《平行軌跡》: Episode 37 - 陪著我走

就算回憶多麼細膩，結束真太好奇，讓我忘記從前共你，遊歷那回味。
 
這本日記簿，記載著Vincent跟Shirley由相識的一天開始十年來的一點一滴。每一次見面，每一次談話，每一次遊戲，每一次邂逅，每一次約會，每一次承諾，每一次，每一次。如果將裡面一字一句編成書，可能會成為一本甜蜜動人的愛情小說。
 
這一夜，Shirley的爸爸媽媽去了旅行，留下Shirley一人在家，她拿出這本充滿回憶的日記簿，但她不敢打開，只敢呆呆地盯著硬皮封面。
 
突然眼前一黑，全屋電器關閉，全屋燈光熄滅，恐怕是突發停電。Shirley比想像中冷靜，沒有大呼小叫，可能因為她是幼稚園教師，某些時候也要堅強起來吧。神奇地，Shirley家裡不單有蠟燭，也有火機，連燭台也有一個。她不慌不忙地把蠟燭點燃，放在飯廳的長桌上。
 
蠟燭燃起的一瞬間，柔光陪我緊閉著眼，仍幻覺共你燭光晚餐。
 


「好！為咗慶祝本公主第五十次勝利，今晚要整大餐！」
 
「我唔識煮架喎，怕唔怕毒親妳呀？」
 
「絕對唔會，我煮，你食。」
 
「咁都算懲罰？直頭想益我啦。」
 
「如果你食完都仲覺得係獎勵嘅話，我會好開心，哈哈。」
 


「唔…我係咪有需要帶個滅火筒去妳度？」
 
「唔好食還唔好食，危險還危險，兩回事嚟架！今晚見啦！」
 
…
 
「傻佬！你做咩帶埋個燭台上嚟丫？」
 
「燭光晚餐先有情趣架嘛，點呀，新西蘭肉眼扒定食巴西豬扒？我要七成熟淋啲紅酒上去添呀唔該。」
 


「錯。係蓄茄炒蛋，京都骨同埋西蘭花炒蝦仁。白飯唔係任裝，因為我整唔到太多。」
 
「呢啲就係大餐？我阿媽都識煮喎，間唔中都有得食啦。」
 
「咁你有無食過我整果啲丫？無丫嘛，咁咪大餐囉。你睇你個傻佬整個燭台為咩丫。」
 
「唔緊要，照點可也，氣氛照樣嘅姐。」
 
「快啲幫手開飯唔好掛住啲蠟燭丫。」
 
「知道。」
 
…
 
「其實個天仲好紅丫，駛唔駛點蠟燭丫。」


 
「氣氛嘅嘢有同無爭好遠架。」
 
「呢個燭台同枱面嘅嘢爭得仲遠丫。你快啲食丫，睇吓好唔好食。」
 
…
 
此刻碰巧也是夕陽西下，天色漸沉，黃昏了過後，鳥兒停飛，風箏飄落地，斷了線的風箏不再飛翔，獨個兒在地上默默躺著。
 
「糖同鹽都唔識分，豉油份量又錯，啲西蘭花仲要硬過骨頭，咁都死頂，真係服咗佢……」
 
雖然Shirley膽量足以應付停電的一剎，然而時間一久，不安感覺還是會驟然而生。無助間，她當然第一時間想起Vincent，但現在再找他好像厚面皮了一點。
 
這時候，她突然想起楊老師，還有他提出的賭局。雖然她沒有把賭局放在心上，但思前想後，這個賭局如果成立，算自已贏還是他贏呢？雖然電話是收到了，但一句對話也沒有，只有對不起，還有掛線後的……訊息。想到這裡，負面情緒又突襲過來。回憶這利器，逼我念記，熱吻中的你，沉澱了幾多快樂留下讓我細膩，陪著我走幾公里，陪著我走只得這日記。
 


這本日記簿充滿的不單是自己跟Vincent的回憶，原來更充滿成長的回憶，她不忍再看到以前的種種，便迅速把它收好，平靜心神，然而變得漆黑的飯廳讓她更加不安。
 
最終，她還是逃離停電的家，尋找一個暫時的歸宿，不經不覺來到Tiffany的住處。
 
「芊芊姐姐？妳搵家姐？」應門的是小郎，一身睡衣打扮。
 
「丫？哎丫……」Shirley好像發現了一件事。
 
「妳梗係唔記得家姐去咗旅行喇。」
 
「係喎……唔好意思丫阻到妳添。」
 
「唔緊要，既然嚟到入嚟坐吓先啦。」小郎露出親切的微笑。
 
「嗯，唔該妳。」脫下長boot，Shirley急不及待奔到梳化躺下。


 
「芊芊姐姐，咁突然上嚟嘅？有急事搵家姐？」
 
「唔係丫…我屋企突然間停電，唔知幾時先有返電，我…有啲驚。」Shirley一臉害羞地說。
 
「咁不如妳今晚喺度瞓一晚啦？」小郎的態度出乎意料地熱烈：「橫掂小櫻個妹呢排都喺度住，我哋今晚仲可以一齊傾偈！」
 
「唔怕阻到妳哋咩？」說話時已攬著梳化上的小熊攬枕。
 
「怕妳唔理我哋咋。」
 
此時傳來開門的聲音。
 
「Yuki就講就返喇。」
 


甫開門，便見到痛哭中的Yuki飛撲向小郎。
 
「個賤人……個賤人原來剩係諗住搞我！我頭先喺佢屋企…爭啲就……嗚……」
 
聽到這個哭訴，Shirley聯想起當日看世界盃的情境。
 
屋內由三個女人，一個淚人，轉眼間變成三個女人，兩個淚人。
 
關於Yuki的事，小郎覺得事態嚴重，遂立即致電給阿杰。同時也盡力安撫兩個在痛哭的朋友。
 
「小櫻，你個妹喊得好緊要，我搞唔掂，速來我屋企。」
 
（Next：Episode 38 - 兩大無猜）