《將軍孤島》: 03

經過一輪的簡單製作後，大家都拿著自己的武器。

「琪雅，你拎埋個急救箱，必要時做醫療兵。」我把貨倉的急救箱拿給她。

「醒咗喎～」她又想嗆我了。

「做你男朋友好難唔醒。」

「STOP！！」禮欣大喊。





「咳....仲要拎埋口罩，一個驚唔夠用，同埋你哋有冇賣安全眼鏡？」我轉移話題。

「有啊，不過存貨唔多，眼鏡喺晒出面貨架，好近我哋，出去第二行就係。口罩就喺收銀嗰邊。」國雄回應。

「咁睇嚟要出一出去。」我語氣變得認真。

「啱啱你喺出面嗰陣見到多唔多人？」負傷的世凡問。

「好多已經第一時間走晒，有幾個衝返入嚟，但我打咗陣都唔見佢哋。」





「可能喺第二個出口走咗，呢間惠康有兩個出口。」莉亞說。

我瞳孔放大。「死...我唔記得咗有兩個出口。」

「佢哋應該冇咁醒目識由第二個門口入嚟，除非有嘢吸引佢哋。」雅琪說。

「咁..出去睇睇先，視乎情況再決定。」我把削尖的雨傘拿起。

「型喎！拎遮！」牙賢望著我的雨傘。





「佢救咗我好幾次。」

其實自從我看了一篇網絡小說「病港」後，我就一直很憧憬拿著雨傘戰鬥，看來我跟主角一樣有中二病。

「咿——」貨倉的門再次被打開。

外頭水凈鵝飛，一片死寂，只聽到頭上光管的吱吱電流聲。

驟眼看跟關門後的超市沒太大分別，但只要細心遠瞻，就會發現有數條屍體正伏屍在遠處四周，地上還有大量血跡被燈光照得閃閃發亮，使人毛骨悚然。

「慢慢行，盡量唔好講嘢。」我把聲線壓到最低。

我們的右邊是一排排的貨架，左邊的一條路可以直出收銀處。

收銀處





——｜ ^ ｜ ——————

——｜ ^ ｜ ——————

——｜ ^ ｜ ——————

——｜ ^ ｜ ——————

——｜ ^ ｜ ——————

(我們）
貨倉門口






口罩的位置在收銀處旁，所以我們必須走到最前。

我們模仿著電影中的潛步，慢慢行到最近的貨架。

「生活雜貨類」

左右兩邊空無一人。只擺放著多部被人遺棄的購物手推車。

繼續。

我們慢慢行到第二行貨架前，「雜貨類」。正是擺放著安全眼鏡的貨架。

為首的我準備探頭。

我慢慢把頭探出去張望右邊貨架的情況..








