「梓強,入返去先。」朗怡起來想要帶梓強入房。

「我覺得佢都有必要聽埋。」雅琪說。

「但係佢仲細...」

「有啲嘢..遲早都會早,不如早啲俾佢適應。再加上依家咁嘅情況,如果想佢有能力生存,佢就要知道真相。」

朗怡蹲下來跟梓強說:「梓強,聽著。你媽媽已經唔係呢個世上,佢去咗天堂,好舒服咁享受緊,所以你唔駛擔心媽咪,知唔知道?」





「佢係唔係俾怪物殺咗?」梓強問。

「.......係。」

有時候,小朋友其實都知道發生著甚麼事情,只是他們還未能好好管理自己的情緒,哭泣從來只是情緒上的發洩,不代表他們一無所知。

「我要幫媽咪報仇。」

「吓...?」朗怡一臉張口結舌地問。





「我見到媽咪俾怪物殺咗,我想幫佢報仇。」梓強一副已經立定決心的的表情展露在臉上。

「但係....你仲未有能力,呢到嘅哥哥姐姐都未必殺得死佢哋。」

「你哋可唔可以做我師父,教我殺佢哋?」

「呃.....」朗怡霎時間無言以對。

「可以。」我說





「吓??」

「佢仲係個讀緊小學嘅細路咋喎!?」朗怡十分驚訝。

我走到梓強面前。

「梓強,你幫媽咪報仇嘅決心有幾大?」

「999999兆個宇宙咁大!」

「你有冇乜嘢擅長?」

「我打機好叻,畫畫好叻,玩搖控車好叻,我仲識得背晒九因歌!」

「好!夠晒!以後你就係我哋戰鬥部嘅一份子!」





「知道師父!」

大家都目定口呆地望著我,等待著我交代。

「最親嘅人給予嘅力量,唔簡單。」我望一望雅琪跟禮欣。

「但佢點同怪人打啊..?」禮欣問我。

「有時候唔一定要打嘅,對付佢哋唔一定要硬碰硬,好似我哋用唧車擋住道門唔俾女怪人入到嚟,其實已經係我哋間接贏咗,係咪?」

禮欣點點頭。

「依家咁嘅情況,我哋唔係要打敗所有怪人。」





「我哋係要生存。」我續說。

大家彷彿明白到一些道理,但又好像一知半解定點點頭示意明白。

「仲有,我想分享多一件小知識俾大家知。」

「佢哋之中似乎有識得操控其他怪人嘅存在,我同禮欣喺停車場見到隻女怪人,佢唔知念咗句乜嘢,前面兩隻男怪人突然變得好兇猛,力量都提升咗好幾倍。」

「最後俾禮欣殺咗嗰隻?」雅琪問。

我點點頭:「佢哋似乎會匿喺最後,大家留意吓。」

「好。」眾人先後回答,為這場情報會議畫下了一句休止符。

會議結束後,軍叔走來跟我們閒談起來。





「估唔到你哋真係同班怪物打過...」

「其實我哋都係落去搶糧食嗰陣遇到佢哋,可以避戰嘅話,其實我都唔想同佢哋打。」我說

「我睇住好多人衝落樓掃貨,返嚟嘅一半都冇。」

軍叔因為是座頭,所以略知道情況。

「我哋都係好彩,其實我啱啱都差啲永遠返唔到嚟..」

「軍叔,我諗我哋需要整武器,你識唔識?」雅琪問。

「整就唔識,我最多只係識改大槍枝嘅焦耳,但我可以俾啲建議你哋。」





「咁就勞煩晒你。」

「傻啦!唔好咁見外!」

「好!唔好意思,哈哈~~~」雅琪燦爛地一笑。

雅琪笑起來真的很可愛,雖然她對著我很惡,但我真的很愛她,要是她出了甚麼意外,我想我也會失去生存意慾。

「又望住阿嫂淫笑,你條友。」禮欣跑來拿捏我。

「你除低咗口罩之後,牙賢夠望你望到入晒肉啦。」

「吓?」

我倆望向牙賢的方向,來了一個六眼互投,牙賢尷尬地對著我們揮揮手。

「唔好喇啩.........」

臨近傍晚,我們需要為他們準備睡覺的位置,由於我們家的空間不足,所以我打算把隔壁的空置單位借用一下,好讓他們有一個休息的地方。

「軍叔,你識唔識開鎖?」

「識!你俾個萬字夾我乜鎖都開到!」

「咁麻煩你幫我哋開一開隔離個單位道門,我哋間屋唔夠位俾晒咁多人訓。」

「哦,小問題啦,包喺我身上。」

軍叔拿到萬字夾後,正嘗時著把隔壁單位的門打開。

身裝保安服的軍叔在爆門,很大的違和感..

