念念不忘 都冇迴響: 遲到

慢慢地讀書壓力越來越大，遊爍嵐每日都總係無時無刻會拎住搭notes望。例如朝頭早搭車嗰陣，就100%係望notes嘅，果陣我觀察到佢好鍾意搭07:42班車，所以搞到我都習慣搭同一班車。習慣每日上到車望下佢喺唔喺入邊先。

至於第一張講到個屋苑，其實就係佢有親戚住喺裏面，行屋苑嗰條路會快好多返到學校，所以佢落咗地鐵之後就會入個屋苑行，其他人就要上天橋落天橋過隧道... 到最後最係學校見。

反正我大概知道佢幾點會到學校，或者喺個屋苑行到邊，所以我總係鍾意系最尾果段路，同佢隔住個圍欄「一齊行」。

有一次港鐵延誤搞到我地都遲左到，我地學校個規矩係你可以請病假，但係頭一二堂翻到就計係遲到。遊爍嵐同我落咗車之後開始跑都發覺跑唔切，佢就咁帶我入去喺個屋苑裏面匿埋，打電話翻學校請假。

嗰兩堂嘅時光係我哋久違可以一齊傾偈嘅時光，我記得嗰陣我仲同佢分享緊我諗住出國讀書嘅大計。兩堂好快久過左，我地兩個要前後腳扮病行翻入學校，結果喺登記嗰度見到對方個扮病樣都忍唔住偷笑，果刻我覺得我地唔入drama society真係嘥晒。



最好笑係返到課室之後，有個細節位：當我出閘嗰陣有另外一個同學推咗我個閘，但嗰陣遊爍嵐同我全速奔跑緊，我就就咁跳咗落閘，反正我有俾錢。呢件事傳咗返學校，啲老師以為我遲到係因為我俾人捉咗去差館 :)

我仲記得嗰陣我好嬲我請病假嗰單嘢差啲黃咗，suppose 唔應該俾學校啲人知道我之後早喺觀塘出現過。我忍唔住咗呢單嘢嬲到同遊爍嵐講左，D人差D爆我大獲。

而家諗返起成單嘢真係好笑嘅，其實我中學多次有走喺范校規嘅邊緣，我估其實都因為我同遊爍嵐成日諗埋啲古怪野，挑戰啲灰色地帶有關。