念念不忘 都冇迴響: 暑假

暑假嘅我地，基本上一個星期都會見兩次。佢話佢冇乜朋友，我又好樂於同佢見面，所以我地果年真係去左好多地方。唔知道係以前班friend 冇咁熱衷出街，定係我冇咁熱衷同佢地出街，反正同佢一齊周圍去嘅次數，可能係我兩年總和有多。

喺我嘅記憶裡面，香港雖然細，但係佢成日都會尋找到好多果陣我覺得好新嘅地方去。宜家回想可能係我以前個世界細，先會覺得佢識好多地方，開拓左我對香港嘅認識。

我地果陣係得閒到周圍求其搵cafe坐，行商場行到攰求其搵D地方吹水，睇戲，去迪士尼......得閒特別小小去遠D嘅地方打卡，反正我就由一個成日喺屋企hea嘅人，變成一個一三五都周圍去嘅人。

一齊去過嘅地方實在係太多：果陣好興跳彈床，我記得佢用盡全力都跳唔到上去超級狼狽果樣；記得我地一齊睇過無數個日落；佢去剪頭髮我可以坐隔離陪佢；仲有佢好鍾意食尖沙咀某間拉麵店，每次諗唔到食乜都會好自然去食；有試過行行下街羅雨我地冇遮，可以各自返屋企換個衫拎把遮之後再見；有一次我被逼同班完全唔熟嘅人幫個friend慶生，你幫手扮有耶搵我，之後我地順勢出埋街... ...

反正一整個七月我地都同一般情侶冇乜分別，我估冇乜普通朋友會好似我地見得咁密，行得咁近，每次出街都總有D位令我覺得我地好何拍好有默契，同佢一齊周圍去彷彿成為左一種理所當然嘅事，我就樂在其中嘅，雖然唔知佢係咪咁睇啦。



其實鍾意一個人真係好簡單，只要成日可以見到已經係莫大滿足。其實依家寫出嚟，先覺得全件事都幾幼稚，我鍾意你好大部分都係建基於果個七月，但係其實我地只不過係頻繁見面而已。只係去到後來有一段時間我成日都會諗返起果年七月，我地真係如此熟悉過。