回到過去，破我未婚妻個處: （21）
對方又追我揀結婚日子，仲話聽日放工約左佢屋企人食飯，叫我一齊去。
咁即係要見家長。
對方嘅阿爸阿媽我之前都見過三四次，印象中佢地好似唔太like我。
我覆佢一句「OK」，繼續忙手頭上嘅工作。
嚟到lunch time，我諗住約小曼食飯，但電話無人聽，WhatsApp佢又無覆，睇嚟可能係忙緊。
無人陪唯有就自己一個食。
聽晚要見家長，無理由就咁雙手fing fing帶梳蕉去見，點都要買啲禮物先得。
咁買咩好呢？仲記得第一次同佢地見面嗰陣，我送左兩盒鳳梨酥，佢地好似唔太鐘意，睇怕呢次要送啲再貴少少嘅禮物先得。
忙完一日，收左工我去到apm商場行下，揀禮物送俾Veronica父母。
行過某間賣燕窩嘅鋪頭，見啲燕窩禮盒做緊減價，決定就買兩盒。
比起鳳梨酥，送燕窩應該得體好多。
俾完錢行出鋪頭嗰陣，我喺遠處睄到小曼嘅身影。
佢同緊一個男仔喺商場行緊，個男仔望落好似幾靚仔。
我離遠同佢揮手打招呼，對方好似無見到我，同個男仔行左落下一層。
後尾返到屋企，我八八卦卦咁Whatsapp問佢個男仔係邊個嚟。
佢睇完藍剔左就無覆機。
奇怪，平時小曼好少睇完message唔覆我。
我想打電話過去問，諗諗下都係算數，留返睇邊日一齊食lunch，見到面先再問。
呢晚我照樣著齊衫褲鞋襪訓教，以防突然出現第三次穿越。
結果一覺訓到天光，無事發生。
第二日收左工，夜晚七點半，我應約嚟到尖沙咀某間茶樓，同Veronica以及對方嘅父母食飯。
「世伯、伯母，呢度小小心意，孝敬你地。」
我送出琴日買嘅兩份燕窩禮盒。
世伯拎上手望一望，眉頭一皺：「即食燕窩？呢隻平價嘢嚟渣喎。」
「老豆，送禮物最緊要係講份心意，輝輝咁有你心，平定貴又有咩所謂呢？」Veronica一邊幫我講說話，一邊斟茶俾佢老豆。
世伯飲一啖茶，跟住問我：「你同我個女就嚟結婚，禮金方面，你諗住俾幾多？」
「Er…呢個…」我唔知點答佢，心諗呢個年代乜仲有人收禮金架咩。
「我都知你揾得唔多架啦，所以我都唔會為難你，係咁意我收你二十八萬啦，二八二八，易發易發，幾好意頭！」
「下…甘八萬…世伯我無咁多錢…」
我聽到呢個數，心裡不禁打左個突，我個戶口夾埋都無呢個數，點俾得起呢筆錢。
「唔係呀嘛，甘八萬都無，我咁辛苦養到個女咁大，如果唔係…」
「唔好咁啦，禮金呢啲古老傳統，依家都唔興架啦，老豆你係咁意思收少少咪算囉，唔好難為輝輝啦。」Veronica打斷佢老豆講話，再次幫我解圍。
「咪係囉，個女嫁得出我地戥佢開心咪夠囉，禮金呢啲嘢隨意得啦。」伯母都幫口。
世伯悶哼一聲：「算啦算啦，二萬八啦，攞個意頭算啦。」
「真架？多謝世伯！」我鬆一口氣，道謝之餘又為對方斟茶。
「結婚日子你定左未？」世伯又問我。
「未呀。」
「我都知你未定架啦，所以我早兩日已經揾人擇左吉日，定左下個月28號你地結婚。」世伯講。
「咁快？今日係月中，下個月嘅28號，咪即係得返個半月左右？」
「輝輝，唔快架啦，我地註冊擺酒係同一日，啲嘢早排一路就已經開始準備緊。」Veronica對我講。
「咪就係，定左架啦，嗰日好日嚟，你地一於就嗰日結婚。」世伯堅持。
「不過…」
「唔好不過啦，起筷食飯啦，啲嘢食都上齊曬。」
Veronica夾舊雞俾我：「輝輝，食舊雞啦。」
「多謝…」
我咬一啖雞，心諗得返一個半月就要結婚，我點同老豆老母交代好。
仲有我都未破到Veronica個處，咁樣結婚好易出人命，今鋪真係頭痕。
夜晚八點幾九點，食完餐飯，世伯、伯母話難得出嚟尖沙咀，想到海旁散下步促進下消化，叫我送Veronica返屋企先。
我同女朋友上左一架通往沙田嘅巴士，坐到上層。
「輝輝，不如坐後邊囉？」Veronica提議坐後排。
佢本身唔太鐘意坐咁前，話感覺好危險。
我就反而鐘意坐最前，不過為左遷就女朋友，都唔介意坐後面。
坐低之後，Veronica遞佢部電話過嚟：「輝輝，早排我揀左幾個單位俾我地結婚之後住，呢幾間你睇下覺得點？」
熒幕上顯示一啲租盤嘅資料，我望左幾眼：「啲租金都幾貴，摸埋都要皮幾兩皮嘢。」
「唔算貴架啦，呢度有個馬鞍山單位，三百幾四百呎都係萬二蚊租金，已經算好抵。」Veronica掃兩下電話，show出一個位於馬鞍山單位嘅資料。
「月租一萬二千幾...我份糧睇怕負擔唔起咁多喎。」
「傻嘅，我地一齊夾份架嘛，我人工高過你，咁我咪出多啲囉。」
Veronica對我真係好好，完全一啲都唔計較。
望住一個咁好嘅佢，中學時期嘅佢份人係點，仿佛已經唔重要。
就算以前嘅佢一腳踏兩船，又或者迷戀過mk仔都好，其實都無乜所謂，反正我係同2021年嘅佢結婚，又唔係同2009年嗰一個mk妹結婚。
煩就煩在我要點樣拎到mk妹時期嘅佢個處，然後喺2021年，同眼前呢個體貼溫柔嘅佢結婚。