［愛情純愛］既然忘記唔到佢，不如試下中意我⋯？: 12. 放下，好難⋯

「叮噹叮噹⋯叮噹叮噹～」

係放學前嘅最後一個小息，陣間上埋最後嘅兩堂，又到咗放學嘅時間

我拎出schedule book睇下聽日有咩測驗，我有兩本schedule book，一本係每月行事曆，一本係每週行事曆，每月行事曆用嚟mark低測驗、考試，而每週行事曆就等於我嘅手冊一樣，用嚟mark功課嘅

我坐喺自己位靜靜地睇手機，依舊係用筆袋擋住，我望一望岑諾新，然後起身走向佢，佢側着身坐同楊朗然傾緊計

「喂喂！睇下！」我拎住手機行到岑諾新面前，佢抬起頭望我，我將手機遞比佢睇



我比佢睇嘅係一間蛋糕店出嘅新品，北海道3.7牛奶卷，有原味、朱古力味同士多啤梨味

中意食甜品嘅我想食，咁中意食蛋糕嘅岑諾新應該都會對呢個新品好有興趣

「下次去食。」岑諾新望到我嘅手機螢幕後，抬頭望向我一笑，「我想試呢個朱古力味。」

「好似好好食，我想食呢個原味。」我笑一笑講道，食一食甜品，咩煩惱都會少啲

楊朗然望住我同岑諾新，有啲愕然咁望住我地，我眼尾瞄到佢嘅愕然表情啦已經



「做咩呀？」我望向楊朗然，微微側側頭，「你都想食？」

「佢以為你會嬲呀！」岑諾新嘅視線緩緩地落到一臉愕然嘅楊朗然度，「我都話咗，佢唔會嬲㗎啦～又唔信我。」

「嬲？嬲咩呀？」我不解地問道，「突然間做咩嬲？」

「你見到男朋友嘅前任咁樣撞落嚟，你唔嬲咩？」楊朗然問道，岑話新嘅手放喺楊朗然嘅枱上托住頭，無奈咁同我對望着

「有咩好嬲？」我反問楊朗然，「冇嬲嘅必要呀～」



「冇嬲嘅必要！？」楊朗然訝異地張開口，「你有冇大量到咁呀？」

「你咩意思？我好小氣咩宜家？」我微笑着望住楊朗然，以微笑表達我嘅不滿，「而且，唔係我大量，而係信任，所以冇嬲嘅必要呀～」

唉～呢啲客套嘢都要做到足，我簡直就係一個完美「女友」，岑諾新托住頭望住我，嘴角微微揚起，睇嚟我嘅「男朋友」好滿意我嘅回答

「係唔係真係睇得咁開呀？」楊朗然似乎唔太信我講嘅嘢，佢隨即拍一拍岑諾新，「你地啱啱一齊咗冇耐佢先咁好咋，去到半年嗰陣就唔係咁講㗎啦⋯！」

「你諗太多啦～佢先唔會嬲呢啲無謂嘢。」岑諾新聳肩，我企喺佢隔離點點頭

一齊半年？都唔知係唔係真係一齊到半年，可能喺過半年之前，我同岑諾新已經分咗手

我眼睛嘅餘光睇到有人喺出面行過，我唔知點解好自然咁就抬起頭望向窗外

「⋯！」



我一抬起頭望向窗外，就見到張景彥喺出面經過，但令我愣咗一下嘅，係我同佢嘅視線剛好對上

「蔣倩盈！唔好避⋯！」我喺心中提點自己，「唔好避⋯！」

我喺心中提醒咗自己之後，想假裝若無其事一樣緩緩耷低頭，但喺我耷低頭之前卻見到張景彥比我更快移開視線

我嘅心緊緊地揪咗一下，然後緩緩地耷低頭望向岑諾新

「做咩咁嘅樣？」岑諾新好快就察覺到我嘅視線落喺佢身上一樣，疑惑地問道

「冇。」我頓時擠出微笑，搖搖頭

岑諾新嘅眉頭輕輕一皺，仍然望住我，視線仍然停留喺我嘅身上



「做咩？」岑諾新再問一次，楊朗然都望住我

「都話冇嘢。」我笑咗一笑，用笑容掩蓋自己心中嘅難受，「我冇嘢呀！」

「真係？」岑諾新好似要睇穿我一樣問道

「嗯、嗯！」我就好似平日一樣笑起嚟，點一點頭，「當然！」

如果課室裏冇其他人，我一定會毫不猶疑咁對岑諾新講出所有難受⋯但宜家課室有太多人，我講唔出口⋯

「我去個洗手間先。」我自然地微笑道，然後急步行出課室

我行入廁格將門鎖上，我靠着廁格嘅門，手放喺胸口前

「哈⋯哈⋯」我鬆咗一口氣，本來壓喺心頭嘅大石都好似鬆開咗一樣



我果然都係會做唔到係唔係⋯？

我一見到佢就會想避開，我果然都係做唔到係唔係⋯？

點解要放低一個人會變得咁難⋯？因為佢係得嘅初戀？因為佢咁對我？因為我中意得太深？到底係因為點解⋯？

「叮噹叮噹⋯叮噹叮噹～」

打鐘啦，輕輕皺起眉頭同時深呼吸，將唔開心壓到去心底，然後又好似冇事發生一樣離開廁所番去課室上堂




IG Link: https://www.instagram.com/nd_cotttoncandy/?hl=zh-tw