一個A0毒L和O4女神的故事: 番外篇 - 感受三十七度的體溫 (14)
番外篇 - 感受三十七度的體溫 (14)
Edan一直覺得，自己在Rachel心目中，是阿康的「替代品」。
經過今日仔細無遺的回憶，他終於有所覺悟。
在他的內心深處，同樣視Rachel為Natalie的「替代品」。
替代品又如何？如果Edan確定自己現在心裡只有Rachel，那麼Rachel的心為何不可以只有Edan一個？
可能Edan和Rachel曾經互相視對方為他人的替身，但經過數個月的相處，二人確實可以忘記之前曾經深愛著的那位，繼續甜蜜生活。
當然，唯獨是風筒事件，Edan仍未對此完全釋懷。
Edan︰「得喇，呢啲嘢我會處理喇，我會同Rachel攪清楚，我唔想影響到你哋兩姊妹嘅感情！」
Elise︰「阿哥，我要用我嘅角色去同佢傾，先會知道真相。你放心啦，我一定會撐你！你快啲去瞓啦，唔好再諗咁多喇，你成日都幫我揸主意，今次俾我幫你揸返一次主意啦，好冇？」
Edan望著Elise，霎時間發覺她已經長大了，不再是以前那位任性的女孩。
**********
翌日早上，Edan醒來後已不見Elise。母親看見他沒打算上班，便對他加以斥責。
Edan︰「我俾人抄咗喇，冇工返喇！」
母親：「吓，你攪咩呀，做得好哋哋，無端端俾人抄？」
Edan︰「公司裁員，我都唔想。」
母親：「梗係你平時太懶啦，我係老細都抄你先啦！」
經過昨晚得到Elise的原諒和開解，原本心情轉好的Edan，再次被母親的斥責導致心情變壞。
Edan︰「你放心，就算我短時間內搵唔到工，我都會照俾家用你，我仲有積蓄。我唔會俾少一個崩你，你唔使喺度懶緊張！」
母親：「我都冇咁嘅意思，你又要亂咁估我！我根本冇驚你唔俾家用，我……」
Edan插咀說︰「係又好唔係又好，我冇乜心情再同你講嘢，我出去先！」
Edan跟母親再次話不投機，說不了幾句便不歡而散。
Edan再次走在街上，不知下一步要怎樣做。幸好公司打電話來，叫他返回公司收拾私人物品，並跟人事部計算餘下工資，Edan終於有事可辦。
返回公司後，Edan在自己的座位上慢慢收拾私人物品。
他已在這間公司工作了超過三年，雖然並不喜歡這裡的老闆，但和其他同事的相處尚算融洽，猶其是同一組的同事，關係比較密切。不過，在場竟沒有一個同事前來跟他道別，明明有眼神接觸，但最後只顧自己工作。Edan第一次感受到人走茶涼的現實。
Edan沒有太多私人物品，並不需要像劇集裡的人那樣要用紙皮箱，他的背包足夠裝起所有物品。之後他跟人事部同事辦妥所有手續後，便離開公司。
就在地下電梯大堂裡，他碰見一個不同組的前同事。該同事平時跟他沒有兩句，但今次主動跟他打招呼。
同事：「Edan，你今次真係好撚型喎！」
「吓！」Edan估不到同事會主動和他說話。
同事：「自從你喺老細面前屌個客之後，有好多同事都估唔到你係咁有吉士，講咗好多同事嘅心聲。我哋公司呢兩年真係奸人當道，好多project都做得唔好，但老細根本唔會聽我哋講嘢，淨係識得聽Eric呢啲仆街講嘅嘢。」
Edan︰「型乜鬼嘢吖，依家咪冇咗份工囉！頭先上去執嘢嗰陣，搵個肯同我講聲拜拜嘅人都冇！」
同事：「梗係啦，你上次屌完個客，個客嬲到冇再繼續搵我哋做喇，原來佢哋未正式同我哋簽約㗎！老細屌晒全公司嘅人，攪到阿mark拍晒枱，當眾抄咗老細魷魚！」
「阿mark佢唔做？」Edan感到相當驚訝，因Mark有公司股份，是公司其中一個開國功臣，沒想到會因今次事件而辭職。
同事：「老細今朝心情勁差，落咗柯打你嚟執嘢嗰陣，全部人都唔准同你講嘢，淨係可以俾人事部同你傾公事。只要有同事同你傾一句偈，都會出warning俾佢！係咪痴撚咗線呀，老細已經走火入魔喇！」
Edan：「哦……」
同事：「你而家走都啱㗎，搵工都容易啲。依家好多同事都諗住走，邊做邊搵囉！唔講咁多喇，我返上去做嘢先喇，bye！」
