念念不忘 都冇迴響: 調位

我地由十月開始一齊坐到三月，個老師先捨得編過個新嘅座位表。

分開之前，全張檯上面都係我地寫過嘅嘢。其中你檯面上面有個哈哈笑，你話每次我地望到，個哈哈笑都可以比到鼓勵我地。果陣當我擦翻個檯面果陣，都唔捨得擦左佢。神奇嘅係唔記得係張位咁啱冇人坐，定係下一任都覺得無傷大雅，反正個笑哈哈系個檯面存在左一個學年。

反正到我地分開坐果陣，我地已經成為左形影不離嘅好朋友。就算冇得上堂果秒分享無聊耶，我地好自然都會一齊食飯，一齊放學。

我記得我問過你，可唔可以每個星期抽一日單獨同我食。但係果陣你同你本來Ｄ friend 都開始散散地，有D時間你其中一個friend得你同佢食 (係同我地一齊穿耳果個）。反正你話費是佢要自己食好慘，所以我都無強人所難。

調位並無減弱我地嘅友誼，我反而會期待每一次空閒時間都可以同你交談，一齊周圍去。到依家我已經忘記左果幾個月我係同邊個坐，因為好快最後一次調位，竟然係自由坐。



我記得公布左自由坐無幾耐我地一齊出過街食飯，其實我就非常之想同你坐㗎啦，但係限於我地依然各自有D朋友，所以我係要鼓起D起勇氣問你肯唔肯同我坐，點知你都好爽快咁應承左。日子都好快變到同從前一樣，果陣有一種錯覺，嚟種每日返學見到你，可以同你講野，一齊渡過大部分時間嘅時光，可以直到永遠。