一個A0毒L和O4女神的故事: 第十七章 從來都未試過俾一個女仔鍾意過

第十七章 從來都未試過俾一個女仔鍾意過

一直以來，阿康都視Rachel為妹妹，時刻都很照顧她。現在讓阿康看見她被背叛後失落的一面，阿康比之前更努力去照顧Rachel，希望她盡快走出愛情的傷痛。

對阿康而言，雖然這兩個星期是關鍵時間，他應該要多抽時間去處理公事，但他選擇將自己大部分時間都讓給Rachel。

二人經常不理其他同事，一起外出午餐，在公司裡也經常在一起，下班後還會一同約會，外出晚餐和看電影，做很多情侶間會做的事。阿康寧願晚一些睡覺，將公事放在睡前的一兩小時，也要用最重要的時間來陪伴Rachel。

一次肥媽、Athena和賀叔之間的對話，三人均認為阿康和Rachel最近過份地親密，似乎超越了一般同事或者朋友之間的關係。





肥媽：「我擔心嘅係Rachel呀！」

賀叔：「你覺得係神女有心？」

肥媽：「係呀！呢個女好容易動感情，猶其佢啱啱甩拖，阿康呢段時間又咁照顧佢。同埋佢呢個男友本身對佢唔好，又偷食，渣男一名，阿康就事事關心，好照顧佢，反差太大，好容易會產生感情。」

賀叔：「阿康呢條死仔，有Rachel呢種質素嘅女仔鍾意，應該三生有幸啦！」

Athena︰「但阿康唔似係鍾意Rachel。」





肥媽：「係呀，佢似當Rachel係妹妹囉。我驚阿康唔識避忌，令Rachel誤會，到頭來會傷到兩個嘅感情。唉，有時間嘅話我都想同佢哋傾吓！」

**********

明天就是跟客戶開會的日子，原本經常陪伴Rachel的阿康，也要留在公司作最後衝刺，跟Athena一起排練present。

雖然，這兩個星期被Rachel分了心，但阿康晚上在家有勤練英文，present完全沒有問題。

Athena︰「講得幾好吖，聽日照咁樣講就得喇。應該唔會又有拒絕過你嘅女仔喺嗰間公司掛！」





阿康：「哈哈，冇啦，我調查過，一定唔會有！就算有，我都唔會怯㗎喇，你要對我有信心！」

Athena︰「我對你工作上有信心，但對你處理感情事冇信心呢！」

阿康：「吓，咩感情事呀？你知我係A0嚟㗎啦，冇感情事要煩㗎喎！」

Athena︰「咁，你對Rachel有咩感覺？」

阿康：「Rachel？我哋冇嘢㗎！我當佢係妹妹，佢當我係阿哥，就係咁簡單。」

Athena︰「唔單止係我，肥媽同賀叔都覺得Rachel鍾意咗你，你感覺唔到咩？」

阿康：「吓！」

阿康原本在執拾文件，準備離開公司，見Athena問起自己和Rachel的事，他立即停止執拾，認真地跟Athena討論這個問題。





阿康：「可能我真係唔識得去避忌呢啲嘢啦，因為我係A0，從來都未試過俾一個女仔鍾意過。我朋友唔多，猶其異性朋友，所以我好珍惜你哋，我唔想再俾人討厭，可以同你哋好好相處。」

Athena沒料到阿康會那麼認真去回答這個問題，所以也認真地去聽。

阿康：「Rachel同佢男朋友分手嗰晚，佢喊得好犀利，我到呢一刻都唔會忘記。之後我發覺，原來我抽多啲時間陪佢，佢冇覺得好煩之餘，仲要開心咗，令我覺得，我更加要義無反顧咁去對佢好，快啲令佢走出情傷。」