「㗳!」不久,一下清脆的開鎖聲響起。

我本來以為隔壁只是家徒四壁,結果我們發現還有很多家具未被丟掉。

「哇,咁好彩仲有咁多傢俬嘅!」牙賢衝到裡頭。

「我諗係啲工人懶得拆件拎落去垃圾站,留咗喺到。你知部𨋢幾細㗎啦。」軍叔說。

我們都走到單位內打量一下,單位一共三房,房間內的傢俬早已被清空,只餘下大量塵垢。

而大廳則胡亂擺放著枕化、抽屜櫃、三張沒有床鋪的床架以及一張桌子和數張椅子,滿地灰塵。

「訓教嚟講,算唔錯㗎喇。」軍叔說。

「好,大家一齊合力清乾淨佢!」禮欣拿著一桶清潔用品。

忽地,住在旁邊的一戶打開門來。

「咦,你哋係.....」一名少女看見多個陌生人,有點疑惑地問。

「嗨!海莉!」禮欣依然拿著一桶清潔用品。

「哈囉,禮欣,你哋做緊咩啊??」海莉問。

「說來話長,哈哈哈哈!」禮欣也不知道該從哪裡開始說起。

「你哋夠唔夠嘢食啊?我哋仲有好多喎..」海莉啃著一個包,包上的紫菜散落到滿身。

「哇!你嗰個咩嚟㗎,好好食咁喎!」禮欣餓了。

「呢個?我平時懶就整嚟食㗎喇,用個包搽啲牛油果,落啲肉鬆啊紫菜啊,加少少千島醬,就會變成一個外星人都好想得到嘅美食㗎喇。哈哈哈哈哈!!!」海莉傻笑起來。

「俾個我食吖!!」禮欣舉出雙手。

「可以啊~」

「嗱~」海莉從家中再拿出一個包,遞給禮欣。

「!!!!!」禮欣咬了一口。

「好好食啊!!!!!」禮欣差點哭了出來,雙眼發紅。

「好食啊呢~?」

「佢叫咩名!?我要將佢嘅配方好好保存喺地球上,即使世界末日之後,我都要人類之後嘅生物都可以再次品嘗到呢份超越咗人類味覺刺激全身味蕾嘅最高級結晶品!」

海莉摸一摸下顎:「嗯.....佢叫......超級無敵肉鬆紫菜牛油果千島包!!!」

「好名啊!!!我一定會將佢發揚光大!!」禮欣雙目發光。

「嗯嗯!!我哋一齊努力!!」她倆把手繞在一起,一副充滿決心的表情寫在臉上,身上黏滿著散落的紫菜。

「咳咳...你後面好多人望住你。」我提醒禮欣。

「呃....唔好意思大家,我平時唔係咁,係啊哥佢話如果我唔咁樣演場戲令大家開心啲就會逼我同班怪人一齊玩...哈哈哈哈唔好意思...」禮欣尷尬地跑進了海莉的家。

她們從小就是青梅竹馬,經常到彼此的家裡玩,她們的友情甚至能媲美親情。

至於海莉,是一個跟莉亞一樣披著紅髮的青春少女。長有一塊嬰兒肥的小臉蛋,稍有肉地的小身軀,比禮欣略要矮一點。有著一副開朗令人討好的性格,是不少男生的傾慕對象。

是晚,大家都忙於清潔借來的新居,禮欣則跑到海莉的家裡偷懶,就像平日一樣嬉戲玩罵,彷彿令人忘卻早上才經歷過數場生死之戰。

失去了所有通訊方式的我們活在一個資訊完全不流通的孤島,使人麻目於現狀。而平穩的生活亦會使人墮落,往後的日子還有無數未知的危機正等候著我們。

「佢哋就好似唔記得晒今日發生過嘅事咁。」我跟雅琪看著正在打掃的大家。

「呢啲可能就係苦中作樂,如果永遠將自己沉醉喺末日嘅恐懼下,我諗邊個都會有精神病。」雅琪拿起掃把,結束了短暫的聊天。

