《平行軌跡》: Episode 36 - 陪著妳走

傲雲懷著戰戰兢兢的心情步進醫院，今天是Windy預定出院的日子，但他仍然擔心妻子的身體狀況，是否真的能夠應付出院後的生活？會否再次想不通然後做出可以導致入院的舉動？在他走近妻子的私人病房，正要打開門的一刻，事實告訴他，他的擔憂似乎是多餘的。
 
「哈哈哈哈…佢兩個真係歡喜冤家嚟架喎。」
 
「係啊係啊！所以我就專登畫咗幅畫，係佢兩個對望嘅樣，但係唔同角度睇呢，就會出現鬧交或者溫馨嘅畫面，好得意架！」
 
「好，咁妳一定要帶我去佢哋間茶餐廳，食馳名菠蘿油！仲有新鮮出爐蛋撻！」
 
「求之不得啦！係喎，其實我都唔知妳幾時出得院？」
 


「Windy今日就出得院喇。」偷聽了好一會兒，傲雲終於現身。
 
「老公，咁早嘅？」Windy笑逐顏開，情緒明顯有好轉。
 
「傲雲叔叔，我啱啱同Windy姨姨講緊Auntie Angel 同埋 Uncle Demon嘅好笑嘢啊，諗返都覺得好笑，哈哈哈哈…」看來Windy的情緒是被阿雪所帶動的，看見兩人志趣相投，傲雲像是放下了心頭大石，一個糾結多時的家庭問題似乎終於顯露了曙光。
 
「唔得，忍唔住，你哋傾住先，我要交水費。」說罷Windy便走進病房的獨立洗手間。
 
「阿雪，多謝妳，雖然我唔知道，妳係點樣令到我老婆開心返。」雖然語氣仍然保持平日一般的冷靜，但傲雲的面部表情出賣了他，他的喜悅心情已經不能用言語去形容。
 


「嗯…其實我都唔知架，都係分享一下我自己嘅事，講吓最近嘅新聞，可能呢兩個星期日日都同佢傾好耐偈，令到佢心情都開朗啲卦。」
 
「日日？」
 
「係啊，我同Auntie Angel講呢排有嘢忙，等我可以返少啲茶餐廳，多啲陪Windy阿姨。」
 
「真係估唔到，真係唔知點樣多謝妳。」
 
「唔駛咁客氣啦，我可以一邊傾偈一邊畫畫都唔錯架，你睇，我畫Windy阿姨係咪畫得好神似呢？係啊，呢幾日阿姨都有同我講你哋嘅事，我覺得佢都係好在意，好想同你有個完整家庭，其實你有無諗過再同阿姨生一個？」阿雪拿起一幅又一幅Windy的畫像，興高采烈地說。
 


「竟然係咁？佢無同我講過……我諗我要同佢傾吓。」
 
就算多麼親密的人，也可能會有不了解的事情。不知道並不是錯，只是對方可能怕你知道的後果會不好，也可能是不知道怎樣開口而已。有時候，跟第三者說起心頭大石，比起跟親密的人說反而更容易，面對著自己最親的人，有時反而開不了口。這一次阿雪跟Windy相識而令抑鬱症好轉，可算是歪打正著的一步。
 
「我覺得…其實你哋兩個都尚算係盛年，再生應該都無問題嘅！希望你哋達成到共識啦！」
 
「阿雪……好多謝妳，多謝妳為我哋兩夫婦做咁多，真係唔知點報答妳。」傲雲一雙巨手抓著阿雪雙手，傲雲雙手比想像中要大許多。
 
「太客氣啦，反正我有的是時間，唔緊要啦。」阿雪兩頰通紅害羞地說，同時，她又瞥到傲雲左手無名指的戒指，才又想起Yuki對自己說的話：「係啊，櫻雨妹妹話我哋幾個應該要搞一次gathering交流心得，你平時有無同火艷神聯絡架？」
 