Athena︰「我知你對佢好，但唔可以令佢有誤會呀！」

阿康：「我唔想因為要避忌呢啲嘢而特登唔理佢。我應承你哋啦，如果俾我知道Rachel誤會我鍾意佢，我一定會同佢解釋清楚。」

Athena︰「你知道就得喇！夜喇，早啲返屋企抖啦！」

阿康想法很簡單。他未被女生愛慕過，所以真的沒想過會被愛，不覺得Rachel會喜歡自己。經Athena一講，他回想這兩個星期，真的和Rachel很親密，由朝見到晚，連放假都在一起。除了拖手和更親密的行為沒有做過之外，其餘行為也宛如一雙情侶。





阿康沒有再多想，盡量集中精力在明天見客的事。

**********

今次和新客戶開會，也是Johnson、Athena和阿康三人一同到客戶公司。除了對方要求的玩具之外，阿康也多帶了一些其他系列的玩具，希望適當時候可以用得著。

雖然今次沒有阿康追求過的人在對方公司，但今次是用英文present，阿康難免緊張。幸好對方的負責人比較友善，並不介意阿康說得慢，細心聽他講解產品特性。而阿康也發揮正常，在客戶面前得了不少分數。

正當對方負責人很滿意Smartoys所生產的玩具，決定向Smartoys下訂單之際，負責人的太太和六歲大的兒子來到會議室。他們想小朋友試玩Smartoys的遊戲，看看他是否喜歡。

顯然易見，這位外國小朋友並不喜歡他們帶來的玩具。每件玩具，他拿上手把玩一回，便隨即放下。

負責人兒子：「Dad, they are so boring.」

這下子，令Johnson他們尷尬非常。他們不知對方會否因為這位用家的評語，而打退堂鼓。





此時，阿康從袋裡取出一盒道具。

阿康：「Hey kid, do you like magic?」

負責人兒子：「Wow, I like it!」

雖然對方從沒要求Smartoys示範魔術玩具，但阿康生怕生意有變數，也多帶了玩具來，希望有用。

阿康在眾人面前示範魔術，非常純熟，看來很專業，完全沒有破綻，而且是用英文表達。換言之，阿康是有練習過，並不是即興。

小朋友邊看邊拍手，大叫「amazing」，非常滿意，還叫阿康教他怎樣玩。這樣子也提起了對方負責人對魔術系列的興趣，Johnson和Athena也順勢推銷此系列的玩具。

之後，阿康還取出了一個圓球體的星空投影器，是Smartoys的新產品，投射範圍廣，根據真實星空而做，可直接連上相關網站，看到不同地方的實時星空畫面。除了有娛樂性外，也有學術性意義。負責人的太太非常喜歡這個產品。





最終，對方公司跟Smartoys簽了一張數量頗大的訂單。

**********

三人離開對方公司。

Johnson︰「喂，你又識得帶呢兩件貨過嚟嘅？」

阿康：「冇呀，我幾日前曾經上網做過資料搜集。」

阿康向Johnson和Athena解釋，他不想失去這份合約，所以之前看過對方負責人的Facebook和IG，希望知道他們的喜好。幸好對方經常更新社交網站，知道他的太太很喜歡觀星，他的兒子很喜歡魔術，所以帶定這兩套玩具過來。這次誤打誤撞真的用得著。

Johnson︰「你諗得比我深入，而且英文比我想像中進步咗好多。Well done！」

阿康：「全靠Athena喳，佢幫咗我好多。」

Athena︰「我淨係捉你錯嘅英文喳，冇叫你帶魔術同projector呀。你功勞最大啦！」

Johnson︰「唔好咁客氣喇你哋！嗱，唔好再推我喇，今晚嗰餐我嘅。」

阿康：「對唔住呀Johnson，我今晚都係有事，食唔到飯。」

阿康解釋，因為他答應了Rachel，如果生意傾得成，會讓她請食飯慶祝。Johnson就此作罷，並答應下星期一定會請全公司食飯。

晚上，阿康如常赴會。Rachel選擇請阿康食貴價Omakase，令阿康有點意外。而最最最令阿康意外的，是Rachel的衣著非常性感。