一個A0毒L和O4女神的故事: 第七十一章 我哋就唔好再糾纏落去喇

第七十一章 我哋就唔好再糾纏落去喇

阿康獨自前往巴士站等車，準備乘巴士回家。沒多久，Rachel追上他，站在他的旁邊。

阿康：「點呀你，今晚成隻吊靴鬼咁嘅！」

Rachel︰「見你一個人咁慘，陪你搭巴士嘛！」

阿康：「快啲返屋企啦，夜媽媽單獨同男性朋友搭車，成何體統呀！你有男朋友㗎喇！」





Rachel︰「我不嬲都冇體統㗎啦！」

阿康：「做你男朋友，真係會俾你激到嘔血！」

Rachel︰「我男朋友不知幾信任我！就算佢知道我有你呢個男性朋友，佢都冇干涉過我！」

Rachel之前很少在阿康面前提及她的新男友。

Rachel︰「喺我同佢正式拍拖之前，我問咗佢一個問題。你估下係咩？」





阿康：「你喺我咁煩惱嘅時候考我？開估啦！」

Rachel︰「我問佢：『我有一個之前我好鍾意嘅男性朋友，佢仲要係我同事，咁你會唔會介意？』」

阿康：「你做乜無端端拖埋我落水？」

Rachel︰「佢嗰陣咁樣答我：『如果你已經冇再鍾意佢，咁我做乜介意！』」

阿康：「啱呀，佢冇講錯。」





Rachel︰「我同佢講：『我鍾意過佢，而且成日見面，你唔會嬲咩？』之後佢答：『就算你心裡面有佢嘅位置，都唔緊要，你唔係聖人，記憶唔係話抹甩就抹甩，只要你冇再鍾意佢，你心裡面最重要嘅位置係我嘅話，就得㗎喇！』」

阿康：「原來呢句係你男朋友講！」

Rachel︰「我覺得佢某程度上真係好似你，性格同講嘢都似，但你今次處理問題嘅方法，反而唔係好似你自己喇！」

阿康一直思考著Rachel所講的話，咀嚼當中的意思。

Rachel︰「事實証明，我同我男朋友，一直都好恩愛，冇俾你呢個人影響到。如果Athena最鍾意嗰個根本就係你，前度只係佢過去嘅回憶，我相信你哋都可以過得好幸福！」

阿康望著Rachel。他已很久沒這樣凝視Rachel，發覺她外貌成熟了，連思想也成熟了，不再是以前的Rachel。

阿康：「你男朋友追你嗰陣就梗係話唔介意啦，遲啲就唔同講法㗎喇！點都好啦，我會再認真諗下我下一步應該要點做㗎喇！多謝你呀Rachel！」

Rachel沒有回答，只是張開了手，一副想跟阿康擁抱的樣子。





Rachel︰「使唔使攬下呀？」

阿康：「做咩呀你！仲以為你個人成熟咗㖭，你仲係咁鍾意玩！我再講多一次，你有男朋友㗎喇！」

Rachel︰「關咩事呀！之前我甩拖嘅時候，全靠你俾我攬住你，我先忘記到傷痛。今次我唔介意俾你攬，當係鼓勵下你都好嘛！」

阿康：「痴線，我絕對唔會做傷害你同男朋友嘅嘢，我啱啱先做完受害者喳！你想鼓勵我嘅話，努力啲做嘢啦，等我返上去做嘢可以唔使牽掛咁多。」

雖然很多人會認為，世上根本就沒有純友誼的異性朋友，但阿康跟Rachel這一對，儘管Rachel間中仍會有些亂來，但依然能做到不溫不火地互相關心對方，而又沒有影響各自的感情生活。阿康非常非常慶幸自己有一個可以交心的異性朋友。

**********

阿康不久便獨自離開香港，前往內地工作。工作方面，阿康倒是沒有問題，但生活比香港更枯燥乏味。每天在工廠上班，一日三餐都在工廠解決，晚上就睡在工廠的宿舍裡。不過阿康已一早習慣孤獨，對他來說，一人生活並不成問題。





某一晚，他手機上的行事曆有提示通知，原來明天是他和Athena的拍拖半周年紀念。當時剛開始拍拖的阿康，為免自己忘記了二人的紀念日，已預先在行事曆上記低重要日子。

看見這個提示通知，他有點兒觸景傷情，久久未能平復心情。

自從聽過Rachel的一席話，他曾有意跟Athena重新溝通，希望能挽回感情。但每次拿起手機，Thomas的影像又再次出現在自己的腦海裡，最終也沒有再找她。

突然，手機響起，來電顯示是Athena打電話給他。猶豫了數秒，阿康接聽電話。

阿康：「喂！」

Athena︰「喂，阿康！」

阿康：「你，搵我咩事？」

Athena︰「Johnson話我聽你上咗去大陸做嘢，所以我打嚟問下你點者！阿康，你終於都肯聽我電話，自從分開之後，你都冇聽過我電話。」





阿康：「都過咗咁耐，我都想同你做返朋友，唔想斷咗聯絡。」

Athena︰「阿康，我好掛住你呀！」

阿康聽到Athena這句說話，心裡有說不出的興奮。

Athena︰「我哋仲有冇機會可以喺返埋一齊？」

阿康很想回答「有」，但他說不出口。他選擇退出，成全別人，自己跟Athena的感情又不對等，現在何必又走進這個死胡同呢？但Rachel說得對，Athena就算心裡有Thomas，可能只是記憶，心裡最愛的可能仍是自己。

