念念不忘 都冇迴響: 中六 一

暑假果陣我有嘗試過約游爍嵐去書展，不過佢話要溫書所以推左我。實際上我第一年去書展就係中三，就正正係同游爍嵐去。

果一年我地暑假冇乜交集，考完個mock匆匆就要返學了。依家回想起都覺得當時都幾慘，其實個假根本都唔可以稱之為假，不過大大話話都中六，就考DSE啦，有D嘢又真係無辦法，一定要捱落去嘅。

中六係我發奮讀書果一年。我本身雖然成績都唔差，但係都係食天資，每次都臨急抱佛腳或者靠天資。因為每次都無努力過，所以其實我好怕DSE果陣運氣真係差，咁就入唔到大學了。

其實入唔到大學有冇咩大不了？依家我會覺得每一個人去到某個階段，係無論點都有出路嘅；不過我知道游爍嵐一定入到三大，我好怕如果到時我真係太廢，會睇自己唔起，唔夠膽再搵佢。加上我本身份人又死要面，所以都造成左我真係努力讀書嘅局面。

果陣時其實真係幾大壓力嘅，主科就話我天資就到姐，兩科elective 就真係要從偷開始追番D concept之類，我膽粗粗叫個Econ miss從頭到尾叫我一次，搞到佢開左無限個study group,每個lunchtime 叫D有興趣嘅同學去聽翻相應嘅topic;我又叫左我個bio miss約lunchtime溫書，佢都好努力洗我腦。反正我好努力營救我D elective，諗返起都覺得自己毅力無窮。



而主科其實我就真係靠補習嘅，果陣星期一到五返學可以見到游爍嵐，星期六日補習又見到佢，其實老實講，我都幾開心嘅。不過游爍嵐佢份人變到好灰，成日都好擔心，果陣明明我都唔多對路但係我系佢面前都依然好努力盡力去陽光。

我依家咁諗，當時儘管我全個腦都係游爍嵐，但其實更多時間同實際行動，我都係為DSE拼搏緊。我曾經講過，自從鍾意左游爍懶開始，我三年來每一個行動都同佢有關。實際上我估，儘管如此，一切個行為最後都造就左我，所以我好多謝佢，但更應該多謝嘅，係當時嘅自己。