《平行軌跡》: Episode 30 - 那邊見
「其實我有個女，佢本來應該……同妳差唔多大。」在這個休憩用地的長凳上，坐著傲雲和阿雪，而旁邊的建築物……是一棟醫院。
「吓……」阿雪的反應呆若木雞，在她眼中，傲雲不像是已經生兒育女的人。
「呢幅係全家幅。」接著從銀包中展示出一張相，一張似曾相識的相片。
「個女仔……同埋幅相……」
「妳都覺得好似妳？呢一幅，就係之前喺漫畫入面果一幅相。」相內的中年男人應該就是傲雲，明顯比現實的他年輕一點，現在的他一身都是滄桑感。
「咁你個女而家……？」關於父女的話題，勾起阿雪的好奇心。
「佢喺兩年前，因為一次交通意外，已經唔喺度。」有些人太早了斷，有些人去得太突然。
「哎…對唔住啊。」
「唔緊要，呢件事我都想一次過講俾妳知。自從喺個群組入面見到妳張相，我差啲以為，我個女未死。」
「所以，你當咗我……係你個女嘅代替品？」
「好對唔住，我諗係。以前我應承過阿女，如果佢考試拎到第一，就會帶佢去迪士尼玩。不過，自此之後，我為咗公司生意四圍頻撲，無好好照顧佢同佢媽咪。莫講話迪士尼，一年入面，我可能只係能夠同佢哋過一啲大時大節，見面嘅時間都唔多。呢一張全家幅，有十年歷史，但亦都係最後一張全家幅。」有些承諾講了廿年，有些遊戲玩到一半，未完。也只能那邊見。
「即係……去迪士尼其實係為咗補償？」
「唔單止咁，買嘢送俾妳，我諗都係一種心理補償。到頭來發現，原來我根本唔識得點樣去愛護屋企人。妳會唔會怪我？」
「唔會啊……」對於自細就沒有爸爸媽媽的阿雪來說，傲雲突如其來的關顧反而讓她有更深一層體會：「係喇，其實今日你想帶我見嘅係邊個啊？」
「我老婆。」傲雲深深吸了一口氣：「自從兩年前阿女意外過身，老婆就患咗抑鬱症，我亦都辭咗原本份工，希望可以多啲時間陪到佢。奈何佢病情一直都無好轉，前排仲因為服食過量藥物入咗院，所以呢一段時間全心全意照顧我老婆，我連電話無電都唔知，而家情況穩定返少少，但仲要留院觀察多一段時間。」
「但係……佢見到我之後會唔會觸景傷情，情況更加差？」阿雪這樣問，原因是考慮到自己的樣子跟傲雲的女兒這麼相像。
「我只係唯有咩都做吓，如果你介意，我唔會迫妳。」
「我想見佢。」阿雪神情突然變得堅定起來：「其實……我自細就已經無爸爸媽媽喺身邊照顧我，我一直都唔知道父愛同母愛究竟係咩一回事。就算之前你帶我迪士尼玩，去買嘢……雖然係有一種難以言喻嘅感覺，但係我一直都分唔到，呢一種究竟係咩感覺。哈哈……我曾經諗過，我係咪鍾意咗你呢？睇嚟唔係喇。傲雲叔叔。」
「雖然你知道我曾經有個女同妳差唔多年紀，但妳都唔需要改口改得咁快。」
「嘻…我只係學櫻雨妹妹嘅叫法咋嘛。」
「我仲諗住可以享受多啲年輕嘅感覺。算啦，我哋上去。」
甫打開門，阿雪赫然發現這是一個單人病房。裝潢也甚是精緻，她不禁在心裡「嘩」了一聲。
「老婆，我帶咗個人嚟見妳。」
躺在床上的女人正在往窗外看，聽到傲雲的呼叫，一轉頭便看到阿雪。
「阿女……阿女！」預期之內的反應，她第一眼便以為阿雪是自己的女兒。
阿雪見狀也快步走向病床，以免女人的反應過大而造成什麼損傷。
「姨姨，妳冷靜啲先。」
冷靜下來，仔細一看，原來還是有點分別。
「我只係傲雲叔叔嘅朋友。佢講晒你咃嘅經歷俾我知喇，雖然傲雲叔叔無講到佢想我嚟做啲咩，但當我聽完你哋嘅事之後，心入面，腦海裡面，突然間有好多畫面。我自細就已經無爸爸媽媽，我未必完全明白失去至親嘅感受，但我知道，我媽媽唔會想我唔開心咁面對呢個現實。同樣，妳囡囡都唔會想妳咁傷心架。我知道，佢哋只係喺另一個世界，開開心心咁過緊另一種生活。我哋要同佢哋一樣，努力生活。」原來沒更好的一邊，行前行後只差一線，時辰來又怎可挑戰，自然閤眼衝線。
傲雲的妻子靜默下來。
「我哋要好好珍惜，我哋仲喺呢個世界嘅日子。因為我哋有責任，有責任去代替佢哋去完成呢一邊嘅生活，咁樣佢哋先唔會再有遺憾。」回頭學會珍惜今天，無暇停下表演幽怨，時辰來若不可扭轉，自然愉快衝線。
「…阿女……阿女！」似乎阿雪的說話不太有效，傲雲的妻子還是不受控地大哭著。
「阿雪，你出返去先。」這時候，傲雲出手安撫妻子的情緒。
阿雪被「趕」出病房後，回想剛剛自己的說話，她想不到自己竟然會說出這些也不知算不算鼓勵的說話。她坐在走廊，嘗試去想像自己父母的事，良久，又發現原來是多麼虛無飄渺。
「阿雪，妳無嘢嘛？」過了一段時間，阿雪想得入神之際，傲雲出來看到表情呆滯的阿雪，呼叫了數次也沒回應，便拍拍她的賻頭，她立時醒了過來。
「無……無事啊，我諗嘢諗得太入神。係呢？妳老婆佢……無事嘛？」
「佢無事，已經瞓咗，我哋邊行邊講。」
「唔好意思啊……好似幫唔到你添。」
「唔好咁講，妳肯幫我已經係我嘅幸運。係喇我都未同妳介紹，我老婆鍾意人叫佢Windy，下次再有機會可以咁樣叫佢。」
「下次？你唔怕……」阿雪擔心會出現剛才的情況。
「我頭先同佢解釋咗，應該無問題。妳唔想？」
「我想，我想！我仲想日日都嚟探Windy姨姨。」
「多謝妳。不過如果有咩突發事情，一定要通知我。」
「無問題！」
（Next：Episode 31 - 神啊！求求讓我睡）