［愛情純愛］既然忘記唔到佢，不如試下中意我⋯？: 19. 他的爽快

反正，對佢嚟講，我都只不過係一個過客；孫慧伶呢個人，仍然喺我心中，仍然可以令我為佢感到難過，但對佢嚟講，我只不過係一個過去式，已經，係一個唔重要嘅人⋯

我將每一張相都撕碎，然後掉到垃圾桶中

「過去嘅始終都會過去。」我喺心中默默地講道

我都唔知點解我要咁講，好似只係安慰緊自己一樣

我望住比我掉到垃圾桶中嘅相片碎，心裏有啲不捨，但我知道該放低嘅都要放低



該放低嘅都要放低⋯

X⋯X⋯X

「你真係掉晒呀？」我望住岑諾新，一臉驚訝地講道，「你咁狠嘅？」

我同佢咁啱喺學校外面撞到，順帶一提，我同岑諾新平日都唔會一齊番學，你見到我地一齊番學，基本上一定係因為我地咁啱撞到，我都並冇約實幾點車站等之類

「你唔係都掉晒啦咩？」岑諾新望住我平淡地講道



我冇諗到佢一下子掉晒全部嘅相，我啱啱聽到佢同我講嘅時候，我真係呆咗

「我係～」我點一點頭，「你冇猶疑？撕碎嘅時候。」

「冇咩點猶疑，反正都係要掉㗎啦。」岑諾新輕鬆地聳肩，「都冇留低嘅必要。」

「你咁爽快嘅？」我對佢嘅爽快更加意外，佢好似好輕鬆咁就做咗一件事一樣，「我嗰次都猶疑咗一陣先下定決心要掉⋯」

「遲早都要掉㗎啦，反正，都掉咗啦，都番唔到轉頭⋯」岑諾新講道



番唔到轉頭，佢話中有話⋯番唔到轉頭嘅又點止係嗰一疊相⋯？

望住佢嘅眼神，我好似都明白嗰種無能為力嘅感覺⋯

經過A班嘅課室，我不自覺地抬頭望入去，下意識想喺課室中尋找張景彥嘅身影

佢坐喺自己嘅座位上，專心地「做緊」功課，佢呢副認真嘅模樣，我諗起當初我中意佢嘅原因，中意佢嘅細心，中意佢嘅專心時認真嘅模樣

「不過都已經唔屬於我⋯」我默默地收回視線同時喺心裏講道

就算我嘅目光再停留喺佢身上幾多次都好，佢都唔會望向我；就算我再中意佢都好，我同佢都已經冇機會

佢嘅笑容、佢嘅細心，已經唔會再係屬於我嘅存在，又或者，根本冇屬於過我⋯

喺佢心入面嘅人，係孫慧伶，佢中意嘅人係孫慧伶，佢同到孫慧伶一齊又點會回頭？



我對佢嚟講，又算得係啲咩⋯？

個天好似考驗緊我一樣，想睇下我可以捱到幾耐一樣

我同岑諾新一齊踏入課室，各自行番埋位，我行到locker前，打開locker嘅門，蹲喺locker前拎出今日要用嘅書

腦海中浮現出佢剛才認真嘅模樣，我不禁喺心中嘆咗一口氣

有啲嘢，其實我唔想再諗起⋯

「再諗起都冇意思啦⋯」我喺心中對自己講道，「冇意義⋯」

我將file同疊書抱喺懷中然後企起身，我先啱啱行第一步，夾喺file中嘅筆記紙跌晒出嚟



我尷尬地蹲低將筆記紙一份一份咁執起，疊番整齊後放番入去file入面後頓時行番埋位坐低

先啱啱坐低，詠妍就推開課室門番到嚟

「咁早嘅你今日？」我起身行到去詠妍嘅座位，詠妍將書包掛喺書枱邊

「今日早咗出門口，一出門口就有車，所以咁快就番到嚟⋯」詠妍伏喺枱上，「我仲喺車度恰咗一恰⋯」

「哦～」我點點頭，「你唔洗開locker咩？」

「要呀，不過我宜家想去廁所多啲⋯」詠妍緩緩企起身，拉住我行，「陪我去⋯」

我同詠妍一齊行出課室，詠妍嘅頭髮又長又柔軟，摸起嚟好舒服

「嗰日同佢約會，點呀？」詠妍忽然間喺去廁所嘅路上問我



「吓？冇咩點呀～」我聳肩，「不過啲蛋糕幾好食～你想試嘅話下次同你一齊去呀～」

「好呀～」詠妍點點頭，「不過，我講緊嘅唔係啲蛋糕，係講緊你地。一齊咗一段時間，有冇咩feel呀？」

「吓⋯？冇咩呀。」我認真地回答，詠妍每隔一段時間就會同我講一次，「冇特別覺得點。」

「好心你放低佢啦，宜家呢個咪幾好～」詠妍輕皺一下眉頭

「但我地都唔係嗰種感覺，我地各自都有放唔低嘅人⋯」我苦笑道，「都對唔上feel～」

「咁你唔試過點知啫～」詠妍苦口婆心地勸我，「你地都一齊咗啦～係個好機會呀！」

「但我地真係唔係嗰個feel呢～」我無奈地笑道



其實我都明白詠妍嘅心諗咩嘅～邊有人會想見到自己嘅好朋友成日都唔開心㗎～仲要因為同一個人，你唔悶，你個朋友都悶啦

不過可惜，我對岑諾新真係唔係嗰種feel，最大嘅原因當然係因為我心入面仲有張景彥，同時我亦知道喺岑諾新心中嘅嗰個人係孫慧伶




IG Link: https://www.instagram.com/nd_cotttoncandy/?hl=zh-tw