回到過去，破我未婚妻個處: （49）

嚟到門口，看見路邊停左好多名車，我諗唔少有錢人都慕名而來。

整個道觀綠樹環繞，裡面嘅建築古色古香，想入廟就要上一條好長嘅樓梯。

指示牌寫住，吳標道士就喺上面座廟接見信徒。

有四個著道袍嘅男人攔住樓梯口，要人出示入場紙先可以上去。

嚟之前我做定心裡準備硬闖，只係雙拳難敵四手，更何況面前有十六隻手，要硬闖睇嚟有啲難度。



我四周圍望，揾下有無其他路徑上廟。

「鏘！」

突然之間，身後傳嚟一下敲鑼聲。

「我要見吳標道士！鏘！我要見吳標道士！鏘！」

有個人揸住銅鑼，行到樓梯口，一邊敲鑼，一邊大聲講話要見吳標道士。



佢…佢…佢咪就係世伯？Veronica個老豆？

因乜事佢又會喺呢度？
 
「我要見吳標道士！鏘！」

我無睇錯，呢個揸住銅鑼，嘈住話要見道士吳標嘅，真係未來外父。

攔住樓梯口嗰四個著道袍嘅男人勸喻佢離開。



「唔好意思，如果你無俾錢嘅話，我地係唔會放你入去。」其中一名著道袍嘅男人話。

「我唔理！今日我見唔到吳標道士，我係唔會走！」

世伯唔肯走不得止，仲喺背囊拎個大聲公出嚟，敲鑼打鼓大嗌：「吳標師父！我要見你！」

旁邊嘅我就覺得好出奇，世伯何解都咁堅持要見吳標道士？

過左一陣，其他道士過嚟幫忙驅趕世伯。

世伯唔肯走，舉起大聲公講：「你地點趕我都唔會走架啦！當年佢嘅祖師爺朱天志落嘅咒，禍延多代，害死左我個妹，今日吳標作為門派傳人，絕對有責任解除毒咒，還一個公道！」

咩話？世伯都中左朱天志嘅咒？

「鏘！還公道！解毒咒！我要見吳標！」世伯鍥而不捨，繼續呼喚吳標。



而班道士見對方勸極唔走，唯有就動手。

佢地五六個人夾手夾腳抬世伯出去，樓梯口得返兩個人守住。

呢個係趁虛而入嘅好時機。

我抖一啖大氣，一個跨步突襲衝上樓梯，成功突破防線。

嗰班道士嘅注意力即刻由世伯轉移到我身上，佢地跑上樓梯追我。

呢單嘢生死攸關，我博曬老命咁跑。

上到樓梯盡頭，嚟到廟前，個人喘曬氣，上氣唔接下氣咁滯。



我用力推開度門行入廟，廟內亦有道士把守，一踩入去佢地就攔住我。

「我要見吳標師父！我要佢幫我解咒！」我抖順條氣，聲大大要求見吳標。

「唔得！要見面必須俾十萬，無錢一律無得見！」廟內嘅道士同我講。

「錢我就無，但我一定要見佢！」我堅持要見。

「咩事咁嘈？」

呢個時候，一個穿灰色長袍，臉上留住一撇羊咩鬚，望落年過七十嘅男人行出嚟。

「對唔住，吳師父，呢個人喺度搞事，我地即刻趕佢走！」

廟內嘅道士想趕我走，我就話：「你就係朱天志門派下最後一代傳人吳標？你知唔知朱天志害到我地家族好慘，佢落咒害死我阿爺嘅阿爺，仲有家族所有後人，你作為佢嘅傳人，唔該你快啲解左呢個隔代詛咒！」



「仲有我！朱天志嘅詛咒都害死左我個妹！」世伯居然都突破到重圍，行入寺廟。

吳標挘兩下下巴執長鬚，問我地：「你地話，你地中左由我祖師爺傳落嚟嘅詛咒，我想問，係乜嘢毒咒？」

「我嘅咒係唔可以同非處女結婚，否則就七孔流血而死！」我第一時間就答。

「中咒嘅唔係我，係我個妹同我個女，佢地嘅咒係同青頭仔搞完嘢，就一定要同對方結婚，如果二十八歲前結唔到，咁就會無命，我個妹兩年前就係咁樣死嘅！」

我聽完世伯咁講，碌大眼o左嘴，感到十級震驚！

佢嘅意思即係，Veronica破左青頭仔嘅處，就要同嗰個青頭仔結婚，若然廿八歲都結唔到就會死？

突然之間，我仿佛諗通左一啲嘢……



吳標搖搖頭歎一口氣：「對唔住，兩位身上嘅咒，我唔識解。」
 
「咩話！點解呀？」世伯好激動咁問。

「呢兩個都係我祖師爺，所施下嘅古老咒語，以在下嘅功力，無本事解。」

「你係唔識解定唔想解？講到尾都係想要錢啫？」世伯反駁。

「就算你俾一千萬我，我都解唔到，好對唔住。」吳標向我地鞠一個躬致歉。

呢刻世伯嘅表情同我嘅一樣，一樣都係咁絕望。

「喺我學師嗰陣，我有聽過祖師爺佢嘅一啲故事。」

吳標一邊挘鬚，一邊講：「無記錯嘅話，後生仔，你阿爺嘅阿爺應該就係，拆左我祖師爺道觀嘅嗰個地主，至於阿伯你嘅祖先就叫李圓圓，係我祖師爺一生中最愛嘅女人。」

「係，你講得無錯。」

世伯點點頭，然後開口講述「處男咒」嘅起源。

聽完之後，我終於明白點解朱天志咁憎我阿爺嘅阿爺，憎到要落毒咒，原來係因為失去左自己最在乎嘅嘢。