回到過去，破我未婚妻個處: （57）

經過五次嘅穿越以及一次嘅穿越失敗，我發現自己之所以能夠穿越，應該係因為枕頭底嗰道符。

因此想穿越，咁要返屋企訓。

我同我老豆講，我唔會同Veronica結婚，咁佢先肯俾我返屋企。

對我嚟講，「假結婚」唔算結婚，所以我唔算講大話，再加上依家都唔擺酒，又唔洗通知親戚，只要簽左字我唔講，老豆老母都唔會知。

我返入房，拎高個枕頭，拎道符上手望下。



上面七角星中間嘅「伍」字變成左「陸」字。

回想返我第一次見到嘅係一個「叁」字，然後係一個「伍」字，再到依家嘅「陸」。

無記錯嘅話，個「叁」字出現嘅時候，咁啱係我第三次穿越返嚟。

雖然前後我只係穿越左五次，但計返條數，我先係穿越左四次，中間一個禮拜無穿越到，隔一個禮拜再穿越一次，假如計埋miss左嗰次，咁總共係六次。

對返呢個「陸」字，睇嚟係記錄緊我穿越左嘅次數。



問題係仲剩幾多次機會？

諗真啲，呢個係一個七角星，莫非代表七次機會？

道符係小曼俾我嘅，問佢會唔會清楚啲。

我打開電話，諗住WhatsAp佢p問一問，順便入個同學group度，通知班朋友自己唔會擺酒。

點不知剛拎部電話上手，就feel到喺咁震，個mon不斷彈出啲短訊通知。



班友唔知搞邊科，無啦啦喺度恭喜小曼。

「點解咁突然嘅？之前都無聽你提過你拍拖！」

「咪係囉，你同新郎哥拍左幾耐拖？點解咁快結婚嘅？」

「竟然學人玩閃婚，真係估你唔到……」

咩小曼閃婚？都唔知班友喺度講乜。

我打字問佢地：「喂，你地喺度講緊咩？」

「係咪Friend嚟架，咁都仲要問，自己去小曼個IG睇啦。」馬騮覆我。

我平時比較少睇IG，見班友肯唔講，咁我上小曼個IG望望。



click到入去，第一時間映入眼簾嘅，係一張隻手戴住戒指嘅相，下面caption寫住：我要結婚了。

我當堂打左個突，以為自己眼花，再望多幾眼，上面確確實實寫住結婚宣言。

WTF！發生咩事？點解突然小曼要結婚？

我打電話問佢，一接通電話，第一句就問：「你結婚？真定假？點解咁突然嘅？」

佢好淡定咁回答話：「真架，我真係要結婚。」

「同邊個？」

「Eric。」



「你同佢唔係拍左好耐拖渣喎，點解咁突然咁急結婚嘅？」我追問。

「結婚無話快唔快、突唔突然嘅，遇到啱嘅人就結架啦。」

「你地拍左拖有幾耐？至少都了解夠一年先結啦。」

「放心啦，我係諗清諗楚先結。」

「咁幾時行禮？」

「下個禮拜，我地唔擺酒，就咁揾個律師見證簽字。」

下個禮拜？咁咪仲快過我？

以一個正常邏輯去諗，由拍拖到簽字結婚只係一個月時間，根本係無可能。



因為結婚排期要等一段時間，就算好似我同Veronica咁係揾律師證婚，都要等一個月。

「無可能咁快排到期結婚架喎？」我問。

「Eric佢個uncle喺結婚登記處到做，佢幫我地偷偷地排到最先個位。」

「但識得嗰一個月就結，太快啦。」

「做咩呀？俾我搶你一步結婚，你唔開心呀？」

我都唔知點覆佢，竟然學人玩閃婚，都唔知佢諗咩。

「你顧掂自己個婚禮先啦，我知自己做緊咩架，唔講住啦，我約左Eric，係咁先啦，bye bye。」



「下？喂...未...」

「嘟..嘟...」對方收左線。

成件事嚟得實在太突然，我除左o嘴之外，都唔知俾咩反應好。

識左一個月就結婚，真係唔會太急咩？

而且佢又未到三十歲，洗唔洗趕住要嫁？

Eric靚仔係靚仔，問題拍得一個月，雙方都未了解清楚就結，怕唔怕到時後悔？

唉，我完全無法理解，擔心佢會俾人呃。

只不過，我又唔係佢邊個，人地嘅事輪唔到我管，佢鐘意同邊個結婚，其實都係佢嘅自由，我無權干預。

我唯一能夠做嘅，或者就只有祝福佢幸福。