念念不忘 都冇迴響: 休息

喔DSE最後一科考嘅係chemistry，當時用左兩日捱更抵夜咁溫習，一出到個考場，感受到前所未有嘅自由，隨手飛走咗啲notes，真係人生滿希望前程由我創。

果陣同我同場考嘅有我另一個朋友，我哋兩個錄咗段片大約內容係：

「我哋考完DSE啦，係喎你未考完喎～加油！」

之後就send俾啲未考完嘅朋友。雖然咁做我哋真係好應該落地獄，但係考完嗰時已經失去左理智，相信上帝係會原諒我哋嘅。而我都將段片send埋比仲要考VA嘅遊爍嵐。

遊爍嵐應左我幾句無聊耶之後，我唔知點解嗰陣好興奮，主動問佢考完VA之後，可唔可以同我一齊食嘢，估唔到遊爍嵐又好爽快咁應承咗，嗰日真係超級開心。



//

喺考場外面等遊樂嵐，無啦啦見到幾個二班我有兩個朋友，佢地等緊其餘兩個人考完VA一齊食野。嗰陣我有少少hurt，明明我哋係同一個friend group，點解佢哋唔叫埋我一齊食。點知佢哋話一早估到我一定會去搵遊爍嵐，收埋風fact check之後都費事阻住我哋。嗰陣我先知原來都幾多人知道我對遊爍嵐特別好，後來先發現其實我身邊D朋友都大概知我鍾意佢。

反正遊爍嵐出嚟果陣話：

「都得你唔少，因為知道考完可以同你食飯，搞到我考到最尾嗰陣時忍唔住笑。」

其實我都感受到佢嗰份雀躍，大佬終於考完文憑試係人都應該會好開心。以前遊爍嵐成日都話，高中嗰陣成日覺得天色好灰暗，實際上係融情入境；佢成日都話考完文憑試一天都會光晒，我記得嗰日雖然唔係特別好天氣，但係全個世界都容光煥發，生氣勃勃。我地畢竟都終於渡過咗人生最漫長嘅一個考試，而家回想起依然覺得當時真係好攰，所以久違地可以於心無愧地休息，係一種前所未有嘅感覺。