回到過去，破我未婚妻個處: （22）

總結兩次穿越所得經驗，我發覺十六歲嘅Veronica似乎偏好外貌mk，以及打籃球打得叻嘅男仔，因為金毛仔同Kevin兩個都係屬於呢種類型。

照咁睇，假如我要吸引十六歲嘅Veronica，咁就要變成一個打波好叻嘅mk仔。

變做mk仔唔難，只要改個髮型，換件衫就得，問題係打波打得叻就有啲難度，畢竟我係一個平時連運動都懶得做嘅人。

好彩我識得一個中學同學識打籃球，可以叫佢幫我嚟一個籃球速成班。

佢個名叫「馬騮」，中學嗰陣瘦到馬騮咁，大個左就變左個肥仔。



呢日收工我就約佢出嚟籃球場，叫佢教我打波。

「哇！你受左咩打擊嚟，無端端剪個咁嘅頭嘅？」馬騮著住Stephen Curry嘅30號波衫，頂住個大肚腩。

「呢個頭有咩問題？」我撥一撥前面執陰。

「咩年代呀大佬，邊度仲有人剪埋啲mk仔棒棒堂、飛輪海頭，再加上你都個樣都唔襯個髮型，好肉酸囉。」

「有幾肉酸呀？」



「就等於八兩金剪左個吳尊頭。」

「食蕉啦，我邊有八兩金咁樣衰。」

我琴日特登去salon，剪左個飛輪海頭。

前面依家多左一撇厚斜陰遮眼，先知點解啲mk仔咁鐘意fing撇陰，原來執陰真係好礙眼。

「話時話，無啦啦你做咩咁想學打波？」馬騮問。



「強身健體囉，唔好講咁多，你快啲教幾招絕招嚟先啦。」我心急求學。

而馬騮一開始都係教下啲基本功，例如係拍波、走籃呢啲。

唔知係我身體唔協調定係太少做運動，拍個波拍極拍唔起，走籃又踩錯步，總之就好水皮。
 
「馬騮，不如直接教我射波啦，只要我一拎到波就出手，個波『嗦』一聲穿針入左，咁咪唔洗拍波同走籃囉。」我提議直接學射三分波。

「咁唔得架喎，未學行就想學走。」馬騮話。

「得架啦，一於就教我射三分。」

要射波穿針講就容易，做起上嚟又係好難。

我跟住馬騮嘅動作學點射波，射左成晚都入唔到一球。



而我係唔會咁易放棄，接住嗰一連幾晚，一收左工就約馬騮出嚟教我打波。

三分線前跳起，出手，炒！

跳起，出手，又炒！

跳起，出手，再炒！

「算吧啦你，射極唔入，都係練返啲基本功先啦。」

馬騮狂幫我執波，齋係執波都執到佢滿頭大汗。

「無可能，nba啲人跳一跳就入到波，無理由我唔得。」我再射一球，都係唔入。



「你都識講nba，你估你打nba咩？」

我撥一撥頭髮，嬲嬲地隨手一拋，點知咁樣竟然入左。

「入左呀入左呀，馬騮，再嚟多球！」

馬騮再傳一球，然後我好似剛才咁，隨手一拋，亂咁dum個波上去，又入！

射多幾次就發現自己鳩拋仲準過認真射，射十球都中到六七球。

我撩馬騮1on1，借此實戰一下，結果我手風超順，連入幾球，輕鬆勝出。

依家嘅我可以話充滿信心，已經急不及待同Kevin一較高下。

訓覺嘅陣，我著齊全套運動裝，gel好個頭，期待穿越之後，喺十六歲嘅Veronica面前，呈現一個與別不同嘅自己。



打波打到個人攰瀨瀨，上床一瞇埋眼我就訓著左。

過左無幾耐，耳邊聽見「weeweee」聲，身體開始飄，奪目白光迎面而來。

「拍！拍！拍！」

籃球場傳來拍波嘅聲音。

我睜開雙眼，坐喺場邊嘅長櫈，又一次目睹四眼仔俾人整蠱。

我撥一撥前面執陰，起身做定熱身，準備同Kevin一較高下。

四眼仔俾人笑到面黃，落荒而逃。



到Veronica拖住Kevin返轉頭，執返張學生證嘅時候，我chok恆個樣，fing住頭髮咁出場。