［愛情純愛］既然忘記唔到佢，不如試下中意我⋯？: 08. 我決定了⋯！

我沖完涼換好衫後行出廁所，坐喺書枱前用毛巾將頭髮擦乾

「長頭髮真係好麻煩⋯」我喺心中默默地抱怨道，我諗女仔會比較有共鳴

我將毛巾搭喺頸上，然後拎起放喺風筒吹頭

有時覺得，中意一個人真係會好攰好辛苦，特別係當佢曾經屬於你，但宜家唔係嘅時候

有時會stalk下佢嘅IG，偶爾會諗起同佢一齊嘅時候嘅點滴，但記起嘅時候，心卻覺得難受，本來甜蜜嘅回憶都變成咗令我難受嘅原因



「阿彥佢⋯到底係抱住咩心情同我喺埋一齊⋯？」我靠喺櫈背上，問自己一個已經問咗無數次，但都唔會有答案嘅問題，「佢有冇一刻中意過我⋯？」

我有啲唔甘心，我中意阿彥嘅一切，佢嘅笑容、佢嘅聲線、佢嘅優點缺點⋯我都中意；但佢最後同我講，我一直都唔係佢最中意嘅嗰個人時，難受⋯撕裂一樣嘅痛⋯

我曾經好想知道，到底佢心中最中意嘅嗰個人係邊個，直到我見到佢同孫慧伶一齊嘅時候⋯原來佢最中意嘅人，係佢⋯

佢對佢露出嘅笑容，係我從來都冇見過，嗰一種發自內心嘅甜意，嗰一種開心係特別唔一樣

「佢同我分手，就係因為要同孫慧伶一齊⋯」呢個係我已經知道嘅答案



岑諾新同孫慧伶分手嘅時間比我地早個幾星期，然後就係阿彥同我講分手，再然後就係阿彥同孫慧伶一齊咗⋯就好似一場有預謀嘅表演一樣

「呀⋯煩死⋯」我喺心中講道，又嬲又傷心，但我無能為力

「見到你冇事就太好啦！仲擔心⋯」

「你同佢一齊開心就好啦～」

腦海中不斷迴盪着呢兩句說話，出自其他人口裏都唔緊要，但出自張景彥嘅口裏，感覺截然不同



佢擔心我同佢分咗手之後會唔開心，定擔心啲咩⋯？擔心我會自殺？我又未至於愛到要失去理智

「唉，算啦，睇下手機算啦⋯」我自言自語地講道，拎起手機

都係唔好諗咁多，既然決定咗要放低，咁就冇諗咁多嘅必要，應該⋯

我無聊咁睇下自己手機嘅相簿，之前同阿彥一齊嘅時候影嘅相都仲喺度，我冇刪到，一張都冇刪去

我唔捨得將呢啲相刪去，係最後保留落嚟嘅回憶，可能張景彥已經將呢啲相一張不留咁刪去，只有我先會仲keep住仲留戀

宜家佢同孫慧伶一齊好似真係好開心好幸福咁，我都已經冇繼續留戀嘅必要⋯既然中意佢，既然佢已經得到幸福，既然佢亦已經覺得開心，同到佢真係想喺埋一齊嘅人一齊，我亦應該好好放低

佢已經放低咗我，我亦唔應該繼續執着落去，放低就好啦！

我拎起手機，send咗個message比岑諾新：我已經決定咗，我要放低佢啦！真係真係要放低！



⋯

「你琴晚搞咩？」岑諾新手上拎住餐具，細細聲地問我

「咩搞咩？」咬着麵包嘅我不解地問道

「個message。」岑諾新又講道

一離開咗學校出去食lunch，岑諾新嘅態度就冷冷冰冰的，不過我都習慣咗佢呢一面㗎啦⋯今日係我地一齊食飯，得我同佢，兩個人

「就係字面嘅意思。」我一臉輕鬆地回答，「我決定好㗎啦～繼續執着落去，都唔係一件好事，與其一直唔開心一直難受，不如快啲放低，咁樣唔係更加好咩？」

「嗯。」岑諾新點一點頭，然後又繼續睇佢嘅手機



「你要唔要一齊？」我問道

岑諾新抬眼望我，靜咗一靜，可能係諗緊我嘅提議實唔實用之類

「你諗下～」我上身向前湊近，岑諾新見琴我嘅舉動都將身子前傾，於是我細細聲地講道，「如果我地都放低咗，咁就冇繼續一齊嘅必要啦！我同你都可以回復自由身～」

「都啱。」岑諾新點一點頭，睇嚟佢都覺得我呢個提議唔錯，「不過你會唔會轉頭又放唔低？」

「你睇少我呀？」我抬一抬下巴，以表示自己嘅自信，「你先係唔好退縮嗰個呀！」

「吓？我又唔係你。」岑諾新輕視我一樣笑咗一笑，「我一定唔會好似你咁猶疑。」

「咩呀！」我聽到岑諾新對我嘅輕視，心裏不忿，「我琴晚已經將貼喺房門後面同佢一齊影嘅嗰啲相掉晒啦！」

「哦？真係下定決心咁喎。」岑諾新輕輕挑眉



呵～估唔到呢～我可係講得出做得到！

「咁你手機入面嘅相del咗未？」岑諾新望咗我嘅手機一眼，然後托住腮望向我

「呃⋯未。」我心虛地耷低頭食嘢，將三文治放到嘴邊

我悄悄抬眼，見到岑諾新嘅嘴角微微揚着，岑諾新！你特登嘅！

「我未刪啫！唔通你刪咗？」我反問岑諾新，岑諾新默默地移開了視線

「未。」岑諾新飲一喺凍咖啡，我不禁一笑，原來你都未刪，「你都係啱啱先講話要放低，我都啱啱先決定。」






IG Link: https://www.instagram.com/nd_cotttoncandy/?hl=zh-tw