回到過去，破我未婚妻個處: （48）

微風輕輕吹動窗口嘅窗簾，帶著倦意嘅我瞇埋眼，好快訓著左。

「wee-wee-wee-」

耳邊首先迴響奇怪嘅聲音，身體感覺有啲飄，十幾秒後刺眼嘅白光喺眼前出現。

到再睜開眼後，又見返同一個籃球場，個四眼仔又準備俾Veronica同Kevin佢地整蠱。

居然穿越成功，咁係咪證明左道符係真嘅穿越咒符？



係嘅話，咁我之所以能夠穿越就並非上天嘅幫忙，而係因為小曼幫我求嘅嗰道符。

問題係道符失傳左咁耐，咁小曼係喺邊度，又喺點樣求返嚟？

我感到疑惑。

呢個時候，四眼仔敗走，嗰四條友追上去指住嚟笑。

或者我應該提醒個四眼仔，呢個只係一個惡作劇，等佢唔洗咁俾人笑。



過去幾次，我穿越返嚟，都係有一個目標，就係破Veronica個處。

我以為對方對我一條心，係出於愛所以同我求婚，可惜偏偏喺剛才，就俾我發現佢原來一直偷偷摸摸同Kevin有聯絡，而且二人關係十分耐人尋味。

喺我未搞清楚成件事之前，到底係咪仲要同佢結婚，對我嚟講呢個真係一個大問號，亦令我想破佢處嘅意欲大減，畢竟每次都要大費周章，結果卻吃力不討好。

因此，破處呢一環就暫時由主線變成支線，救阿叔就由支線變成主線，另外揾朱天志嘅傳人解咒都變成我嘅主要任務。

同唔同Veronica結婚、破唔破到佢嘅處都好，反正只要解到咒，就免除所有後顧之憂，以後我就會變返一個正常人，唔洗再擔心同非處女結婚會死，毒咒亦唔會繼續一代接一代禍延落去。



總之解到咒就一天都光曬。

咁第一站，就先去阿叔屋企。

6，23，30，33，43，44。

12月22號，亦即係今日嘅六合彩號碼已經準備好。

阿叔打開門問我邊位，我又好似上次咁解釋一輪，證實自己嘅身份。

對方聽完並信服後，開門俾我入嚟。

「你口口聲聲話自己係由未來嚟嘅，咁有咩證明先？」

「呢個問題問得好！」



我喺銀包拎出預先寫喺紙上嘅六合彩號碼：「呢六個數字就係今晚六合彩會開嘅號碼。」

阿叔拎上手睇一睇，眼神帶點懷疑：「真係開呢幾個冧巴？」
 
「珍珠都無咁真，我對燈火發誓，呢六個號碼今晚一定中！阿叔你今日一定要買，筆獎金對你好重要，中左之後你千其唔好一次過洗曬，點都要留返五百萬！」

「哈哈，你講到好似真係中硬咁。」

「梗係啦！我特登mark底呢幾個冧巴，喺未來穿越返嚟，就係俾你買嚟中獎！所以你一定要買，同埋跟我啱先所講，中左唔好洗曬，一定要留返五百萬。」

「呢啲嘢中左先講啦。」

「我唔怕講埋俾你聽啦，你女朋友Shirley個腦有個瘤，兩年後病情惡化，你為左救佢而同佢結婚，故意觸及身上嘅毒咒，借此要保險公司賠一筆錢俾Shirley醫病。」



「你話Shirley個腦有個瘤？」

「無錯，總而言之，你袋好呢張紙，記得照住上面串冧巴去買！」我再三叮囑。

對方皺一皺眉頭，收好張紙，然後拎住工具箱，過我屋企整水喉。

暫時第一個任務算完成左，第二個任務就係揾個道士解咒。

事前我已經check過曬，朱天志所創立嘅門派最後一代傳人叫吳標，來自佛山南海，2009年12月23日，即係聽日會喺位於粉嶺嘅太平道館，接見各方信眾。

見面費係港幣十萬。

錢我就無架啦，所以做定心理準備，到時死lur硬闖都要見到個道士一面。

點都要條友幫手解除佢祖師爺對我地家族所施下嘅詛咒。



所謂多個人多個照應，我打算嗌埋十六歲嘅我一齊去。

「下？咪搞我，晨咁早去到粉嶺咁遠，我先唔制。」條友一邊講，對眼一邊睄去冰室門口，等緊小曼出現

我都估到佢唔應承：「唔洗望啦你，遲啲就嚟架啦。」

「你又知我等緊邊個？」

「小曼呀嘛，我仲知你自製緊張聖誕卡想送俾人，不過最後係送唔成…」

「Shh—」對方突然噓我。

原來小曼入左嚟。



「咦，咁啱嘅？」

「你又嚟呢度食飯？」十六歲嘅我問。

「我幫嫲嫲買外賣渣嘛。」

我好記得，上次十六歲嘅我嫌棄我阻住左佢，今次我唔想又俾佢怒睥，自動自覺讓個位出嚟。

「我去七仔買啲嘢，俾個你坐呀。」

「哦，多謝。」小曼坐到十六歲嘅我對面位等外賣。

我行到去七仔買樽可樂，順便打個電話俾阿叔，問佢買左六合彩未。

「嘟…嘟…嘟…」

電話嘟左好多次，無人聽電話。

我繼續打多兩次，仍然係無人聽，都唔知佢搞咩。

好在頭先佢整完水喉，我又再提佢一次，我諗佢應該唔會唔記得嘅。

嚟到第二日，天一光我就起身搭車過粉嶺。

由筲箕灣搭去粉嶺，最快都要一個半鐘車程，我八點上車，去到道觀都差唔多九點踏九。