回到過去，破我未婚妻個處: （44）

我行去巴士站坐車，等車期間先發現，手上揸住嘅係族譜，實係頭先老豆唔小心調轉左。

呢本嘢記錄唔知喺幾多年前，我阿爺嘅阿爺俾一個叫朱天志嘅臭道士落左咒，害撚到我地家族咁多代都雞毛鴨血。

所有嘢都係呢條叫朱天志嘅仆街搞出嚟，上面明明寫住我阿爺嘅阿爺雖然拆佢間道觀，但後來有重新選址，仲起過間更大更豪華嘅俾佢。

身為道士，話曬都係練道之人，有乜理由咁小氣，郁啲就落毒咒。

講到尾解鈴還須繫鈴人，我地嘅詛咒可能得施咒者解得到，而過左咁多年，條友早就瓜老襯，不過唔知佢有無弟子或者後人之類嘅識解…



係喎！施咒者死左啫，話唔定佢嘅門派有後人識解呢種咒。

靈機一觸嘅我即刻上網search「朱天志道士傳人」，揾左一陣真係俾我揾到！

原來條臭道士屬於茅山派一個分支，而且的確有傳人，但好可惜，最後一代傳人喺2010年已經瓜左，門派後繼無人。

我再搜尋下最後一代傳人個名，發現喺2009年12月23號，佢居然嚟過香港。

新聞話當其時都唔少信徒揾佢祈福作法，離譜嘅係見一次面嘅收費係要十萬蚊。



呢樣我好似都有啲印象，嗰陣我老豆老母都有話想帶我去，但就俾唔起入場費，最後不了了之。

2009年12月23號，太平道觀。如果我早知呢條道士佬喺香港，咁之前穿越返過去嗰陣，唔理有無錢都好，就算係硬闖都要見佢一面。

話曬係佢嘅祖師爺害到我地咁慘，佢地作為後人絕對有義務，亦有責任解咒。

只不過，依家講乜都無用，我已經都無法再返到過去，全部都係得個諗字。
 
同平時一樣，沖完涼我就訓，照舊著返全套衫褲，仍盼望奇蹟再臨。



而我住嘅呢間酒店有一個好大嗰問題，就係張床太過軟，搞到我訓得唔太好，每日訓醒條腰感覺酸酸痛痛咁，令人好鬼難受。

嚟緊三日係短假期，照慣例有親假，我阿爸阿媽肯定會過大海打牌，我決定趁機會偷偷地返屋企，訓返個好教。

返去之前，我特登打個電話俾阿媽先，探下佢口風。

比起我老豆，我阿媽比較話圍啲，至少唔會講兩句就嬲。

我佢話佢同老豆真係會過澳門打牌。

咁就得啦，於是呢日我執齊行李，落大堂前台check out，準備返屋企。

喺check out嘅期間，有一個男人入嚟check in。

呢個男人我一眼就認得出去，佢係我一個見過幾次，但其實又完全唔識嘅人。



呢個人就係Kevin。

2009年嘅佢留撇遮眼嘅斜陰，2021年嘅佢留個周柏豪式嘅all-back頭。

兩者一樣都係咁mk，喺身形上，望落佢好似比以前更大隻。

條友傾住電話咁行到counter，我就企喺佢隔籬。

本來都無乜嘢，因為佢唔認得我，得我認得佢，只係佢傾電話嘅內容，卻令我心頭一震。

「阿Ling，你到邊呀？我已經到左，準備開定房洗白白等你…」

阿Ling？我有無聽錯？



呢個咪就係Kevin對Veronica嘅稱呼！！！

「…得啦，總之就瓊乾水等你，你快啲過嚟啦。」Kevin對住電話kiss goodbye。

佢講嘅嘢、以至說話嘅語氣都令我諗起，2009年Veronica同佢打情罵俏嘅說話。

我心生衝動，捉住佢問：「啱先你同邊個講電話？」

「喂先生，你邊位呀？」

「你係咪同 Ver...唔係...應該係，你係咪同陳嘉玲講電話？」

「癡線，我都唔識你嘅，死開啦！」對方一手fing開我。

我想上前追問，酒店嘅職員以為我想搞事，幾條友咁攔住我，並送我出酒店門口。



而酒店門口停左一排車，其中一架正正就係，早排我見Veronica上嘅嗰一架銀色房車。

莫非呢架係Kevin架車？當日車入面嗰個係Kevin，而唔係佢同事Emily？Veronica同Kevin兩個仲有聯絡？

呢一刻，我腦海一片混亂，心中有好多疑問。