回到過去，破我未婚妻個處: （42）

《愛與死亡與我最愛的人》，一個老土嘅書名，內容都係一個老土到依家韓劇都唔會拍嘅劇情。

一個患有絕症嘅女仔與一個身負毒咒嘅男仔相戀。有一日，女仔病情惡化，需要一大筆錢去醫病，個男仔為左籌到呢筆錢，佢買左份保險，喺受保人一欄上填上女仔嘅名。

之後喺女仔唔知情，而且家人又反對嘅情況下，喺婚禮上觸碰身上嘅詛咒，最後吐血身亡。

一啲咁老土嘅情節，講緊嘅卻係我阿叔同Shirley嘅真實故事。

簽名會完左之後，我同Shirley到附近咖啡店，佢將所有嘢都話曬俾我聽。



原來，阿叔當其時唔理屋企人嘅勸阻都要同Shirley結婚，並唔係因為佢唔信邪，亦唔係因為太硬頸，而係…

唉…我都唔知點嚟形容佢。

或者要套用Shirley一句：「佢真係好傻。」

係，佢真係好傻，為左一個愛嘅人，連自己條命都唔要。

所以阿叔佢講大話，佢呃左我。佢對Shirley根本就唔係玩玩下，只係把口唔肯認，其實心入面好愛呢個女人。



Shirley話阿叔同佢求婚嗰陣，送左一本「愛的紀念冊」，裡面記錄左佢地每一日經歷嘅每一件大事小事。

直到依家，Shirley仍然去到邊都帶住本紀念冊，喺咖啡店佢拎過出俾我睇。

原來就係嗰日我上屋企，佢驚死我睇到，所以拿拿臨收埋嘅嗰一本筆記簿。

仲有，阿叔唔同人「片車」，又學人睇村上春樹，原來都係因為Shirley。

佢對呢個女人唔係玩玩下，而係真心喜歡。



佢口口聲聲唔信個詛咒係真，但我相信喺婚禮嗰一日，心入面佢係希望個詛咒係真。

同非處女結婚會死，屬於意外身亡，保險應該會賠好多，

結果佢離世後，保險公司賠左五百萬俾Shirley。

事前Shirley毫不知情，完全唔知發生左事，直至睇到阿叔留俾佢嘅遺書。

阿叔喺信中同佢交代曬所有嘢，叫佢帶住筆錢過美國醫病。

Shirley拉高手袖，展示俾我睇手腕上嘅數條割痕。

睇得出上面嘅傷痕，完全唔係mk妹玩泥沙𠝹嗰種傷口。

佢一度傷心過度，試過割脈自殺，後來諗通左先放棄自殺嘅念頭，選擇好好活下去，唔想辜負阿叔嘅心意。



後來好好彩，佢個病痊愈好返，後來移居去台灣，為左紀念阿叔，佢用左阿叔嘅真名做筆名。

每一年生忌死忌都會返嚟拜阿叔，只係每次都押後一日。

因為佢好驚撞到我地，佢覺得係自己害死左阿叔，無面目面對我地鍾家。

佢話佢欠左我地一句對唔住。

「對唔住。」

佢紅著眼圈，忍住眼淚講曬阿叔嘅事出嚟，最後同我講左聲對唔住。

同一時間，透明嘅淚水再都止不住，偷偷從眼角流出。



見佢泣不成聲，我鼻子一酸，忍唔住流左幾行眼淚。

其實佢無對邊個唔住，反而我相信，阿叔喺上面見到佢依家生活得咁好，一定唔會後悔自己曾經做過嘅決定。

咪住…

既然我穿越到返去2009年，或者我有方法可以令阿叔唔洗死…

方法仲要好簡單，只要俾個六合彩冧巴佢，佢買完中左，咪可以拎筆錢俾Shirley醫病。

本身Shirley結過婚，阿叔又喺浪子性格，我諗佢地都唔會理一紙婚書呢啲無謂嘢，只要阿叔有錢救Shirley，佢地應該可以繼續一齊但唔結婚。

係咁就掂啦！我即刻上網揾返2009年12月22號，嗰一期嘅六合彩號碼，mark低落部電話度。

跟住我打俾老豆，想同佢講當年阿叔並非死牛一邊頸，唔肯聽佢勸說，當中其實係另有原因。



但唔知佢係咪仲嬲緊我，都唔肯聽我電話。

夜色已深，我唔敢返屋企，又唔想再打擾小曼，本來想揾Veronica收留，諗諗下覺得都係費事阻住世伯伯母，諗到最後決定都係洗啲錢住酒店算。

臨訓前我著齊整套衫褲，距離上次穿越已經過左一個禮拜，如無意外今日會迎來第五次穿越。

破Veronica個處固然之緊要，但救阿叔同樣都重要。

臨訓前，我double check部電話有無mark低六合彩冧巴，又用紙筆抄低放喺銀包。

我坐喺床頭，揭開Shirley本書，認真閱讀佢地二人間嘅故事，睇下睇下，不知不覺就訓著左。

當再睜開眼起身，望見嘅唔係籃球場，而又喺返同一間酒店房。



我愕一愕然，拎電話望一望時間日期，發現自己琴晚一覺訓到天光。

咦？發生咩事？點解我琴晚無穿越到嘅？