《平行軌跡》: Episode 20 - 姊妹

「我返嚟啦！」小郎一臉通紅，連同背上阿杰的結他氣沖沖地衝進房中，「嘭」的一聲，房門隨之關閉。
 
「妹，做咩事呀妳？唔係去飲架咩？」大聲呼叫小郎的是Tiffany。
 
「無事呀！唔使理我！」雖然口說沒事，實際上她正在咬牙切齒，為阿杰的吊兒郎當在發怒。
 
「妳阿妹？無聽妳講過嘅？真係唔使理佢？佢好似好嬲喎？」在Tiffany家裡地下坐著的是Shirley，她被Tiffany呼喚到她的家來一起製作馬卡龍。
 
「啊，我識妳果陣佢已經飛咗去澳洲啦，話時話佢好似係妳中學師妹嚟，話唔定妳一早識佢。佢周不時都係咁架，慣晒架喇，由得佢一陣自然會靜落嚟架喇。」Tiffany氣定神閒，滿不在乎地看著雜誌。
 


「唔識喎…或者我啲friend就會識嘅…喂，一陣要揾埋佢出嚟試味架！」Shirley對自己的製成品抱有期待，希望能快點一試自己的手勢。
 
「喺呢個時候…我有個重大消息要宣佈！我要結婚喇！」原來除了馬卡龍，今天Tiffany還要向Shirley宣佈婚訊。
 
「妳個衰婆丫，咁突然嘅，幾時丫？終於俾我等到呢一日啦，恭喜妳丫！」Shirley攬著Tiffany，恭賀她的喜訊。
 
「我哋諗住喺相識十週年果日…搞個最夢幻…最童話嘅婚禮！嗱，預咗妳做伴娘架喇。」Tiffany甜蜜的樣子讓人感覺有蜜糖要從她的五官流出來一樣，Shirley想不到原來平時由打扮到思想都很男性化的姐妹，內心會這麼憧憬一個浪漫的婚禮。
 
「妳試下唔俾我做伴娘丫，反面添丫。」Shirley雙手輕力搣了Tiffany的臉一下。
 


「哎呀呀呀…好痛好痛…咁鬼暴力架妳，幾時到妳呀衰婆？」Tiffany施以拳頭還擊。
 
「唉…我都唔知丫…」話題落到Shirley的感情上，她一時間變得落寞起來。
 
「做咩呀，妳兩個仲未好返咩？」
 
「我同佢之前一路都無鬧過交架…就係上次睇完波…嘈咗兩句，之後就唔知做乜嘢…行街又鬧交…食嘢又鬧交…去玩又鬧交…連搭咩車都可以鬧交…」一說起自己跟Vincent，Shirley就很無力，軟癱在Tiffany身上。
 
「傻瓜，無嘢架喎，有邊個對情侶無鬧過交先得架？我同佢咪又係鬧鬧吓鬧返嚟，妳都聽我哭訴過好多好多次啦，係咪？」
 


「唔知丫…但我個心真係好唔舒服，好擔心丫。我以為我同佢會一直都好恩愛，唔會有任何風浪架…唔單止咁丫，呢排佢仲會三日唔埋兩日就唔見人，電話又成日打唔通，Message又唔覆喎，今日又全日都揾佢唔到喇，唔係…應該話我哋成個禮拜一句完整說話都無講過喇…都唔知佢做咩事…妳話呢…佢會唔會已經唔鍾意我喇？」說著說著，眼淚不知不覺流下來。
 
「唔准亂諗嘢，妳係公主嚟架嘛，王子最終都會喺妳身邊保護妳，愛鍚妳同埋陪伴妳，知唔知？妳仲要好好保養，做我最靚最親愛嘅公主伴娘！」其實Shirley從來沒有自認作公主，只是身邊的人都覺得她特別有公主氣質，所以Shirley有朋友間也有一個公主的外號，和她相處也很自然地對她相讓。
 
「嗯…唯求好姊妹，抱我一抱，唯有我聽過妳對我哭訴，蜜運後又離又合，苦心得好報…恭喜多妳一次啦！快啲俾多個愛的抱抱我！」
 
「叮！」焗爐的聲音響起。
 
「夠喇喂，啲馬卡龍整好喇。妹！快啲出嚟啦，有好嘢益妳呀！」Tiffany一手推開Shirley。
 
「有咩益我丫，想揾我做白老鼠之嘛。快啲拎出嚟啦。」小郎雖然口裡有點不屑，卻以穿梭機的速度走進廚房。
 
「駛唔駛咁心急呀白老鼠，等我拎對手套先啦。睇熱呀死妹釘！」Tiffany小心翼翼地從焗爐拿出那些馬卡龍，小郎急不及待拿了一件，只是咬了一口，感覺不太對勁。
 
「得…得…我…有啲事出一出去，你哋慢慢。」小郎以迅雷不及掩耳的速度逃離現場，以免被問及對馬卡龍的評價。


 
「嘩妳使唔使咁呀，咁夜仲出去？Shirley，我哋唔好理佢。」Tiffany選了綠茶味，而Shirley則選擇士多啤梨味。
 
二人嚐了一口之後，便異口同聲：「好硬…」
 
「我哋要再研究吓邊度出咗問題，豈有此理丫。」Tiffany很不服氣。
 
「下次啦，夜喇，我返屋企先喇，Bye bye！」現在已夜深，所以Shirley還是要趕鐵路回家。
 
連日來的吵鬧，讓Shirley開始質疑，Vincent是否自己的真命天子，是否還要等總有天找到一個，真的值得我？
 
她渾然不覺自己的電話正響起。
 
（Episode 21 - 十面埋伏）