［愛情純愛］既然忘記唔到佢，不如試下中意我⋯？: 17. 他的妹妹

「問你今晚番屋企食飯定點。」我托住腮一邊食蛋糕卷一邊無奈地講道

「哦。」岑諾新哦咗一聲之後就耷低頭繼續食嘢

即係點⋯即係番屋企食定一定食⋯？

「即係你番屋企食定一齊食⋯？」我無奈地追問道

岑諾新抬起頭，一臉猶疑咁望住我



所以啱啱個「哦。」係答緊啲咩⋯宜家睇起嚟，可能佢連我啱啱問緊咩都唔知，只係隨口答我一個「哦。」

「你想？」岑諾新問番我轉頭

「呃⋯」我頓時塞咗一下，我都有啲疑惑，都未諗好應該點，「你有冇咩想食？」

「你有咩提議？」佢又問番我轉頭

「食唔食⋯拉麵？咖哩？Burger？」我不斷提出唔同嘅提議，因為我都唔知食咩好，「定⋯煎餃？」



「咖喱？」岑諾新諗咗一陣回答道，「咖哩啦。」

「好呀～」我點一點頭，食咖哩都好，我望一望時間，原來都已經4點幾啦

我地啱啱講完今晚食咩之後，岑諾新放喺枱上嘅手機忽然震起嚟，我望住岑諾新接咗電話，眉頭一皺

「我唔喺屋企。」岑諾新講道，「我同，朋友一齊⋯你晏啲去都一樣。得啦得啦，我陣間去啦⋯」

「做咩呀？屋企有事？」我喺岑諾新收咗線之後小心翼翼地問道



佢無奈咁望咗我一眼，唔知點解我總係覺得佢心情好似有啲唔好⋯

「我媽叫我陣間去接嵐嵐放興趣班。」岑諾新一臉不願意，「又唔一早同我講⋯」

「好遠？」我問道，「你去接佢囉～」

「喺呢度附近嘅商場。」岑諾新將手機螢幕朝下放到枱上，「佢放5點。」

「宜家行去接佢？我地都食完啦。」我拎紙巾抹一抹嘴，「咁今晚點呀？」

「食咖哩。」岑諾新毫不猶疑地回答，「不過要帶埋嵐嵐一齊食，你Okay？」

「Okay呀。」我毫不在意地答應咗，都冇咩所謂

我同岑諾新離開蛋糕店朝附近嘅商場行去



「你個妹學咩？興趣班。」我好奇地問道

「鋼琴。」岑諾新淡淡地講道

「噗⋯」望住佢一臉厭世嘅樣，我就忍唔住笑咗出嚟，「通常有妹妹，哥哥唔係都會好錫個妹㗎咩？你呢個咩嫌棄樣嚟？」

「我冇話唔錫佢，只係我地年紀差太遠，麻煩啫。」岑諾新講道

都係嘅，佢個妹先二年級，但我地都已經係中五，年紀都相差咗成9年10年⋯

我同佢行到去附近嘅商場，企喺一間音樂中心嘅門前等放學

貼咗磨砂面嘅玻璃門從內拉開，一個小妹妹從門縫中行出嚟，手上拎住本琴書，孭住個背囊



「哥哥！」佢見到岑諾新企喺外面時，心裏嘅興奮都壓抑唔住，飛快地跑到岑諾新嘅面前，「媽媽呢？」

「媽媽有嘢做，叫我嚟接你。」岑諾新幫佢將琴書放入背囊

「嗨～」我見佢望住我，我便同佢打個招呼

「嗨⋯」佢一臉害羞地同我揮揮手，然後望答岑諾新，「哥哥，我地係唔係番屋企？」

「唔係，今晚喺出面食埋飯先番屋企。」岑諾新直接地講道

「哦⋯」嵐嵐點點頭，「今晚食咩呀？」

「食咖哩飯，之前你話中意食嗰間。」岑諾新將嵐嵐嘅背囊除咗落嚟拎喺手上

「好呀！」嵐嵐興奮地點點頭，「哥哥，我想去廁所⋯」



「去。」岑諾新點一點頭

「哥哥陪我去⋯」嵐嵐一臉純真地望住岑諾新

「哥哥入唔到女廁，你叫姐姐陪你去。」岑諾新指一指我

嵐嵐望一望我，然後點點頭就轉身走，我跟喺佢嘅身後行入女廁

「我喺廁格門口等你。」我對嵐嵐講道，然後企喺廁格門前

呢度商場嘅廁所都幾乾淨，至少喺地上都冇一灘灘水或者好多紙巾

等咗一陣之後廁格門打開，嵐嵐行出嚟，我將佢抱起洗手，因為佢嘅手都掂唔到水龍頭嘅感應器



「嗱。」我抽咗兩張紙巾比佢抹手

「姐姐你，係哥哥嘅女朋友？」佢忽然間望住我開口問道

宜家啲小朋友咁早熟嘅⋯？年紀輕輕就知咩係男朋友女朋友，時代果然唔同啦已經

「嗯、嗯！」我猶疑咗一下之後回答

「你同哥哥係同學？」佢追問道

「嗯，係呀。」我點點頭

「姐姐你真係中意我哥哥？」佢又問道，宜家啲小朋友到底係發生咗咩事




IG Link: https://www.instagram.com/nd_cotttoncandy/?hl=zh-tw