［愛情純愛］既然忘記唔到佢，不如試下中意我⋯？: 05. 三個月快樂

「嗯。」岑諾新回答，然後同我一齊行去門口

我地經後梯落去，我一直急步行，想快啲離開學校

努力微笑嘅我嘅嘴角仍然顫抖着，手都一樣⋯我好努力咁微笑，但我似乎，就嚟到極限⋯！

「你餓唔餓呀？食唔食嘢？」我問岑諾新，我知佢企我隔離，但我連望住佢講嘅力氣都冇，「定你想唔想去買嘢飲？飲珍珠奶茶好唔好？」

「蔣倩盈。」岑諾新叫咗我一聲



「嗯？」我感覺到連我嘅聲線都一同顫抖着

「你做咩？」岑諾新淡淡地問道，先啱啱踏出學校門口一陣，岑諾新就收起咗笑容

「冇咩呀～」我用力餘力望向岑諾新，用力地微笑着，就好似平日嘅我一樣，「我會有咩呀？」

岑諾新見我冇事就冇再追問，我同佢一齊上咗巴士，沿途我都冇出聲、亦冇睇手機

啱啱凝聚起嚟嘅難受揮之不去，抹都抹唔走⋯



我怕嘅事就喺我踏出洗手間嘅一刻發生⋯

我怕獨自一人見到張景彥，然後同張希童佢地一齊走嘅時候仲要扮冇事⋯縱使詠妍知道我嘅心事，但我嘅難受，佢唔明⋯我亦唔可以表現得咁明顯⋯

「我點解仲未放低佢⋯？」我喺心中問自己，「我想快啲放低佢⋯好難受⋯」

心裏悶悶嘅感覺總喺內心醞釀，上唔到嚟但又落唔到去，我以為自己可以笑笑就算，但原來一切並唔係我諗得咁簡單

當初以為同張景彥和平分手，中意一個人唔一定要同佢一齊，佢開心佢幸福都可以，但原來當事實嚟到眼前時，感受卻完全唔一樣



佢對住孫慧伶笑起嚟嘅嗰一種開心，係我從來都冇見過⋯

雖然我只係親眼見過一次，但佢嘅嗰一個笑容我記得好清楚

嗰種「得到全世界」一樣嘅開心笑容，我從來都冇見過⋯我都唔知由幾時開始，知道自己只係一個代替品⋯

因為我唔想回想去嗰段記憶，但個天似乎要同我作對一樣，佢地兩個總係好輕易咁出現喺我面前，佢地甜入心，我卻火燒心

「你同佢一齊開心就好啦～」

佢嗰個衷心祝福我嘅模樣，令我覺得好心痛⋯

喺佢面前，我要忍着淚，要咬着唇，要強顏歡笑

「落車啦。」岑諾新對我講道，我默默地點頭同佢喺同一個站落車



其實我地住嘅地方唔係真係相隔好遠，都算近，同一個站落車後，比較近佢屋企，而我則要再行多少少先到

「你真係冇事？」岑諾新望住我問道，「真係？」

唔好再問啦⋯我真係又會喊⋯！真係真係會⋯！

「點解佢成日都會喺我面前出現⋯！」我輕輕緊握着拳頭，然後伸手拖住岑諾新嘅手，不自覺地用力捉緊咗佢嘅手，「點解佢仲可以笑住咁祝福我⋯？」

我用力地捉住岑諾新嘅手，佢冇出聲，早就喺我眼眶打轉嘅淚水終於滑過臉頰⋯

「唔知⋯唔好去諗，就會放低。」岑諾新淡淡地開口對我講道

我望住地下，唔敢抬頭，唔想比人見到我喊嘅模樣，縱使忍唔住都要忍住，偷偷地啜泣着



「你放低咗啦⋯？你放低咗孫慧伶啦？」我反問岑諾新

佢嘅手忽然用力地握緊咗我隻手一下，果然⋯孫慧伶仍然係佢心中嘅缺口⋯

「未。」岑諾新靜咗兩秒後先開口回答我

或者啱啱，佢猶疑緊應該比咩答案我先啱，應該答我放低咗定答我未放低

「咁就分咗手四個月⋯我地，咁就一齊咗三個月⋯」我伸手抹去眼淚，抽抽鼻子

「嗯。」岑諾新細聲地嗯咗一聲

今日其實係我同岑諾新「拍拖」剛好滿三個月嘅日子，我記得係因為我同阿彥分手嘅嗰一日係17號，而喺剛好一個月之後，我同岑諾新就「拍拖」，所以先會記得⋯

「三個月，快樂⋯」我對岑諾新講道，我抬起頭望向佢，努力地，擠出笑容



「笑得好難睇，唔好笑。」岑諾新淡然地望咗我一眼後講道，靜咗兩秒後又講道，「三個月⋯快樂咩⋯？」

「希望快啲放低佢⋯！」我微微一笑講道，「食唔食蛋糕？想食甜嘢開心下。」

我拉住岑諾新同我一齊食蛋糕，雖然佢唔太願意，但最後都係坐咗喺我隔離同我一齊食

「你今日做咩唔講嘢？」我望咗岑諾新一眼，「蛋糕喎，你唔係最中意食㗎咩？」

岑諾新最中意食蛋糕，平日食蛋糕嘅話佢一定會掛上淡淡嘅笑容，仲會同我講蛋糕幾好食幾好食咁，但佢今日竟然咩都唔講，總覺得佢今日怪怪的⋯

「冇咩。」岑諾新望咗我一眼，聳肩道

佢話冇嘢，但我總覺得佢係有啲嘢，不過佢唔想講，咁逼佢講都冇咩意思



反正佢想講嘅時候，就會同我講㗎啦～




IG Link: https://www.instagram.com/nd_cotttoncandy/?hl=zh-tw