一對睜大的眼睛死死地盯著我。

我嚇到馬上縮後，「呯—！」後方的雅琪躲避不及，被我用後腦狠狠地撞到鼻子。

她兩手按著鼻子，死忍著痛楚不敢發出任何聲音。

我用眼神示意他們前方有危險並慢慢退後數步。

我指著那邊用嘴形說出：「有 個 人 喺 到 。」

「衝 啦 ！」 牙賢用嘴形示意。





我舉出手指： 三 、 二 、 一

我向前大踏步，兩手舉起雨傘準備來一下突刺。

我煞住了。因為原來只是一具死不瞑目的屍體。

「玩嘢啊你？俾你嚇死啊！」牙賢鬆一口氣。

「靜啦...」莉亞十分鼓噪，低聲地急說。

「嘻嘻嘻⋯」

朗怡用手掌反手打落牙賢的肚子，他痛得蹲了下來。

「唔係我笑啊..........啊.....」牙賢痛苦地說。

「......」

除了牙賢，我想國雄和世凡不會這麼幼稚。

「後面啊！！！！！」國雄大喊。

國雄隨即用尖棍猛力插向從後出現的怪人。

「嗚咕..嚕嚕哇！」怪人被插中左眼。

即使眼睛再堅硬，被一根尖棍插中也不可能完全沒事。

怪人掩著左眼：「吼！！」

他衝向國雄，伸出右手抓緊國雄的頸，左手呈九十度準備一拳揮落他的臉上。我馬上拿起雨傘將手柄勾住他左手的肱骨位，及時制止了第一滴血的出現。

「打爆佢個頭！快！」我趁他已經無手可用的時候大喊。

「食我一記雪崩！！」牙賢拿起尖棍，垂直毆落他的頭上。

血漿四濺，怪人倒下。

「呼～輕鬆！」牙賢把尖棍放到肩上。

「出面仲有幾十隻等緊你。」我說

「睇我表演啦！」牙賢自信滿滿地說。

莉亞跟朗怡反著白眼。

「有冇事？」我查看國雄的傷勢。

「..啊....」國雄沙聲地痛吟著。

「睇嚟傷到氣管，嚴重可能會引發支氣管炎。」琪雅說。

「會唔會好嚴重？」朗怡問。

「正常打支消炎針就冇乜嘢，不過依家咁嘅情況，我都唔知點。」琪雅給出建議：「如果有痰就盡量吐出嚟，咁樣會好啲。」

國雄點點頭示意明白。

「好，咁重新出發。」我說。

剛才的打鬥聲看來引起了注意。

「係咪有人啊，救命啊！！」一把男童的聲音喘著喊道。

聲音在第三行貨架那邊傳來。

「我哋喺到啊，你喺邊啊！」朗怡大聲叫出。

驟然，一個男童從「家居/清潔貨品類」貨架跑出。

後面有一個女人正追著他。

女人快速地追趕著，即將捉住男童。

我想把傘飛擲過去，但我不是標槍運動員，他倆的位置極近，一個不小心就會擲錯目標。

我決定冒險一搏，我不救他，他就會死。

當我準備擲出雨傘時。「嗖—」一支鐵釘從我身旁飛出，擊中了女人的臉部。

臉部被槍傷的她停下了腳步。

「吼.......」她怒視著禮欣。

「禮欣，企後少少，佢依家目標係你。」我走到禮欣身前。

「啊仔，快啲跑過嚟姐姐到！」朗怡對著男童招手。

「救吓我媽咪啊，佢無啦啦變咗怪獸啊嗚.....係咪我唔乖啊嗚.....」男童哭著對朗怡說。

「佢唔係你媽咪嚟，姐姐帶你搵媽咪好冇？乖，唔好喊先。」朗怡輕撫著男童的頭安慰着。

「國雄，牙賢，我哋一齊上。」我對著他倆說。

我仨舉著武器慢慢走近前方的女人，她亦往我們這邊衝來。

「喝——！」國雄率先衝前。

「睇我啦！」牙賢舉起尖棍衝向女人。

我走到側面，從她的左邊落手。

國雄把尖棍向著女怪人直刺，女怪人隨即往左邊跳開，避開了第一擊並跳到了我的面前。這時候我伸出右腳往她的腳掃去，想把她踢倒但不成功。接著，女怪人對我回敬一下掃腿，一腳往我這邊踢來，我向後跳開，一架擺放在路上的手推車被踢中，車身被踢至凹陷，飛到國雄身上，國雄隨即倒下。

「國雄！！！！」。朗怡跑去扶著他。

「有冇事啊......」她哽咽地問。

「啊.....」國雄痛吟著，強撐著站起來。

另一邊廂。

女怪人緊接撲到我這邊來，我把傘橫向拿著把她檔住。牙賢衝來趁這機會來一記突刺，突然她猛勁吸入空氣，準備向我噴出唾液，我立刻發力把她推開，把傘打開擋住了這波噁心攻擊。