「唔通得我一個,仲係好亢奮於殺戮怪人帶嚟嘅快感...」

兩小時後,大家都把新居清潔得一乾二淨。

「好!搞掂!我要瞓喇,攰死!」牙賢直接躺在床架上。

「賢兄,我哋仲有床鋪啊,等我過去拎埋過嚟先瞓啦~」雅琪準備踏步離去。

「噶⋯⋯⋯呼⋯⋯⋯」

牙賢已經酣然入夢。

「又話咁快瞓著都有嘅。」雅琪望著瞬間睡著的牙賢笑說。

「就好似以前嘅盜賊咁,打完一日交就食飯,食完飯就呼呼大睡咁。」我看著牙賢那長長的斜陰。

「佢算唔話得㗎喇,有份出力。而且佢飯都未食,打掃完就瞓,同你講嘅好大出入喎!」

「可能見到佢個樣就好不自覺咁當咗佢係盜賊~」

「莉亞、朗怡,你哋諗住瞓邊到?」雅琪問。

「我想過去照顧著國雄...」朗怡望著我們家的門口。

「咁不如叫佢過嚟瞓啦,起碼有張床,唔駛瞓梳化。」

「都好...我去扶佢過嚟。」

朗怡回來後一直照顧著國雄,替他換冰餵飯。可以看得出他們的關係不是常人能及。

「咁我都過嚟同朗怡瞓啦。」莉亞說。

「但係冇床喇喎。」

「唔緊要,我慣咗同朗怡同床瞓。」

「係..?」雅琪有點驚訝。

「佢係我家姐嚟㗎~哈哈。」

「原來!怪唔知得你哋性格咁似啦!」雅琪恍然大悟。

「其實我哋唔似㗎~我諗你哋只係覺得我哋對住牙賢嘅態度好相似啫~」

「係啊!你哋對佢好惡,笑死我。」

「就好似你對我咁惡....」我細聲說。

「你係咪想死?」雅琪扭住我的耳朵。

「唔係唔係,唔好,痛痛痛!!」我臉容扭曲著求饒。

「哈哈哈哈!!!你哋好搞笑。」

「好恩愛。」莉亞續說,一張羨慕的表情。

我們突然有點尷尬,很少人會說我們這樣是恩愛,大概旁人只會我們是對神經質情侶。

「咁你呢?你有冇男朋友?」雅琪問。

「冇啊~冇人溝~」

「牙賢呢?」雅琪指著呼呼大睡的牙賢。

「佢...?不了....」莉亞一口拒絕。

「哈哈哈咁又係嘅,古靈精怪咁,不過佢都唔錯㗎喇,一開始我都以為佢只係個得把口嘅人,點知佢都有返咁上下膽色。」

「嗯.....係嘅...佢份人係傻咗啲,弱智咗啲,但其實都唔差嘅,係一個九十分嘅好朋友!」

說著說著,朗怡扶著國雄進來。

「國雄,你瞓呢到,方便我夜晚幫你換冰。」朗怡把他扶到中間的床上。

「唔駛勞煩你..啦..你已經為咗我頻撲咗成日...夜晚你就...好好休息下...」國雄斷斷續續地吐出話來。

「黃金二十四小時有冇聽過?我哋已經去唔到醫院,聽話好冇?」朗怡語重心長地說。

「好...對唔住,要你擔心。」

「唉..一個二個閃到爆!」莉亞妒忌地說。

整頓好大家睡覺的地方後,我們也回到家裡休息,我跟雅琪同床共枕,禮欣則跑到海莉家作客一晚。
而梓強、世凡、軍叔則做廳長。

長久的一天終於過去,相信這晚應該很多人跟我一樣難以入眠,畢竟這是將軍澳成為孤島的第一個晚上,不少人亦親眼目睹過怪人甚至已經失去至親,能安然無恙面對的人又有多少個。

