《平行軌跡》: Episode 19 - 囍宴樂隊
「有天我合上眼 放聲唱著這歌 讓我請每個在座見證祝福你我
有星數萬千顆 哪需放著煙火 想夢想海邊某個夜 等一刻聽你說願屬我」
「演奏完畢。」這是阿杰的習慣，每完成一支歌曲的表演，都會加上演奏完畢四個大字，隨後再加上一個鞠躬。歡呼聲響切全場，但不知道有多少是給阿杰的，只因在婚宴場合，沒有多少人專注在樂隊表演身上，何況現在說的是上百圍的酒席。
鞠躬過後，阿杰那個「即將結婚」的朋友走上前致謝，其衣著雖然算是正式衣著，卻沒有一絲像新郎的味道。
「真係唔該晒你！果然係天才！今晚好彩有你咋！」他雙手用力拍阿杰的膊頭，配以一副燦爛笑容差點要將阿杰溶掉。
「唔駛客氣…不過我估唔到…」其實阿杰心裡的一句卻是：「一日都係阿妹！」
「哈哈！你以為係我結婚哩？好多人都係咁講呀，邊有人估到會係一對八十幾九十歲嘅公公婆婆搞婚宴呀？唔怕話你知，如果唔係我哋成家人迫佢哋，佢哋都唔肯搞呀。」這個朋友喜歡長篇大論，不斷細說的同時，阿杰根本就沒留心聽。
阿杰四周張望，好像在找什麼似的，然後視線被一條粉紅色連身裙吸引住，正要細看之際，連人帶裙消失於阿杰眼前。
「阿杰！阿杰！」那名朋友呼叫著阿杰的名字。
「…吓？」阿杰的靈魂被強行拉回軀殼。
「我話唔阻你，你繼續表演啦。再一次多謝你！」說畢就匆匆趕往另一處張羅。
阿杰隨即跟其他樂手商量要表演的歌曲，雖然幾人只是臨時拉夫，但夾起來都有板有眼，效果不俗。Live Band再度演唱了三首歌曲，直至開席前一刻……
「小●櫻！」站在正執拾樂器的阿杰面前，是一名皮膚黝黑，帶一頭清新短髮，跟阿杰身高相若的女孩。一身深藍色長裙雖然掩蓋她的活力，卻流露出她的女性味道，不失韻味。
「…？」阿杰疑惑地抬起頭，沒有作出回應。
「死人頭你咁快唔記得我啦？」這位亭亭玉立少女瞪著一雙亮晶晶的渾圓眼睛，直視著阿杰。
「妳係…小●郎？！妳真係小郎？！」看到那雙眼睛和那副語氣，阿杰才驟然醒起對方的身份。看到對方窈窕的身形，阿杰實在不敢相信。
「哎…係咪好驚喜呢？好耐無見啦衰人！你手結他依然係咁出色！」少女儀態也不顧，興奮得又跳又彈，還給阿杰來一個擁抱。
「咦…妳又會喺度嘅？」阿杰一邊問，一邊拉開少女的手，讓雙方保持距離。
「你朋友請我嚟囉，而家走嚕。」少女說畢就拉著阿杰的手，拔退就跑，二人從表演場地跑到宴會廳中央，又由宴會廳中央跑到酒樓門口，再走到街上不斷跑呀跑，直到面前是一條向上的長長的樓梯，少女依然拉著阿杰，並在樓梯坐下。
「嗄…嗄…嗄…妳傻咗咩無啦啦拉住我走出嚟…」阿杰上氣不接下氣。
「我好掛住好掛住好掛住你呀！！！」又是一個強勁的擁抱，差點讓阿杰窒息。
「喂…喂！妳幾時返咗嚟架？」阿杰勉強推開少女。
「返嚟一個禮拜左右啦，估唔到咁快就可以見返你。」少女依然是一副燦爛的笑容：「我真係超掛住超掛住你彈結他個樣，仲有唱歌個死人款囉！」
「妳幾掛住都無用，今日唔係我阿妹過我一棟，我都唔會表演，亦都唔會喺度出現，亦都唔會咁樣撞返妳。」雖然阿杰的技藝依舊出色，其實心裡仍是唏噓，不願主動拿起結他。
「吓…點解呀……快啲講！我去咗澳洲呢幾年發生咩事！！！」這位少女的全名叫易思郎，是比阿杰細一年的中學師妹，她中學畢業之前就已經前往澳洲讀書。就讀中學期間，她是阿杰的全職擁躉，不論是歌唱比賽表演，街頭表演，甚至只是日常練習，她都抽時間捧場，兩人逐漸建立非一般的友誼。
「係咁嘅…其實我同以前女朋友開始之前，佢已經話唔想我玩結他，我亦都應承咗佢，直到果日…」事情的來龍去脈Yuki知，Vincent知，連Shirley也略知一二，所以阿杰也不怕和盤托出。
「我講過幾多次，我唔鍾意人玩結他，更加唔想見到我條仔玩結他？你係咪想分手？」
「唔好咁啦…我已經聽晒妳講平時唔再掂佢架喇，每年都係呢一日先會拎出嚟向佢致敬姐…真係唔可以通融吓？」
「一日都唔得，一個鐘都唔得，一分鐘都唔得，一秒都唔得！總之我唔要見到你拎住支結他！！」
「之後我就真係再無拎起支結他嚕，其實由始至終，我都唔明白點解佢咁憎結他。不過，結果…都未到下一年，佢就已經飛咗我，而且都唔關結他事。」阿杰忪忪肩，垂下頭，深深的嘆了一口氣。
「睇死你就算無分手，你果日都會拎住支結他周街走。」小郎指著阿杰，一副很了解他的樣子。
「哈…所以就俾阿妹捉到我拎咗支結他出嚟囉…」
「咁都好啲，起碼我親愛嘅小櫻依然都係果個小櫻，你果粒熾熱嘅心依然係咁熾熱。我仲可以繼續做你嘅小粉絲。」說起小粉絲的時候，小郎的笑容加添了幾分甜美。
「唔使客氣喇，我諗住聽日就賣咗支結他，咁我就唔使再俾我個妹跣我。」阿杰這麼決絕的原因，全因為這一刻的他希望追求安穩，又正好他的事業順利發展，致令他的心也傾向工作。
「唔得！唔俾唔俾唔俾！」小郎一手搶走結他，並將一個硬幣交給阿杰：「個結他而家我買咗！咁你就無得亂咁賣俾人啦。」
「唉…點解個個都迫我…」其他人的鼓勵，這一刻都變成壓力，讓阿杰感到落寞。
「你放低？你放得低？你知唔知你頭先唱歌彈結他個表情，同你以前個樣一模一樣？你放低？你放低咗個樣仲會咁有熱誠？」攬著結他的小郎有點動氣。
「妳俾返我先啦，我真係無動力再玩…」
「我認識嘅小櫻唔係咁嘅人喎。」
「妳就當佢已經死咗，喺妳面前嘅已經係另一個人。」
「喂！而家又唔係叫你當飯食，得閒玩一次半次俾我睇都得啩。」小郎激動得差點要將整個結他袋丟在地上。
阿杰低下頭，不願再作任何反應。
「衰人衰人衰人衰人衰人！遲啲再同你算帳！」小郎氣沖沖地離開，還真的把結他也一起帶走，只剩阿杰一個人獨坐樓梯沉思。
（Next：Episode 20 - 姊妹）