［愛情純愛］既然忘記唔到佢，不如試下中意我⋯？: 13. 真的好痛

今日最後一堂係選修科嘅堂，仲要遲咗成10分鐘落堂⋯

我番到課室嘅時候，個個都執好嘢要走一樣，我行番埋自己位執嘢

岑諾新向我走嚟，我正蹲喺locker前，將唔洗用嘅書都放晒入locker入面

「你、你仲喺度嘅？」我抬頭望向岑諾新，口窒咗一下

「吓？等埋你囉⋯」岑諾新聽到我咁問之後一臉疑惑地輕皺起眉頭，「平時都係一齊走㗎啦⋯」



「哦、嗯！係喎～」我尷尬地邊笑邊將locker門閂上，再扣番個鎖

「倩盈我地走啦～聽日見啦～」詠妍同希童、樂恩一齊走向我，詠妍望咗岑諾新一眼，「拜拜～」

「拜拜⋯！」我微微一笑，同佢地揮揮手，然後先再企起身

我同岑諾新一樣望住佢地踏出課室門口嘅身影，我默默地行番埋位孭起書包

「番去啦⋯！」我對岑諾新講道，「行啦～」



我徑自地走，直接朝門口行去，岑諾新跟上我嘅步伐，行喺我嘅身旁

「今日你想去邊？」

「冇所謂呀～不過有啲肚餓，想去食嘢先～」

「好呀。」

一踏出課室門口行咗兩步，就見到唔想見嘅人



甜蜜嘅對話，聽起嚟真係羨煞旁人呢⋯

我微微將頭耷低，但又想抬起頭，我稍微抬眼望向張景彥

「佢一眼都冇望我⋯」我喺心裏有啲失落，「佢眼入面，就真係只有孫慧伶啦⋯」

佢已經係屬於人地㗎啦，唔再係我男朋友啦⋯但佢，真係有屬於過我咩⋯？

「岑諾新⋯」我望向岑諾新，岑諾新剛好望向我，我下意識地對佢微微一笑

「點呀？」岑諾新用平穩嘅語氣問我，伸手放到我頭上

佢好自然⋯我知佢係做比人睇，但佢真係做得好自然⋯明明仲在意，明明仲會難受，但佢完全唔會避開

好厲害⋯



「呼⋯」上到巴士後，我一坐低就瞬間鬆咗一口氣，但感覺都係沉甸甸的，胸口悶悶的

岑諾新耷低頭望住手機，但係手機明明仲係喺鎖屏狀態，佢都唔係睇緊手機⋯只係單純都睇緊螢幕⋯

我地一直都冇出聲，大家都冇講嘢⋯或者大家都沉澱緊⋯

時間真係會沖淡一切⋯？

我同岑諾新一同落車，一同行番屋企，我可以講啲咩⋯？明明同佢講嘅話，佢一定會明白我諗緊啲咩，明明心入面好難受，真㗎⋯

今日番屋企嘅路好漫長而且格外寧靜，風吹郁樹，樹葉磨擦嘅聲音聽起嚟都好似笑緊我一樣

我唔係應承咗自己要放低㗎咩⋯？我做緊啲咩呀到底喺度⋯？難受啲咩⋯？



做咩要為一個冇愛過自己嘅人難受？知唔知自己做緊啲咩⋯？我都想笑笑就算，但我⋯但我⋯但我真係真心中意佢⋯！

「岑諾新⋯」我伸手拉住岑諾新嘅手腕

岑諾新停下步伐，轉身面向着我，我喺佢眼中睇到自己嘅神情，我心裏覺得，呢一刻嘅佢嘅神情，同呢一刻嘅我嘅神情係一模一樣，佢扮得再自然都好，我都睇得出

我朝岑諾新行近一步，微微掂起腳尖攬住佢，我將頭埋喺佢嘅頸窩中，我唔想講任何嘢⋯因為一開口就會講出軟弱嘅說話

「忍夠啦終於都⋯？」岑諾新嘅語氣夾雜住無奈，我唔知道呢一刻嘅佢嘅臉上掛住點樣嘅表情

佢早就睇穿咗我嘅把戲，睇穿我微笑嘅背後收起嘅一面

喺佢面前，我扮再多都一樣，因為我地感同身受

「嗯⋯」我點點頭，「忍唔到落去啦⋯！我難受！我心痛！好痛呀⋯！」



「嗯，我知道。」岑諾新嘅手輕輕攬住我，「我見到⋯」

「我忍得好辛苦⋯！」我忍住唔喊，我唔可以總係喊，唔可以咁軟弱，「喺所有人面前忍得好辛苦！」

喺岑諾新面前，我終於可以講出自己嘅難受，終於唔洗再忍落去⋯

我知道岑諾新都難受，但佢通常都係聽我講嗰一個，當佢忍無可忍嘅時候就會爆出嚟；而今日嘅佢，仍然好叻咁忍耐着一切

「我係唔係好冇用⋯？」我不禁問岑諾新，「我明明已經堅決咁決定好放低⋯」

我覺得自己好冇用，我會忍唔住去諗佢，忍唔住去望佢，但一望，難受嘅卻只有我一個人

今日放學嘅時候，張景彥一眼都冇望過我，我個心係真係用力咁、狠狠地揪咗一下



心好痛⋯！真係，好痛⋯！




IG Link: https://www.instagram.com/nd_cotttoncandy/?hl=zh-tw