［愛情純愛］既然忘記唔到佢，不如試下中意我⋯？: 06. 那一天

「係呢，你今日答咗佢地啲咩？」岑諾新忽然間問起今日晏就嘅事

「唔⋯都冇咩特別，隨便答咗啲嘢。」我下意識回答，我唔太想講番今日我答咗啲咩

「冇講我壞話就得。」岑諾新食咗一啖蛋糕，口中咬住隻叉

「我好地地講你壞話做咩⋯」我無奈地講道，「不過放學嘅時候見到佢，真係有啲不安⋯」

「嗯。」岑諾新望住蛋糕點點頭



「你今日真係怪怪地⋯！」我微微側着頭，直勾勾地望住岑諾新，「你做咩呀？」

岑諾新靜咗落嚟，本來想朝蛋糕嘅手都懸在半空；佢默默地嘆咗一口氣，移開了視線，拎住叉嘅手放低喺大髀上

佢好似真係唔想講，咁我問咁多都唔太好

「我唔可以知⋯？」我下意識地問道，「咁呀，食蛋糕啦～」

我將叉伸向蛋糕，眼尾餘光卻見岑諾新嘅手作然停住，好似冇繼續食蛋糕嘅打算



「孫慧伶今日搵過我。」岑諾新忽然開口

我抬起頭望向佢，拮蛋糕嘅動作都停咗落嚟

「哦⋯」我點一點頭，叉一下子拮蛋糕上，食咗一啖，「佢搵你做咩？」

「佢問我係唔係拍緊拖。」岑諾新嘅叉拮喺蛋糕上嘅士多啤梨上

呀⋯我粒士多啤梨⋯



我目不轉睛地望住岑諾新叉上嘅士多啤梨，我地買咗一件芒果蛋糕一件草莓蛋糕

「我地一齊咗三個月，佢先問我係唔係拍緊拖。」岑諾新輕輕一笑，將拮住士多啤梨嘅叉遞到我面前

算你有良心！哼！

我伸手想接過隻叉，岑諾新動作好快地將士多啤梨放入口，我默默地望住我嘅士多啤梨比佢食咗⋯我嘅蛋糕都唔吸引啦⋯

「諗下好啦。」岑諾新得戚咁望住我，「我心情唔好，要食甜嘢。」

「我心情都唔好！」我不忿地講道，見到佢嘅芒果蛋糕上嘅芒果仲喺度

「冇你份。」岑諾新睇穿我嘅意圖，直接拮起芒果放入口

「你⋯！」我微微鼓起兩泡腮，「哼⋯！」



我同岑諾新都靜咗落嚟冇講嘢，我望一望住岑諾新，佢靜靜地坐喺度食蛋糕

我知道佢好中意孫慧伶，我明白佢嘅想法佢嘅心情，佢好中意孫慧伶，就好似我好中意張景彥一樣

岑諾新總係努力咁克制自己嘅感情，明明難受卻一聲不吭，就好似睇唔到一樣；但我知道佢只不過係強忍住難受，我唔識收起難受，一嚟到佢嘅面前就會忍唔住，可能因為佢係知情者又會明白⋯

「或者佢只係想確認一下呢⋯」我都唔知我係抱住咩心情去講出呢一句

「確認啲咩？」岑諾新食埋最後一口蛋糕，「確認一下我仲會唔會煩佢？我都唔係啲會死纏爛打嘅人⋯」

「我都唔係會死纏爛打嘅人⋯」我默默地耷低頭，細細聲地講道，「所以咪一齊咗⋯」

「我地好似革命戰友咁⋯」岑諾新笑咗一笑，將叉放番喺蛋糕盒入面



「愛情革命？」我不禁笑咗出嚟，自嘲般講道，「不過睇起嚟，似係失敗者嘅愛情革命多啲～」

我拎起手機，翹着二朗腿坐，口中含着叉，因為叉上面仲有啲cream；我自然地睇下IG，呢個年代嘅人就係中意睇IG

每一次打開IG，我心入面都好似會有啲期待，莫名其妙地想睇下阿彥佢會唔會po咗啲咩，story又好出咗post都好，但同時我又好怕㩒開佢嘅story後，見到嘅係佢同孫慧伶一齊

心裏怕，但都會期待⋯想知佢同邊個一齊，做緊啲咩，開唔開心

我地分開咗之後，佢好似過得好好，彷彿只有我因為呢段感情而難受一樣⋯

佢好快就已經move on，但我卻停留喺原地⋯我記得分手嗰一日，佢同我講⋯

「其實我最中意嘅人，一直都唔係你⋯」

佢呢句說話好狠心、好直接，佢話我知佢係為我好，但我一啲都唔好



「講咩呀⋯？突然間做咩⋯？」嗰一日，我好似咁樣諗過

「對唔住，我知我咁樣講好直接，但我真係為你好⋯唔想傷害你⋯」

嗰一日，佢係咁樣同我講⋯聽到佢咁講，我都唔知可以比咩答覆佢，都已經傷害咗啦⋯

諗起嗰一日佢同我講嘅嘢，我不禁一笑，自嘲地笑着，我點可能唔察覺喺佢心中有第二個？畢竟我咁中意佢

「你同佢分手嘅時候，佢同你講咗啲咩⋯？」我收起手機，將手機塞入裙袋

我地之間又開始沉重嘅話題，每次提起張景彥同孫慧伶都會令心情沉重起嚟

「佢話佢覺得我地應該分開，我唔啱佢。」岑諾新講嘅時候下意識微微耷低頭



我諗唔係因為岑諾新唔啱佢，只係孫慧伶覺得冇新鮮感，中意咗張景彥而已，但佢又唔想對岑諾新講真話，只好講呢啲比真話更難聽嘅借口

我同張景彥分咗手個幾星期後，張景彥就同孫慧伶變得好close，而張景彥同我分手嘅原因亦顯而易見




IG Link: https://www.instagram.com/nd_cotttoncandy/?hl=zh-tw