［愛情純愛］既然忘記唔到佢，不如試下中意我⋯？: 09. 我們的Delete

「既然話咗要放低，咁就要刪！宜家刪！」我拎起手機，打開相簿

我既然下定決心，就要做到！我再望一次啲相，今次我真係要刪，將所有最後嘅回憶，一張不漏地刪去

「你會唔會刪剩一張咁樣？」岑諾新忽然用手㩒住我部手機

「唔、唔會囉！我點會呀！」我嘅眉頭輕輕一皺，然後將手機遞比佢，「最多你幫我刪啦⋯我揀晒㗎啦！你幫我㩒delete啦⋯」

「好。」岑諾新接過我部手機，佢望咗我一眼，「我真係㩒delete㗎啦！」



「㩒啦！」雖然心入面有啲唔捨得，但係我下定決心就唔可以回頭

「del晒啦。」岑諾新將手機遞番比我

本來係屬於我同阿彥嘅相嘅位置都冇晒，相簿中所有與張景彥呢個人有關嘅相都刪晒，今次我真係下定決心放低啦⋯

「嗯。」我點一點頭， 將手機放低喺枱上，「你呢？你唔del？」

「del。」岑諾新爽快地回答道，然後拎起自己嘅手機del相，「嗱。」



岑諾新將佢嘅手機遞比我，我抬頭望一望佢

「幫你㩒delete？」我問道

「嗯。」岑諾新點一點頭

我用指尖㩒咗一下喺右下角嘅垃圾桶，然後㩒「Delete」

「Del晒啦。」我抬眼望佢，「重新開始啦⋯」



「嗯。」岑諾新望住手機嘅螢幕兩秒，然後默默地將手機螢幕鎖上

的確，要狠下心係好難，心裏好似穿咗一個窿一樣，空洞嘅感覺從心底湧出嚟

「係呢，原來你仲有個妹妹～」我唔想再將氣氛停留喺呢個尷尬嘅情況，於是將話題一轉，「佢幾年班呀？」

「二年級。」岑諾新將手機放到手邊

「琴日見佢好似好驚你咁，但佢又好中意你咁～」我笑一笑，諗起佢妹妹望住佢時嗰個怯怯嘅樣，但轉頭又想要攬哥哥

「因為我會鬧佢，所以佢會驚我。」岑諾新諗咗一諗後講道，托住腮望住我，「講起佢，琴日真係多得佢唔少。」

「多得佢唔少？點解？」我不解地問道

「琴日我媽問你係我同學定女朋友，我本來想答佢係同學，但我都未答到出口，我個妹勁快咁喺隔離講『哥哥同嗰個大姐姐拖住手』⋯」岑諾新一臉無奈咁答我



「噗⋯」我忍唔住笑咗出嚟，「小朋友嘛，童言無忌。」

「多口。」岑諾新淡淡地講道

「我仲以為你會係嗰啲寵妹狂魔之類添～但原來你對住個妹都係咁。」我諗起琴日岑諾新皺起眉頭望住佢妹妹嘅模樣

「諗太多。」岑諾新搖搖頭，「未去到妹控嘅地步。」

聽到岑諾新嘅說話，我不禁又笑起嚟，佢嗰個無奈嘅語氣配上佢冷淡嘅眼神，總覺得有啲好笑

我拎起手機，望到手機螢幕亮起嘅一刻，我記起啱啱將相簿內同名彥有關嘅相都刪晒嘅事，心裏果然都係空盪盪的⋯

「後悔呀？」岑諾新問道，喺我抬眼時，見到佢望住我



我睇起嚟有失落咩？只係覺得心裏空盪盪啫⋯

「冇，遲早都會放低。」我望住手機輕輕一笑，聳聳肩，「後唔後悔又有咩分別？」

我托住下巴望向窗外，我不禁一怔，然後緩緩地將視線收回，若無其事地飲咗啖水

「一講曹操，曹操就到⋯」我喺心中講道，「點可能一望出去就見到佢兩個喺出面經過⋯」

「行啦，要番去啦。」岑諾新坐好起嚟，拎出銀包

「呃⋯嗯⋯」雖然有啲唔想走，但的確，Lunchtime就嚟完，都要番學校啦

我同岑諾新一直都係AA制，我將我個份嘅錢放到枱上，岑諾新拎住錢同單行出嚟，經過我身旁；我同岑諾新行出餐廳，我行緊嘅時候什至都唔太想抬頭望前方

「行路唔該你望前面。」岑諾新伸手托起我下巴，要我望住前面行



我一抬頭，就見到阿彥同孫慧伶喺我地嘅正前方，我下意識又想耷低頭，想迴避開前面兩人嘅身影，佢地，好礙眼⋯

「望前面。」岑諾新又將我嘅頭托番起，我又再一次望向前面

我抬頭望向岑諾新，岑諾新卻輕輕掐住我嘅下巴，逼我望住前方，然後細聲地對我講咗一句：「望住我有咩用？」

「煩呀⋯」我扁扁嘴，「我都唔知⋯」




IG Link: https://www.instagram.com/nd_cotttoncandy/?hl=zh-tw