［愛情純愛］既然忘記唔到佢，不如試下中意我⋯？: 15. 我們有了交集的那天

「到底阿彥諗緊啲咩⋯」我一個人喺閂晒燈嘅課室執書包

我望住出面嘅天空，已經黃昏啦⋯課室內嘅窗開着，風從窗吹入嚟

「今日有啲涼⋯」我望向外面，枱上仲放住筆袋同筆記簿

我拎起放喺枱上嘅筆記簿，但卻冇將佢放入書包嘅打算，我只係呆望着外面嘅天空

「對唔住。」



阿彥最後同我講嘅一句說話，係對唔住⋯點解要同我講對唔住？因為一直以嚟中意嘅人唔係我，所以要講對唔住⋯？的確係需要講對唔住嘅事嚟⋯

腦海中全都係佢同我講分手時對我講嘅說話，放唔低嘅只有我一個人⋯佢講嘅每一句說話都喺我腦海中不斷重複出現

喺學校好難見唔到佢，我地仲要同級，但一見到佢，我就會下意識咁避開⋯

「唔緊要⋯」

係我最後對佢講嘅嘢⋯對佢嘅體諒，都算係我對佢最後嘅溫柔，對吧⋯？



「阿彥，我真係唔明你⋯」我喺心中默默地講道

外面嘅景色忽然模糊起嚟，我眨一下眼，臉頰⋯濕濕的⋯一滴水珠滴到我嘅手背上⋯

最近我都係處於呢種狀態，喺學校好努力咁微笑，但當只有我自己一人嘅時候，我嘅情緒就會崩潰⋯眼淚自然地將眼眶濕潤起嚟

然後我又唔爭氣咁喊⋯

我好似從來都冇試過咁中意一個人，應該話，阿彥係我嘅初戀，係我第一次嘗到戀愛嘅滋味



但我冇諗過，原來人人口中甜甜嘅戀愛嚟到我呢度，會係咁苦澀，到底係出咗啲咩問題？

「嘎—」

我聽到有人喺課室拉開櫈嘅聲音，我將眼淚抹去，但始終都冇望過去睇下係邊個

嗰個人執緊書包，因為傳嚟清脆嘅紙張磨擦聲

「快啲走⋯」我喺心中默默講道，希望嗰個人快啲走

但偏偏⋯！

「你仲喺度嘅？」我聽到佢對我講嘅時候，聲音離得好近

偏偏呢個時候同我講嘢，我話你都太唔識睇氣氛啦掛⋯！



「哦，係你呀？」我深呼吸，然後望向佢，帶着逞強嘅笑容

「你唔開燈嘅？我仲以為課室冇人。」岑諾新對我講道，佢企喺離我唔遠嘅地方

「哦⋯發呆啫～」我擠出笑容對佢講道

平日岑諾新都唔會同我講嘢㗎⋯今日做咩行過嚟同我講嘢⋯？

眼睛嘅餘光瞄到有人喺外面行過，我嘅目光聚焦喺嗰個喺走廊經過嘅人身上

「佢笑得咁開心嘅⋯？」我望住我嘅初戀，我嘅前任，心裏苦笑道

我嘅眼尾瞄到岑諾新都望住出面，但佢應該唔係望緊阿彥呀，咁佢望緊⋯



「孫慧伶？」我呢一刻先留意到喺阿彥嘅身旁企咗孫慧伶，兩人有講有笑的

岑諾新好似係孫慧伶嘅男朋友，咁佢仲企喺度做咩？佢唔係應該追出去搵孫慧伶㗎咩？定佢嬲到唔知點算？

「呃⋯你唔追出去？」我望住岑諾新緩緩開口問道，岑諾新一副欲言又止嘅表情望向我，「你唔去追番你女朋友呀⋯？」

岑諾新望住我，然後又望一望外面

「已經唔係我女朋友。」岑諾新講道，我有啲愕然咁望住佢

我係唔係講錯嘢⋯？難怪岑諾新啱啱望住孫慧伶，望向我嘅時候又一副欲言又止嘅表情

「你唔出去？張景彥喺出面。」岑諾新問番我轉頭，睇嚟佢唔知道我同阿彥已經分咗手

「都已經，唔係我男朋友啦⋯」我微微耷低頭



課室內嘅空氣瞬間凝固咗一樣，冰冷、尷尬嘅感覺一次過襲來

我再次抬起頭，呢一刻嘅我先留意到岑諾新嘅雙眸黯淡咗落嚟

喺佢身上，好似睇到自己一樣，明明佢咩都冇講，但我好似可以感受到佢嘅感受一樣，嗰種心痛、嗰種難受、嗰種無能為力⋯

冇諗到，我同岑諾新嘅交集會係咁樣開始，以憂傷作係話題嘅開端

⋯

我同岑諾新上咗巴士，行到上層坐低；一坐低，我地就開始各自睇手機

「你有冇follow我IG？」我見佢睇緊IG便順口一問



「我點解會冇follow你？」岑諾新又反問番我轉頭，「之前咪follow咗。」

「哦，我只係隨口一問。」我笑咗一笑，然後聳肩

我望向車窗外，今日有陽光，天氣都唔錯，我貼近玻璃抬頭望，今日個天都幾清

「今日藍天白雲。」我覺得我嘅心情幾靚，可能因為今日去食蛋糕，而且天氣好


 IG Link: https://www.instagram.com/nd_cotttoncandy/?hl=zh-tw