「無。我覺得佢好神秘，好似唔太想我哋知道佢任何嘢。不過我哋可以照樣試吓約。」
 
「你哋傾緊咩呢？傾到咁入神咁款嘅？」Windy生龍活虎，現在的她活像一個小女孩，一點都不像生過一個十多歲女兒的媽媽。
 
「我哋傾緊一啲畫漫畫上嘅嘢。阿雪，其實我有個建議想俾妳，我一路都有留意到，妳好擅長畫頭像，但係漫畫情節上就有些少缺漏，或者可以話係唔夠充實，呢樣好可能係同妳生活上經歷過嘅事情唔足夠有關。妳會唔會考慮試吓街頭幫人畫頭像？可以收少量報酬，同時間要求對方講一啲生活俾妳聽，等妳可以知道其他人生活喺同一個地方，係可以有唔同嘅生活，咁樣或者可以令到妳畫嘅嘢題材更豐富，又可以幫補一下生計。」


 
「嘩……有無危險架？佢話晒都係一個女仔喎？」Windy搶在阿雪回應前說話表示擔憂，語氣差不多在擔心女兒的安危。
 
「呢方面可以放心，如果阿雪真係有興趣，佢可以去海傍附近，我有唔少相熟朋友喺果邊幫人影相，應該唔會有咩危險。」
 
「我諗我會想試吓啊，不過可能要同Auntie Angel傾吓返茶餐廳嘅安排先。」
 
「阿雪，妳係時候諗吓究竟係咪全心全意去畫漫畫呢個方向發展，因為要做得好，可能要放好多時間喺呢一方面，花費嘅時間可能比妳想像中多好多好多，妳要諗吓自己係咪真係能夠承受得到，同埋係咪真係負擔得到妳嘅生活開支。當然，如果妳生活有咩困難，可以隨時搵我哋，我哋隨時都可以幫到妳。」正所謂在家靠公母，出外靠朋友，現在阿雪跟傲雲既像父女，又像朋友。
 
「嗯…肚餓添，我去買啲嘢食先！你哋傾住先！」事實上，阿雪只是找個藉口離開現場，一來她一時間思緒混亂，想不到一個確實答案，二來她覺得自己阻礙了傲雲夫妻相聚的時間，於是走出門外，偷看兩人。
 
「老婆，呢段日子真係辛苦妳。」
 
「傻啦，你都唔想，係我唔夠堅強。」
 


「原來，不經不覺，我哋差唔多結咗婚二十年。」
 
「係啦，如果阿女仲在生…佢都成年，大個女嚕…」
 
「老婆，我唔會再留低妳一個，以後每一分每一秒，我都要陪住妳。」誰說，時間片刻變陳舊，全為我分秒亦停留。
 
「老公…」因我，身邊有妳緊握我的手。
 
「我哋兩個要白頭到老。」愛，誰說永不會長壽，陪著妳一生到白頭，都能把心中星星閃得通透。
 
「嗯！最難過嘅已經過去，我哋要為未來而再努力！」陪著妳走，一生一世也不分。
 
「無論有咩事，我哋都可以擕手解決。」天天編出兩雙足印，過千山過千海。
 
「…」Windy已經忍不住淚水，但這一次的淚水，可以肯定是喜極而泣。如果走到這世界邊端，我倆已是無力前行，跟我一起飛去。


 
「老婆，妳覺得阿女在天之靈，會唔會想有個細佬或者妹妹？」傲雲隨手拿起紙巾，幫Windy抹去淚水。
 
Windy先是一愕，然後又會心微笑：「一定係阿雪個衰妹講架啦。」
 
「啪啪啪啪啪…」房門外突然傳出一些拍手聲，是阿雪。
 
「恭喜兩位！」
 
「妳真係貪玩。」連一向不苟言笑的傲雲，都露出一絲笑容。
 
「哈哈，起碼我已經聽到一個經歷，答出我感受生活嘅一大步。」阿雪一臉自信的笑臉，似乎已經有心理準備在街頭幫人畫頭像。
 
「好喇！傾咁耐乜都執好啦，我要出院啦！」Windy極度興奮，像是要把過去幾年的限額都要取回來用一般。
 


「阿雪，祝妳成功。」在醫院門口，傲雲夫婦準備跟阿雪道別。
 
「承你貴言！我一定會畫出一套好漫畫！唔係！係好受歡迎，而且係會成為經典嘅漫畫！」三人相對望了一會，又大笑起來。
 
實現夢想的第一步，就是要行出第一步。
 
（Next：Episode 37 - 陪著我走）