［愛情純愛］既然忘記唔到佢，不如試下中意我⋯？: 20. 幫忙

「你地咁樣一齊真係好咩⋯？你當佢係水泡咋喎⋯」詠妍輕皺起眉頭，疑惑地望住我

「我當佢係水泡，佢都當我係水泡呀～」我輕輕一笑，聳聳肩，「你情我願，我地都只不過係互相幫助互相鼓勵啫～」

我企喺洗手盆前等詠妍出嚟，我默默地沉思着詠妍啱啱同我講嘅嘢

「我同佢又真係唔啱feel嘛⋯」我喺心中默默地講道，「又唔係我或者單方面當對方係水泡，我地兩個都係咁諗。不過我地好似更加似戰友啫～」

諗到呢度我不禁失笑，革命戰友，好好嘅關係



不過講真，我對岑諾新從未有過非分之想，真係，當你嘅心入面已經有一個人嘅時候，你根本就唔會去諗同其他人嘅可能性

你有冇試過，真心咁⋯中意一個人？

好中意佢好中意佢，中意到⋯就算佢講分手，你都可以接受；就算佢話你知喺佢心入面最中意嘅人唔係你都好，你傷心，但見佢幸福你都會開心

咁樣去中意一個人，係情到深處定係愛得卑微⋯？

我都唔知道問題嘅答案，我只知道張景彥係嗰個可以觸動我心嘅人



望住佢幸福咁笑，我替佢高興；望住佢身邊嘅人係孫慧伶而唔係自己，我羨慕同時妒忌着

我都想成為嗰一個喺佢身邊、喺佢心底，被佢愛着嘅人，但似乎，我唔係一個咁嘅人

⋯

「倩盈你要拎嘢落去呀？」希童望住我問道

今日我地喺學校食飯，但因為我英文科長，要幫阿sir拎簿落去教員室，所以我就冇得食飯住啦～不過應該都好快啫～



「嗯，你地食住先啦！」我講完之後朝簿櫃行去

我拎起放喺簿櫃內重重嘅兩疊file，兩疊都唔輕，我嗰班有30人，兩疊file加埋都有60本，拎起嚟都幾重，我將張點名紙放喺簿面夾喺橡筋圈內然後就行

我想快啲番嚟食飯！

我小心翼翼地行落樓梯，落去位於一樓嘅教員室，今日風有啲大，我望住嗰張點名紙，我怕佢吹走

「呀⋯！」我話口未完，張點名紙就吹走咗

我仲喺樓梯上面呀，你叫我宜家點？你仲要吹番上去，係唔係挽我啫宜家？

「唉⋯」我默默地嘆咗一口氣之後，行上四級到平台位，小心翼翼地攬住疊file蹲下伸手去執

但疊file頂住我，我盡力地彎下腰伸直手去執



我嘅指尖掂到張點名紙啦！我用食指同中指去夾張紙番嚟

「差小小⋯」我喺心中為自己加油

正當我以為我要夾到張紙嘅時候，張紙又比飛吹前咗少少

呀⋯點呀！你吹去邊呀！

「嘖⋯」我有啲躁咁嘖咗一聲，然後蹲着向前行咗兩小步，又伸手去執

點名紙你唔好再吹⋯嘖！點呀！

今日啲風咩事呀！想點呀！要將張點名紙吹到去邊呀！今次吹到上咗兩級樓梯係想點？



「嘖⋯！」我壓抑住心底嘅煩躁，又蹲着行咗兩步，打算行到去樓梯邊伸手拎

我差兩步就要行到樓梯邊嘅時候，一隻手將我張點名紙執起，我抬起頭，沿住佢嘅手往上望

張、張景彥⋯？

「嗱。」佢將張點名紙遞番比我，「係唔係你㗎？」

「唔該。」我禮貌地講一聲唔該，然後將點名紙夾番喺橡筋圈中

我隨即轉身走，唔想多留喺呢個位置一秒，唔想面對佢多一秒⋯

「啱啱佢嘅表情⋯」我回想起剛才我抬起頭望到佢臉上掛着嘅表情

佢啱啱，微笑望住我⋯



「唔好諗唔好諗⋯！」我頓時喺心裏對自己講道，「你宜家諗嚟有意思咩？」

我行咗兩步，正準備落樓梯嘅時候，點名紙又從橡筋圈跌咗出嚟，冇計啦，我冇將佢釘實喺橡筋上面

「唉⋯」我嘆咗一口氣，又想蹲低將張紙再一次執起

今日真係，連張紙都要同我作對係唔係！

「倩盈你將張紙拎住嘛！」阿彥彎下腰，又一次幫我將張該死嘅點名紙執起，然後遞到我面前

「嗯，唔該⋯」我移開視線同時接過張紙

啱啱佢叫咗我個名，我感覺到當下我嘅心藏緊縮咗一下



「冷靜冷靜⋯！」我喺心中對自己講道，「蔣倩盈你冷靜啲⋯！」

我轉身又行，今次我將張紙捉得實一實，睇下佢今次可以飛去邊！

我將疊file塞落阿sir嘅簿櫃中，然後連忙跑番上樓番課室

「呼⋯」我番到課室門口嘅時候先鬆咗一口氣，「有冇咁好彩⋯？」

「你喘晒氣嘅？」希童望住行到番埋位嘅我，「你跑番上嚟呀？」




IG Link: https://www.instagram.com/nd_cotttoncandy/?hl=zh-tw