翌日,大家莫名很早就醒來,原因莫過於心裡的恐懼使人無法安然入睡,即使身體已經疲倦不堪,但仍是敗給了心魔。

今天,大家都待在家裡休養生息,而且寶琳區已被列為致命武力驅離區域,所有市民都不得離開住所,我們只慢默默在這裡等待著。

然而,我們還沒知道這禁令將會一直實行至將軍澳區所有人死去為止。

「好悶啊,又唔返得屋企又唔落得街,想悶死我哋咩...」牙賢兩手旋轉著攬枕,悶悶不樂地說。

「俾你返到屋企又點,你屋企咪又係將軍澳。」莉亞嗤笑說。

「唓~你咪又係~」牙賢把攬枕飛到莉亞頭上。

「你 係 咪 想 死 ! ?」莉亞拿起攬枕,使勁地往牙賢裡打。

「對唔住對唔住....」牙賢蹲下身雙手護頭。

梓強見狀走了過來:「姐姐,你哋係咪模擬緊打怪物啊?我又想玩!」話畢,梓強就拿起另一個攬枕一同往牙賢打。

「係啊!梓強叻仔!怪物最驚就係俾人打到個頭,只要打中佢哋個頭就會死㗎喇!」莉亞跟梓強有節奏地拍打著牙賢。

這時,禮欣也恰巧回來了。

「咦,玩緊咩啊?」禮欣咬著一條薯條。

「我哋玩緊打怪物啊姐姐!」梓強繼續興奮地拍打著。

「邊個嚟㗎?」禮欣看不見蹲下來的是誰。

「你老友,牙賢。」我嘲諷著。

「牙賢?嗯.....不了~」禮欣悠然地走回房間。

「咳咳,禮欣,你入去先,我有啲嘢同你傾。」我掙大眼睛對著她說。

「吓.....哦.....」禮欣語氣變得心神不安。

我走到門前。「喀喀」門被鎖住了。

「點啊,想消滅證據啊?」

「咩啊...我換緊衫...等陣啦..」房內傳出塑膠包裝紙的聲音。

不久後,「㗳」的一聲。

「入嚟啦.....」

我走到房間內,用眼睛橫掃四周,發現被子內凸凸凹凹,明顯收藏著甚麼不能見光的東西。

我走到床前。

「冇,諗住搵你傾吓計,話晒尋日先同你走過鬼門關~」我躺在床上,被下的包裝袋發出「嘶嘶索索」的聲音。

「咦,咩嚟㗎?你張被入面咁多嘢嘅?」我繼續躺在床上,嘲諷地說。

禮欣按奈不住被我拿捏:「係喇係喇....係我拎咗啲薯片返嚟,對唔住囉.........」她一片可憐的樣子。

「你個衰....」我話還沒說完。

「唔好嬲啦!你知我㗎啦....冇零食唔得㗎嘛....又唔知封到幾時....原諒我一次咁多吖。」她再做出一個更楚楚可憐的樣子。

「唉好啦好啦....話晒都係你有份用條命換返嚟...」我敗給了戲份十足的她。

「但我有一個條件。」我假裝嚴肅地說。

「係....?」

「你要分一包俾我。」我繼續嚴肅的語氣。

「好!!一言為定!!」她從楚楚可憐的樣子瞬間變成笑臉盈盈的小精靈,馬上從被裡拿出一包香辣味薯片給我。

「下次唔好喇!」我用指骨輕輕鑽動她的頭。

「知道.....不過冇下次啦~還唔定聽日就解封返~」

「我睇就唔似。」

「點解?」

「你唔記得地鐵站外嗰班警察?如果真係一兩日就解封,佢哋唔會咁猖狂見人就殺。」我拿起電話:「電話最後收到嘅新聞通知係香港02嘅獨家消息。」

香港02:
「02消息:病變情緒急轉直下,中央或有意永久封鎖事發區域直至患者清零。」
已有 0 人追稿