［愛情純愛］既然忘記唔到佢，不如試下中意我⋯？: 16. 不是約會

「天氣好好。」岑諾新都探頭一望，然後又坐番好，「好啱去食蛋糕。」

「話知佢今日落雨呀！我都要去食蛋糕！」我對岑諾新講道，「陣間我要食嗰個原味牛奶卷！」

「有冇圖睇？」岑諾新忽然問道

「我好似有save低⋯」我打開IG，我記得我好似有save低

第一個po就係嗰間蛋糕店嘅po，我將手機遞比岑諾新睇



「你想食邊個？」我問道，「朱古力？」

「都好。」岑諾新望住我嘅手機螢幕

我地落咗車之後行咗一陣就到咗嗰間蛋糕店

「坐呢度？」我行到去貼住窗邊嘅位，岑諾新點一點頭

「除咗蛋糕仲想食啲咩？」我將放喺枱上嘅餐牌遞比岑諾新睇，「我出去買啦～」



岑諾新拎住餐牌望一望周圍，佢望緊啲咩？我有啲好奇，便跟住佢一齊望，望向佢望緊嘅地方

喺細細嘅餐廳內基本上只有女仔，畢竟呢度嘅裝修都好少女風，完全就係粉色系，少女心滿滿，裝修咁靚嘅原因，大多數都係因為想吸引啲女仔嚟打卡

「朱古力。」岑諾新將餐牌遞比我

我將餐牌放番喺一旁，然後企起身，點知岑諾新同我一齊起身

「你起身做咩？」我望向同我一齊行向收銀處嘅佢



「唔同你一齊去買，自己一個男仔坐喺度，唔自在。」岑諾新有啲尷尬咁講道

我笑了笑，行到去收銀處前落單，望住另一個企喺玻璃蛋糕櫃前嘅員工將玻璃門趟開，拎住鐵夾，小心翼翼地將兩件蛋糕夾出嚟放到白間金邊嘅長方形瓦碟上

「係，小姐你嘅牛奶卷同朱古力卷。」店員將放咗兩件蛋糕卷嘅瓦碟放到蛋糕櫃面

「唔該～」我伸手拎起瓦碟，小心翼翼地行番位坐低

食之前當然當然！要幫兩件蛋糕影張靚相po個IG story先啦～難得今日心情靚仲可以食好嘢～我當然要令成件事變得完美啲～

「洗唔洗@你？」我影完相打上caption嘅同時問岑諾新

「冇所謂。」佢微微聳肩，我便喺story上@咗佢

雪白嘅牛奶卷嘅面上有吱咗一個S型嘅cream，cream上除咗有幾粒白色嘅食用珠仔外，仲插咗一塊正方形朱古力片，上面印咗呢間蛋糕店嘅名；啡色嘅朱古力卷上亦都吱咗S型嘅cream，不過個朱古力嘅啡色，上面放咗兩條短嘅扭紋朱古力條，喺朱古力條嘅旁邊插住正方形嘅朱古力片



「食啦～唔知好唔好食呢～」我拎起叉，切咗一細件放入口試味，「哦～好香呀～」

我豎起手指公比個讚，牛奶嘅味道喺口中滲出嚟，濃濃嘅香味喺口中，聞起嚟都好香牛奶嘅味道，甜而不膩

岑諾新拎起叉食咗一啖佢嘅朱古力味，我見佢嘅雙眼內忽然發光一樣明亮起嚟

「好唔好食？會唔會好甜？」我好奇地問道

「唔會，但好香朱古力味⋯！」岑諾新好賞識呢個蛋糕卷睇嚟，因為佢臉上掛着淡淡嘅笑容，而佢嘅笑容中我感覺到幸福嘅感覺，「你嗰個甜唔甜？」

「適中適中，好香奶味～」我點點頭，伸手用叉切多一塊放入口，「我可唔可以試一啖朱古力？」

我對佢食緊嘅朱古力味都有啲好奇，所以都係問佢一聲，點知佢會唔會唔比我食



「嗯。」佢點一點頭

我一見佢點頭，即刻就切咗一小舊嚟試，果然好濃朱古力味！好香好好食！

「今次真係嚟啱地方啦～」我滿意地笑道，「食到好嘅蛋糕好開心～」

「嗯。」岑諾新回答，佢切咗一小塊牛奶味嘅蛋糕卷試味，「你呢個都幾好食。」

「陣間行陣先番去不如。」我講道，冇理由出嚟食完個蛋糕就番屋企㗎嘛

「好呀。」岑諾新都冇望我，一直拎住手機睇，不過過我都慣㗎啦

我托住頭望向窗外，坐窗邊位就有呢個好處，冇嘢講嘅時候可以望下出面，睇下外面嘅車同人，當係散下心

我望咗岑諾新一眼，佢一手拎住手機，一手拎住叉，一邊食蛋糕一邊睇手機，幾悠閑嘅感覺



喺人前嘅佢總係擺出開朗嘅模樣，但喺只有我同佢嘅時候，佢就會變番原本嘅佢，冷淡為多，佢都會笑，但同喺學校嘅佢相比之下就差得遠

我都懷疑過佢係唔係討厭我⋯之前唔慣佢咁樣，所以特登問佢，佢淡然地答：「我本來就係咁。」

我都冇再深究原因，呃⋯佢唔係討厭我咪得

呀⋯要話比我媽知我今晚番唔番去食飯，差啲唔記得咗

「今晚你番屋企食定點？」我問道，但冇人應我

我望過去岑諾新嗰邊，見到岑諾新望住手機螢幕發呆，我都唔知佢係好專心咁諗緊嘢定真係發緊呆

「岑諾新？」我叫咗佢一聲，佢先抬眼望我，「你發咩呆？」



「冇。」岑諾新諗都冇諗就答我，「你啱啱問我啲咩？」




IG Link: https://www.instagram.com/nd_cotttoncandy/?hl=zh-tw