念念不忘 都冇迴響: 長假

我以前成日都同遊爍嵐講，考完DSE果個假，會係你人生最自由最漫長嘅一個假。但而家回想起，大學假期先係真正嘅自由同放蕩；考完DSE嗰幾個月名義上就放緊假，實際上有無限嘅憂慮同等待。不過終於可以唔使再日夜顛倒咁溫書，又唔使朝頭早七點起身返學，當時已經係前所未有嘅放鬆，食年第一次真正感到自由。

遊爍嵐自從DSE果排開始咪有同我ig direct嘅，慢慢地我地每一日都會講小小耶，我都覺得好神奇，佢以前從來都冇試過咁做。可以每日聽到佢講嘢，同會分享生活嘅小事同睇法，其實我覺得好幸福。

我去左幾個grad trip嘅，同朋友同屋企人。我記得當時返到酒店，我仲要專登走去大堂收wifi應遊爍嵐dm，一方面嗰度訊號好啲，而方面唔想俾人聽到我會同佢講啲乜嘢，雖然唔係啲咩唔見得光嘅嘢，但係可能我驚人哋聽得出我真係好用心應佢。

遊爍嵐，陳珊蕾同李姿穎三個人系五月果陣都去左日本grad trip。果陣佢地個squad已經擴展到有五個人，不過另外嗰兩個本身比較friend，竟然拋下咗佢三個，自己走咗去韓國。我聽到呢個消息嗰時有少少驚訝，因為以我所知佢哋本身係約好晒的。反正結論就係得返佢哋三個自己去日本啦。

嗰陣時其實我會諗，如果當初我有同佢三個保持聯絡，我係咪有份可以同游爍嵐一齊去旅行。當初我地4個係一個squad果陣，都有講過一齊去grad trip d 野。後來聽到陳奕迅首《富士山下》，我偶爾都會諗返起呢個問題：



「東京之旅一早比一世遙遠。」

因為有3個grad trip，我嗰幾個月喺香港嘅時間實在唔多，而每一次我都會抽時間同遊爍嵐見面。只不過唔知點解我哋見嚟見去都係系我地屋企附近果幾個站，每一次都係食晚飯。我有諗過好冇約佢去遠啲嘅地方，但係又唔知點開口，又想方便到佢，費事佢嘥太多時間同我出街好辛苦。嗰陣時我會諗，當初中三同我周圍去嗰個女仔去咗邊。呢個真係一個好問題，我而家嘅解答係：可能其實一直以來鍾意周圍去嗰個係我。阿信首《隱形的紀念》有講到

「我喜歡你所以喜歡旅途」

我諗就係中三嗰陣成日同佢周圍去，令到我後來出街都好鍾意探索啲新嘅地方。以佢之所以帶我周圍去唔係因為佢鍾意，只不過係佢比我早認識嗰啲地方，去嗰啲地方對佢嚟講好自然。題外話，我到今時今日都好耐冇同佢去過好遠嘅地方，呢個後話遲啲再講。