回到過去，破我未婚妻個處: （32）

咁耐無見，阿德個樣都係同以前一樣，一樣咁靚仔。

「Hi，好耐…」我同小曼疊左聲。

阿德笑一笑：「呆左咁做咩，你地快過嚟坐啦。」

高佬威讓出個位俾我同阿德一齊坐。

當年考完會考，阿德過左英國讀書，計落我地都差唔多十幾年無見。



中間呢十幾年我地好少聯絡，連佢最近返左嚟香港我都唔知。

「點呀，你依家撈緊咩？」阿德問我。

「仲可以撈咩，咪又係幫人打工，你呢，喺英國過得點？」

「幾好呀，依家仲喺嗰邊讀緊master。」

「老老實實，有無溝到鬼妹先？」森仔問。



「咁仲洗問，肯定有啦，去英國唔溝鬼妹不如唔好去。」馬騮搶答。

「呢個我同意，正等於買股票，唔買Tesla不如唔好買。」高佬威加一把口。

「屌你，講女就講女，無啦啦講乜嘢股票，阿德你唔洗理佢，呢條友咁大個人，都仲係好似以前咁九唔搭八，。」

「收皮啦馬騮，你估你好好，睇下你個肚腩，仲肥個肥貓，都唔知你dup低頭，望唔望到自己條jer。」

「哈哈哈哈……」



我地幾個就好似以前咁有講有笑，互相窒下大家，又各自講下各自嘅近況。

飲飽吃醉過後，大家開開心心咁散場。

森仔同Kelly住得比較遠，早過我地走先。

高佬威、馬騮就飲到貓左，我地call左兩架uber送二人返歸。

剩低我同阿德諗住送小曼返屋企。

「你地唔洗送我，我有人嚟接。」小曼對我地講。

「嗯？邊個接你？」我問。

有一架黑色benz呢個時候停過嚟路邊，然後有一個男人落左車，行到小曼身邊。



我認得呢個男人，佢就係當日同小曼喺apm行街嗰個人。

「同你地介紹，呢個係我男朋友Eric。」小曼拖起Eric嘅手，「呢兩個就係我中學識嘅好朋友。」

原來佢就係Eric。

小曼做診所護士前，喺一間廣告公司返工。

當其時佢有個叫Eric嘅同事周不時都約佢，我仲以為佢嫌對方唔靚仔，所以唔so佢，無諗到Eric個樣原來一啲都唔差。

佢拍埋同阿德比，一啲都唔輸蝕。

Eric禮貌性地伸手同阿德握手：「Hello，你一定係阿輝。」



阿德搖搖頭，笑左笑：「我叫阿德，我隔籬呢個先係阿輝。」

「哈哈，Sorry，搞錯左。」Eric尷尬一笑，主動同我握手。

「你地一齊幾耐？」我問佢。

「Um…我諗兩個禮拜度啦。」

原來小曼同Eric拍左兩個星期拖，唔怪得呢排佢咁少覆機。

「你地點識架？」阿德問。

「我係小曼嘅舊同事，由佢第一日入公司，我第一眼見到佢，我就鐘意左佢。」Eric望住小曼，露出腼腆嘅表情。

「都夜啦，不如你兩個走先啦，Eric會送我返去。」



小曼坐上黑色benz，我同阿德目送佢離開。
 
「估唔到小曼咁多年都無變。」

「嗯？」

「都仲係咁鐘意留短頭髮。」阿德話。

「其實…當年我同…」

「仲提當年？咸豐年前嘅事仲講嚟做咩？你都就嚟結婚，小曼依家又有男朋友，我都識左鬼妹，做人要向前看，以前嘅嘢過左去就算啦。」

阿德拎左包煙出嚟：「要唔要？」



我揮手示意唔要：「你幾時開始食煙？以前落網吧打機，你唔係話最憎啲煙味架咩？」

「哈哈，係呀，不過人係會變嘅，你睇下馬騮以前瘦到碌竹咁，家下個肚仲大過啲大肚婆，再睇下森仔同Kelly，佢兩條友以前一見面就嘈交，依家糖黐豆咁...」

「仲有高佬威，條友細個滿口文言文，依家就開口埋口就講股市。或者你講得啱，人係會變嘅。」

阿德吐出煙圈：「好啦，你唔洗送我，我住個間酒店就喺後面，轉個彎就到。」

「咁你幾時返英國？」

「聽日。」

阿德又吐一口煙，隨手丟低煙頭：「放心啦，你結婚嗰餐我一定到，走啦，bye bye。」

目送完阿德離開嘅背影，我擰轉頭見到對面馬路，出現一個熟悉嘅身影。

Veronica。

佢從一間西餐廳出嚟，上左一間銀色嘅房車。

馬路中間不斷有車經過，所以我睇唔清同佢同行嘅嗰條友。

好似係男人嚟。

未嚟得切睇清楚，架銀色房車好快就駛走左。

Veronica究竟同緊咩人一齊？

好奇嘅我立即就打電話過去。