離開大廈後，Edan收到數個同事的信息，都是一些道別和祝福的說話，終感到有所安慰。
被人辭掉也沒關係，但他相信短時間內未必找到同類型的工作，因前老闆在此行業的人脈也廣，如果要封殺他也不是難事。
**********
心情尚未平復，Edan仍揹著沉甸甸的背包，在街上漫步。他在街上偶然看見那間雪糕連鎖店，就是那間香港傳統雪糕品牌所開設的門市，亦是找Edan前公司做數碼營銷的那間公司。
Edan走進店鋪，在裝滿雪糕的冰櫃裡搜尋，很快就找到他的心頭好──雲呢拿味的雪糕三文治。
這個可算是他的兒時回憶，亦是他與母親之間碩果僅存的美好回憶。
這個雪糕三文治，是Edan兒時最喜愛的食物之一，接近百吃不厭的地步。每當他遇到不如意事時，都會買這個雪糕三文治，吃完後心情必定好轉。
有一次，他考試成績不好，退步了很多。一如以往，他打算到便利店購買他那心儀的雪糕，可惜他口袋裡已沒有錢，八達通餘額也是負數。最終他無奈回家。
回家後，他打開冰箱，看看有沒有其他雪糕可吃，怎料讓他發現了那個雲呢拿雪糕三文治！他立刻打開包裝，大啖大啖將雪糕咬入口中，立時感到無比舒暢！
沒多久，他的母親回家，看見他吃著那個雪糕三文治，立即責罵他不問自取。他跟母親嘈了幾句，母親也沒再爭拗，他的心情也沒受影響。
沒多久，Elise跟Edan道出事實。
Elise︰「阿媽都唔食雪糕嘅，嚿雪糕係買俾你食㗎！」
Edan︰「佢會咁好死？最多都係買俾你食者！」
Elise︰「阿媽知我鍾意食朱古力味多啲，所以佢買俾我嘅話一定買朱古力味！」
如果母親是買給Edan，為何又說Edan不問自取？Edan覺得這段母子關係很複雜，平時關係很差，但唯一一件好事也被扭曲成壞事。
每逢往後考試派卷的日子，Edan例必看見冰箱內出現數包雲呢拿味雪糕三文治，証明這都是母親刻意買回來給他，怕他考試成績不好會心情低落，可以令他有所安慰。
Edan知道母子二人都是口硬心軟，但他長久以來都沒打算跟母親修復關係，因他仍未能忘記小學時母親對他有多差勁。
他拿著雪糕三文治，到收銀處準備付款。就在此時，一名男子在旁跟他談話。
「又話我哋啲雲呢拿味雪糕唔夠滑，又要買嚟食？」
Edan望著跟他搭訕的男子，發現是一個中年男人，而且有少許面熟。既然這男人認得自己，又講得出自己昨天在前公司說過的話，想必當時一定在場。
對，他就是站在陳先生身旁的人，想必也是這間雪糕公司的管理層之一。
「雪糕係講配搭，你哋嘅雲呢拿味雪糕雖然唔算好幼滑，但係夾埋朱古力碎同埋外層嘅皮嚟食，我覺得好好食。我講過，我係由細食你哋嘅雪糕食到大，食過你哋好多款唔同嘅雪糕，最尾覺得最好食嘅始終都係呢個三文治。」
由Edan講出自己對雪糕三文治的意見後，二人沒有停止對話，雙方一直互相交流對雪糕的心得。Edan只是以雪糕愛好者身份提出意見，但見對方經常說起製作雪糕的方法和心得，一看就知他是公司負責雪糕製作的人。
Edan︰「唔好意思呀，上次我喺咁多人面前話你哋啲雪糕唔好食，嗰日我心情真係好差，只係衝口而出嘅說話，希望你唔好見怪！」
男人：「哈哈，我都係打份工者，你唔使唔好意思喎！我知你俾人抄咗，你已經唔係呢間公司嘅人，更何況我哋都已經冇繼續同呢間公司合作！我哋可以繼續以純綷鍾意食雪糕嘅身份繼續傾。」
Edan︰「係！你唔介意我問，你對雪糕咁熟識，但係點解都幫唔到呢度出品嘅雪糕？」
該男子姓何，是公司的品質控制主管，負責監察產品質素。他對Edan的評語有很深刻印象，因這些都是他的心聲，奈何一間歷史悠久的食品公司，味道革新是很難做得到，管理亦較僵化，不易作出改變。今次下定決心搞好品牌，也是經深思熟慮過一段很長的時間才下的決定。
Edan︰「我明嘅，我以前做嘢都遇過唔少呢一類嘅公司，要改革好難，不過唔係做唔到。但講嚟講去，味道係最緊要。」