阿康：「唔係我講有冇機會，個選擇權喺你度！你心裡面放唔低Thomas，我哋根本唔可能喺返埋一齊。」

Athena︰「你俾啲時間我吖，我一定可以完完全全咁放低呢個人！」





阿康知道Athena仍未放得低Thomas，證明Athena仍在糾結當中。阿康腦海又再次浮現Athena和Thomas接吻時的影像，好像揮之不去一樣，心情立刻變差。

阿康：「唔使咁辛苦喇，我唔想再勉強你，既然我都揀咗退出，我哋就唔好再糾纏落去喇！好啦，拜拜喇！」

二人的感情瓜葛，看似在短時間內也無法解決得到。

**********

經過兩個月的時間，Smartoys內地工廠的新負責人已全面掌握玩具生產的流程，並成功在阿康的協助之下成功完成一批難度較高的批次。阿康是時候返回香港。

返回香港後，肥媽和Rachel生怕阿康這兩個月來過了一段冗長的自閉生活，於是強迫阿康一起外出吃一頓晚餐。

席間，肥媽和Rachel當然不會放過阿康，立即詢問阿康的感情事。阿康見二人又是一副「問不到不會離開」的樣子，於是爽快講出實情。二人對於阿康和Athena仍未有任何進展，顯得有點失望。

肥媽：「你又係嘅，喺大陸自閉咗成兩個月，應該要越嚟越掛住Athena㗎嘛，有冇攪錯？」

Rachel︰「你係咪喺上面識咗件大陸妹呀？定係你喺上面晚晚叫雞，填補咗心靈上嘅空虛，所以冇再諗Athena喇！」

阿康：「痴線㗎你，我晚晚都留喺宿舍，街都冇乜點出過去㗎，點叫雞呀？更何況我都唔係啲咁嘅人！」

Rachel︰「咁你做乜唔掛住Athena？你冇咁易忘記到佢㗎喎！」

阿康：「我亦都冇咁易忘記到佢個前度囉！我過唔到自己嗰關！」

三人又爭論了好一陣子，當然不會有任何結論，慢慢也將話題轉移到別的事情，例如阿康在工廠工作時的趣事、Rachel拍拖的事和各人的近況。一轉到輕鬆的話題，三人也傾得很開心，很盡興，阿康也展現了近期少有的笑容。

只可惜，他的笑容未能維持到尾。就在他們準備離開餐廳之際，阿康見到Athena。當然，Athena並不會獨自來餐廳用餐，陪伴她的，是Thomas。

Athena和Thomas坐在比較遠的位置，所以Athena並未看見阿康他們。

Rachel︰「喂，做乜呆晒嘅？係咪前面有靚女，等我睇過！」

Rachel沿著阿康的視線，很快便留意到Athena。

Rachel︰「哦！如果冇估錯，同Athena食飯嗰個一定係佢前度啦？」

阿康：「係！」

肥媽：「頂，唔係咁冤家路窄呀！」

Rachel︰「佢前度都係一般貨色者，個樣係啲花fit樣，阿康你好佢十萬倍啦！」

阿康：「唔好講喇，我哋走啦！」

阿康由座位步出餐廳門口的路程，一直都望著Athena的方向。他已很久沒見過Athena，心底裡其實很掛念對方。

同時，他看見Thomas。Thomas比他想像中更成熟穩重，樣子也很英俊，剛才Rachel說Thomas只是一般貨色，根本就是替阿康講好話，實際是Thomas的外觀完勝阿康十萬倍。

就在阿康三人步出餐廳之際，Athena終於發現他們。

阿康知道Athena發現了他們，便加快步伐離開。Athena立即追出。

「阿康！」Athena在遠處呼叫阿康。

阿康停了下來，Rachel和肥媽也跟隨阿康停步。

Athena︰「阿康！肥媽、Rachel，乜咁啱呀！」

Rachel︰「係呀，好耐冇見你喇！我同肥媽有啲嘢要做，我哋走先喇，遲啲再傾啦，拜拜！」

Athena︰「拜拜！」

Rachel和肥媽自行離開。

阿康：「其實我都走㗎喇，唔阻住你哋食飯喇！」

Athena︰「唔係你諗咁樣㗎，我同Thomas……」

阿康：「唔使講喇，OK㗎喇，依家咁咪幾好，係我一直都想見到嘅嘢！你哋食得開心啲啦，拜拜喇！」

阿康轉身便走，更加快腳步，轉眼間便消失在Athena的視線之內。

阿康一直走，走到了老遠的位置，眼見四周無人，終於停下來。他忍不住，眼淚自動從眼眶裡流出來。