「牙賢，企我後面先！」我走到牙賢的前方。

我把打開的傘水平握緊，朝著女怪人的方向捅去。由於傘身遮擋了視線，我憑著感覺知道我刺空了。

「下面啊！！！」牙賢提醒我。

我盯緊著傘身下方，準備一腳把她踢開。

「嘣！」我一腳把她踢開。

女怪人完好無損，舞動著雙腿，以示迎戰。

我收起雨傘：「小心啲，佢變咗攻擊模式，睇嚟佢係用腳攻擊。」

女怪人發力跑來，地上傳來輕微的震動，嚇壞了我們。

女怪人一腳踢到貨架，被踢的位置整個爆開，貨品飛散到地上。

「痴線㗎！」牙賢急退了數步。

「走！撤一撤退先！」實力太懸殊了。

我們立馬往貨倉的方向跑著，但女怪人的速度越來越快，即將把負傷的國雄抓住。

女怪人抓住了他的上衣，國雄隨即來一個金蟬脫殼成功逃去。

她把惠康的職員外套掉在地上狂踩，瞬間變成了布碎。

我們把門鎖上，躲到倉貨後方。

「點解媽咪會變成咁㗎.....」男童又想哭了。

「噓...乖，唔好講嘢先。」朗怡把手指放到嘴前。

「呯—呯—呯—呯—呯—」鐵門發出一下又一下的巨響。

「再係咁唔係辦法，搵嘢頂住道門先。」雅琪說。

「我去開部唧車頂住。」世凡走向唧車。

唧身本身載著數箱重型貨品，應該足夠抵擋衝擊。

一番整頓後，終於暫時安全。

我們走到男童面前。

「小朋友，你叫咩名啊？」莉亞微微彎下腰問。

「我叫林梓強。姐姐，我媽咪做咩啊？」

「........」我們都無言以對。

「嗱，梓強乖。不如你講吓，你媽咪發生咩事先？我哋要睇吓點樣幫佢。」朗怡溫柔地說。

「本身我同媽咪同埋工人姐姐一齊嚟惠康買嘢，突然啲人無啦啦走晒同埋大叫，我哋好驚，工人姐姐就跑走咗。」男童憶述著。

「咁你同媽咪冇走到？」朗怡問。

「因為媽咪下半身郁唔到，要坐輪椅，跟住我又好驚....跟住媽咪就俾個男人係咁噴口水，跟住就係咁成身震，跟住我驚得濟就匿咗落去貨架下面....跟住....嗚嗚....」梓強大哭起來。

「乖，乖，梓強最乖。」朗怡把梓強抱入懷中。

「估唔到跛嘅都可以起得返身....」牙賢說。

「何止，仲進化埋。」我回應。

「咁我哋依家點啊...」看來禮欣也想哭了。

「國雄，你見點？」我問。

他先被捏傷了頸，繼而又被飛來的手推車擊中，應該再難以行動。

「行..得走得...係入面有..少..少痛..」他以沙啞的聲音回答。

「你好大機會係傷左內臟，我建議你就唔好走咁多...」雅琪說。

「我冇..事....」國雄硬撐著。

「咁樣唔係辦法....陣間嚟多幾隻咁勁嘅，我哋實死....」莉亞慄慄不安地說。

「咁我哋放棄拎眼鏡口罩先，落去睇吓安唔安全。」我說。

現在我們帶著兩個傷者、一個小童，實在無法繼續冒險，只好盡快離開這個鬼地方。

「禮欣，你同我一齊落去睇吓出面咩情況。牙賢，你保護佢哋。」

「交俾本大爺！」牙賢拍著心口說。

門外的女怪人暫時停止了攻勢，但必要時亦需要一個有戰鬥力的人保護著他們，牙賢雖然有點幼稚，但戰鬥力還是有的。

我們從貨倉的後方等待升降機到來。

「會唔會一開門就有十隻嘢衝出嚟...」欣禮握緊釘槍說。

「如果真係咁嘅話，睇嚟我哋要下世再見。」

「唔好烏鴉嘴......」

「明明係你講先......」

「叮噹—」升降機到達我們所在的1F。

「砰通—砰通—砰通—」我倆的心跳加速。

「咔———」升機降門開啟。

空無一人。

鬆一口氣。

「呼....俾你嚇死！」禮欣抱怨著我。

「吓.....」我躺槍。

「要撳幾樓？G樓？」禮欣問。

升降機有2、1、G、B1、B2。

「B1。行停車場上去，G樓分分鐘真係一開就幾十隻企晒喺到。」

「OK~」

升降機慢慢落下，到達B1層停車場。

「B1 ，升降機門開啟，請小心𨋢門。」

「咔———」

我們到達地下一樓停車場，前方有一個小小的卸貨區，擺放著一堆混亂的貨物，工人和貨車早已失去蹤影。

「睇嚟啲人上車走晒...」欣禮望著混亂的貨物說。

我拿起一瓶「寶礦叻」一口喝光「爽晒。」

「係無限薯片任食嘅機會.......」禮欣咽唾地說。

「死心啦，屋企有位都只會放糧食，唔會放零食。」我打破了禮欣的遐想。

「唓......」

「食一包都得啩！」禮欣上前把一箱「卡樂D」拆開。

「嘶—」她打開了一包香辣味薯片，往口裡倒入。

「咔嚓咔嚓咔嚓咔嚓————」

「嗯～～～～好味！！」

「合埋個嘴食啦衰妹，食到Jap Jap聲，係咪想變最後晚餐啊。」我用指骨輕鑽她的頭部。

「Sorry....」她把嘴合起來，輕力的急嚼。

突然...

一個男怪人出現，四處尋找著聲音的來源。

「殊！」我把手掩住她的嘴。