽不到Athena的說話，沒有給予反應，對方公司的人也感到莫名奇妙。

Athena︰「Jack，到你講解喇！」其實Jack是阿康返新工後改的洋名，通常與客戶接觸時才會用到。

阿康終於有反應。

阿康：「係。份測試報告已經夾咗喺第七頁，啊，唔係，係第五頁。」

客戶們翻開第七頁後再翻去第五頁，但也找不到報告內容。

阿康：「係呀，係第九頁先啱！」

對方的負責人已有少許不滿意，但阿康仍然沒有改進，還多次講錯內容。

Athena︰「等我補充少少資料吖，其實份報告……」最終要Athena執手尾，向客戶講解報告的內容重點。

**********

離開客戶的公司後，Athena忍不住責備阿康。

Athena︰「你有冇攪錯呀！之前已經同你夾咗好耐，你亦都rehearsal過好多次，點解仲係會錯漏百錯㗎？」

阿康：「Sorry呀Athena，Sorry呀Johnson，我……」

阿康無法解釋。

Johnson︰「有咩事返公司再講啦！」

返回公司後，Johnson叫阿康入房，但沒有叫Athena。

Johnson︰「其實發生咩事？」

阿康：「Johnson我……」

Johnson︰「嗰個女仔係你邊個？」

阿康：「吓？」

Johnson當時一進入對方的會議室，已開始留意阿康，因為他是第一次見客，所以Johnson特別留意他。Johnson發覺他一看見Vicky，神情立即完全改變。

阿康誠實地向Johnson透露，Vicky是他曾追求過的女生，並對自己今日的不專業而道歉。

Johnson︰「唉！好彩頭先有Athena幫你，對方仍然有興趣，但下一次會面係關鍵。你有冇信心一個禮拜後可以調整到你嘅思緒，唔好再犯錯？」

阿康：「我得㗎Johnson，你俾多次機會我啦！」

Johnson︰「OK！」

其實Johnson和阿康的對話，Athena在房外無意中偷聽到。

**********

晚上，Dylan約阿康出來做gym。

二人就在相鄰的跑步機上，邊跑邊說。

Dylan︰「你條粉皮，再係咁落去……雖然你已經進步咗好多，但你唔可以俾呢兩年所發生嘅事影響到你下半生！你應該咁諗，既然最憎你嗰個Athena都已經原諒咗你，仲可以同你做到同事，咁其餘嗰幾個又算得係咩！」

Dylan嘗試用Athena的例子，去鼓勵阿康要勇敢面對其餘六個他曾追求過的女生。

說時遲那時快，正當阿康再次想起那六個女生之時，他在健身室內看見了一個熟識的身形，令他大吃一驚，立時跑姿有影響，差點在跑步機上仆倒。

阿康關掉跑步機，呆站在跑步機上。

Dylan︰「你做乜撚嘢呀，突然停低！」

阿康：「我見到Jessie！」