何先生：「喂，睇嚟你依家都應該未有嘢撈，不如你part-time嚟我個department幫我手試味，人工唔會好高，你就邊做邊搵工啦！」
Edan完全估不到，這裡竟有人不計前嫌找他幫手，對於暫時沒有工作的他來說，有兼職可做對他最好不過。可是，他不會答應何先生的請求。
Edan︰「多謝你嘗識我條脷，不過我好難入到嚟幫你手，一嚟我同你哋陳生交咗惡，佢又唔似你咁nice，二嚟我唔想同你哋嘅阿king做同事，我見佢前面就憎佢背面！」
何先生：「吓，原來你同佢有仇口！不過都唔再重要，因為佢已經俾老細抄咗喇！」
何先生解釋，King代表公司跟Edan前公司接洽今次的合作，但做得很差，對方很明顯在某些細節上收費很高，但King竟沒提出質疑，更打算草率了事，讓對方賺盡。幸好發生昨早的事件，心情不好的陳先生要重新審視合作的細節，最終揭發King的惡行。
得知賤男King被解僱的消息，Edan的心情變得無比舒暢。跟昨早最壞的情況相比，今日他見到曙光，証明天無絕人之路。上天給他的只是一個考驗，他一定會闖過面前的難關，就算感情事也是。
最終，他答應在雪糕公司的品質控制中心裡當兼職。
**********
晚上，Elise相約Rachel外出吃飯。
二人也是爽朗的人，又是多年好友，Elise沒有轉彎抹角，將她從哥哥口中得知的所有資訊，跟Rachel一一說起。
Elise︰「我只係想問你一個問題，你仲有冇鍾意你個同事？」
Rachel︰「我冇！」
Rachel的回答，比起前天Edan質問她的時候直接了當得多。
Elise︰「咁你點解仲係咁在意佢以前送俾你嘅嘢？」
Rachel︰「我唔知點解會咁，我早排都煩惱過呢個問題，但我已經諗得好清楚，我最鍾意嗰個，係你阿哥！」
Elise︰「你仲想唔想同我阿哥繼續拍拖！」
Rachel︰「我點會唔想？我依家做緊嘅嘢，就係想令佢知道，我係好在乎佢！」
Elise︰「係，我知！阿哥呢幾日好唔開心呀，你做乜一個電話都冇打過俾佢？」
Rachel︰「佢當時已經認定咗我仲鍾意我個同事，我講咩都冇用！我只係想用第二個方式去表達我對佢嘅愛！」
看來Rachel正準備做某些事情，去表達自己是喜歡Edan的信息。
Elise︰「既然你咁講，你可唔可以即刻揼咗個風筒去？」
Rachel︰「如果你認為我有需要咁做，我今晚返屋企就揼咗佢！」
聽到Rachel的承諾，Elise相信Rachel是一心一意去對待Edan，終於放下心頭大石。
Elise︰「你呀，知唔知點解你咁在乎嗰個男仔嘅嘢呀？」
Rachel︰「我知就唔使煩咗我咁耐啦！連我自己都唔知，唔通你會知？」
Elise︰「我梗係知啦，我哋識咗咁多年，你嘅性格我點會唔知喎！」
一直以來，Rachel都是一個敢愛敢恨的人，喜歡一個人的話，就會全情投入，不顧一切也要跟喜歡的人在一起。所以，之前的三段感情，都是她做主動去追求那三位男生，而且非要追到手不可。
阿康是第一個拒絕她的人。以她一貫的好勝心，她不會輕言放棄，先以退為進跟阿康保持朋友關係，日後再伺機捲土重來。但她慢慢發現，阿康擁有現今社會近乎絕跡的單純性格，漸漸令她改變初衷，而且阿康對Athena的態度近乎痴心，她自知自己根本沒有任何機會。所以，她決心忘記阿康，重新接受其他人的愛。
不竟Rachel也只是一個平凡的女生，對於一些自己得不到的東西，會有一種「得不到的永遠是最好」的心態，潛藏在她心深處。她可能已一早放下阿康，但心底裡仍有不服輸的心態，對他的事物也特別在意。
Rachel︰「我份人有咁好勝嘅咩？我唔覺喎！」
Elise︰「你話唔覺咪唔覺囉！你呀，快啲同我氹返阿哥呀，如果再令佢傷心，我就要同你玩絕交㗎喇！」
Rachel︰「知喇！」
回家後，Rachel坐言起行，立即衝入浴室，將阿康送給她的風筒丟掉。