回到過去，破我未婚妻個處: （45）

我企喺酒店門口等，等Kevin口中嘅「阿Ling」出現，就想睇下呢個「阿Ling」係咪Veronica。

只但係，等左大半個鐘都等唔到，反而見到Kevin行出酒店。

經過時，佢望我一眼，再上車離開。

唔通係我誤會左，又或者係聽錯左？

跟手我就打俾Veronica。



「喂輝輝，你揾我咩事呀？」

「你…你依家喺邊？」

「喺屋企囉。」

「你依家得唔得閒，我想約你出嚟high tea，順便傾下結婚嘅事。」

「咁突然嘅？」



「你唔得閒？係咪約左人？」我追問。

「唔係，咁你想去邊？」

「去以前去過嘅上環嗰間café？」

「哦，好呀，咁陣間見。」對方答應左。

收線後，我影低架車車牌，然後就去上環。



大約半個鐘後，我嚟到Café，對方已經到左。

雖然我心中有唔少疑問，但又唔知從何問起好。

我地先嗌左啲嘢食，一邊食一邊傾下計。

傾傾下，我借啲意將話題帶去婚禮賓客名單：「係啦，結婚嗰日你請幾多個中學同學嚟飲？」

「Um…我諗大半班度啦。」

「咁…你諗唔諗住請你個ex Kevin？」

對方一聽Kevin個名，眼神閃過一絲詫異：「做咩無啦啦佢，都話左我唔想再提起呢個人。」

我繼續追問：「你地散之後，係咪再都無聯絡過？」



「我咪同你講過囉，呢個人係我中學時期嘅污點，我咁憎佢，點會同佢仲有聯絡。」

雖然我好想信佢，但剛才聽見Kevin講「阿Ling 」嘅口吻，真係同2009年嗰陣一模一樣，再加上喺酒店門口嗰部銀色房車，確實令我不得不懷疑。

然而，對方堅持話無同Kevin有任何聯絡，而且我頭先又的確無見到，佢去酒店會合Kevin，咁實在係無咩實質嘢，證明到佢兩個仲有路。

照咁睇，唔通係我多心，係我諗多左？

定還是check佢電話睇下有咩蛛絲馬跡？
 
我眼尾「猴」住佢放喺檯面嘅電話，諗緊點樣拎到手上。

就咁啱呢個時候，有一個waiter拎住杯凍檸茶，可能因為地下有水，佢唔小心冼左一冼，手上杯茶飛濺落到Veronica條裙到。



「有無搞錯呀你，咁論盡架！」Veronica身上嘅碎花裙濕左一撻。

「Sorry 對唔住，我幫你抹返…」

個waiter想幫佢抹返，Veronica就話唔洗，佢放部電話入手袋，自己行入廁所清理。

機會難逢！趁佢離開位，我拿拿聲攞佢部電話，開嚟睇下。

電話設有密碼鎖，無記錯嘅話，密碼應該係佢嘅生日。

果然，一開就開到。

我先望望個contact list，上面無一個人叫Kevin，再睇下通話記錄，最新一次通話係同我講電話，跟住就係佢阿爸，再跟住係一啲我唔認識嘅女性朋友名，仲有一啲三字頭，cold call嗰類嘅電話號碼。

咁多個號碼之中，偏偏就係無一個叫Kevin嘅人，睇埋個Whatsapp對話記錄都係揾唔到。



碌下碌下，我發覺有啲嘢唔多對路，無論係通話定係WhatsApp，都唔見有佢同事Emily嘅記錄。

仲記得上一次我擅自幫佢聽電話，聽見Emily係一把男人聲。

對方解釋話Emily係個TomBoy，把聲比較粗豪，但再細心諗返起嗰日「Emily」嘅語氣，其實係有啲奇怪，唔太似係同事間講嘢嘅語氣，聽到我把聲仲即刻收左線。

當中似乎有古怪。

趁對方仲未返，我mark低Emily嘅電話號碼，打算用自己部電話mark打過去一次。

剛輸入完連串號碼，按下撥打鍵，附近突然有人嗌我。

我當堂嚇左跳，即刻將Veronica部電話塞返落去手袋。





「Hello，原來我真係無認錯人。」同我打招呼嘅係小曼嘅男朋友Eric。

佢拖住小曼行過嚟。

「Hi…咁啱嘅？」我跟手再收返埋自己部機。

「係囉，咁啱嘅，你同Veronica嚟high tea？」小曼睄到我旁邊張櫈有個手袋。

「嗯，係呀。」

今日café搞週年優惠大酬賓，鋪頭坐滿人咁滯，咁啱我地坐嘅呢張四人檯有兩個空位，Eric就問：「你介唔介意我地搭檯一齊坐？」

「唔好啦，費事阻住人。」小曼即刻就話。

清潔完條裙嘅Veronica行返嚟張檯：「Hello，你咪小曼？」

小曼點點頭，微笑住打一聲招呼。

佢地兩個之前都見過兩三次面，所以彼此叫做識得大家。

「呢位係你男朋友？」

「係呀，佢叫Eric。」

小曼向Veronica介紹身邊嘅男伴，然後就話：「我地過嗰邊坐，唔阻你地兩個撐檯腳。」

「但嗰邊好似無位，不如我地就坐呢度啦~」Eric溫柔咁同小曼講。

「係囉，我地其實都食飽準備走，你地咪埋嚟坐。」我開口話。

小曼望落好似有啲猶豫，但最後都同Eric一齊坐低。