回到過去，破我未婚妻個處: （56）

「嗚嗚…嗚嗚...」整間房都充斥住Veronica淒厲嘅喊聲。

我感到無助亦無奈，深深歎一口氣，唔知點做好。
 
「輝輝…我求下你…幫我一次…只要你肯同我結婚…你想我點補償都得架…」

講講下，Veronica埋嚟除我條褲。

「你做咩呀…」



「我知你一直想我幫你用口含…俾我依家幫你...你仲想我做咩...我都可以做…」

「你唔好咁啦，依家唔係你一個人嘅問題，係我同你結婚，我都會死。」我撥開佢隻手。

旁邊嘅Kevin繼續低聲下氣咁哀求：「咁大個仔我都無求過人，今次係第一次求人，我亦係真心求你，求你唔好見死不救。」

「點解你地唔聽下我講？」我無奈歎一口氣。

「唉算啦，我都唔怕話埋俾你地聽，我知自己有個毒咒，過去幾個禮拜，為左同Veronica你結到婚，我穿越返過去2009年想破你個處，就係想保住條命之餘同到你結婚。」



我吞一啖口水繼續講：「可惜我失敗左四次，直到上一次穿越先無意中，俾我發現左你身上有個咒。或者呢啲都係天意，個天唔想我同你結婚，所以先令我衰阻咁多次，到最後仲俾我發現你地兩個嘅事。」

聽完我咁講，Veronica喊得更加淒厲，Kevin愁眉苦臉，無言以對。

「嗚嗚嗚…我唔想死呀…嗚嗚嗚…」

過左一陣，消化完我嘅說話，Kevin開口問我：「你話你可以穿越，咁你不如穿越返去阻止自己同阿Ling上床，咁得唔得？」

「做唔到，我淨係能夠穿越返去2009年嘅12月22日，每一次都係返到同一個時間點。」



「咁…咁你再穿越一次…破到我個處…咁咪可以同我結婚…」Veronica眼淚流個不停。

「但我試左好多個方法都唔得，真心無能為力。」

「唔會架…你灌醉我又好…落藥迷我又好…一定有方法架…」

原來真係唔可以低估人嘅求生意志，估唔到 Veronica居然會提出咁嘅方法。

Kevin亦無出聲，唔知算唔算默認左呢種做法。

「到時你破到我個處...咪唔怕同我結婚…你唔想擺酒可以唔擺酒…只要我地簽個字就得架啦…你咪當假結婚…簽完我地即刻就離…」

「你…你俾我考慮下…」

除左破佢個處，或者我可以穿越返去，提醒十六歲嘅我唔好同佢上床。



問題就係唔知十六歲嘅我聽唔聽得入耳，畢竟對佢而言，同Veronica發生關係，係十年後嘅事，有啲野唔殺到埋身都唔會理。

「嗚嗚嗚…輝輝…我求下你一定要應承我…」

Veronica繼續喊，喊喊下突然間暈低左。

「阿Ling你唔好嚇我！醒下啦！」

Kevin驚慌失措，即刻call白車。

暈倒嘅Veronica被送去醫院。醫生話佢喊得太犀利，導致虛脫而暈倒，個胎並無大礙。

無錯，Veronica有左，但個肚唔係我嘅。



一頂綠帽由個頭笠到落腳。

換句說話講，如果佢死左嘅話，咁就係一屍兩命。

喺病房內，Veronica 、Kevin、世伯、伯母，佢地四個又跪又叩，哀求我唔好取消婚約。

過去三年，我就好似個傻仔咁俾人呃足三年，理性一面話我聽，我唔應該可憐呢個女人，最好同佢一刀兩斷。

同時之間感性一面嘅我，對佢卻留有一絲惻隱，又唔忍心見死不救。

經過一番天人交戰同思想掙扎後，結果係感性戰勝左理性。

我認我自己無用，笠住咁大頂綠帽，但最後都係心軟。

我同佢地講，如果下一次穿越，我成功破到Veronica個處，咁我就應承同佢結婚，但淨係簽字唔擺酒，結完即刻離婚，從此唔再扯上任何關係。



我知自己憨居，憨居到救一個講左無數大話，欺騙自己嘅女人，只但係要我咩都唔做，睇住兩條生命被死神帶走，我又真係做唔出。

因此我做左呢個決定——破到就結，破唔到就唔結。

而喺呢件事上，我發現Kevin係真心鍾意Veronica，因為佢居然主動同我研究策略，諗辦法點樣能夠令我喺2009年，成功破到Veronica個處。

商量左幾日，我地得出左一個必定成功，而且又唔需要花費太大功夫嘅方法，亦都係Veronica所提出嘅方法。

直接落迷藥。

Kevin托人揾到一種，聞一聞立即暈嘅迷藥。

只要我喺平安夜嗰日，上酒店迷暈佢地兩個，咁到時我做咩都無人阻止到。



的確係一個簡單又直接嘅方法。

「你記得袋好呢樽嘢，拜託曬你啦。」

Kevin將一樽透明嘅迷藥交到我手上，並鞠一個躬，拜託我一定要破到Veronica個處。