聽完楊朗然咁講之後再望向岑諾新,就覺得佢成個人都散發住「生人勿近」嘅怒氣⋯

「你去氹番佢啦~」楊朗然笑笑口對我講道,「錫佢一啖嘅話佢就唔會咁嬲。」

我聽完之後不禁失笑,佢一時失手考差咗,係我錫佢一啖就可以補償番嚟㗎咩?

唔⋯我應該就唔得,係孫慧伶嘅話或者都可以

「行得未呀?」我問行到番嚟嘅岑諾新



「嗯,行啦。」岑諾新點點頭

「拜拜~」楊朗然對我地講道

「嗯,拜。」岑諾新淡淡地點頭,手敷衍地揮一下

「拜拜~」我對住楊朗然無奈地笑一笑

我同岑諾新一齊踏出課室,岑諾新嬲緊嘅時候,佢嘅目無表情顯得有啲可怕⋯



「我應唔應該同佢講嘢⋯?」我苦笑起嚟喺心裏道,「總覺得一開口,就要比佢冷言冷語對待⋯佢今日仲要嬲緊,咁咪好似冰箭咁⋯」

我應該要同佢講啲咩呢⋯?

呢個時候張景彥朝我地迎面行嚟,我下意識就朝張景彥嘅方向望去,張景彥望住前方直行,冇留意到我望住佢

「唔好望啦⋯!」我喺心中對自己講道,然後將視線而開,將目光落喺岑諾新身上

張景彥行到去我身旁要同我擦肩而過嘅時候,張景彥微微側身躲開



我嘅心與此同時揪咗一下,有啲痛⋯

蔣倩盈呀蔣倩盈,你醒下啦好唔好?佢唔係你男朋友張景彥啦!宜家嘅佢,只係孫慧伶嘅男朋友⋯!

「唔好回頭⋯!」我喺心中叮囑自己,再心痛都唔可以回頭

我感覺到自己正咬着牙關,努力地將一切「不必要」嘅事都掉低,但原來好難

就係佢微微側身,同我擦肩而過嘅一刻,我嘅腦海中忽然間浮現出嗰啲我想拋低嘅過往

「阿彥你,真係中意我?」「嗯,當然!」

「倩盈呀~你對自己好啲啦,成日都遷就其他人,其他人會得寸進尺。」「唔緊要呀~我好好呀~」

「點解突然間要分手⋯?我、我唔明呀⋯!」「對唔住⋯一直以嚟我最中意嘅人係邊個,你知㗎⋯就比我任性一次亦係最後一次啦⋯!」



「倩盈,對唔住⋯」「嗯⋯唔緊要⋯你要幸福⋯」

呢啲片段突然間一下子湧上嚟,我嘅心好難受,但我好想放低佢⋯!

我好想放低嗰個唔係真心中意我嘅人⋯!

「阿彥⋯!」我喺心中大叫咗一聲,忍唔住回頭望

佢早就唔喺度⋯都係嘅⋯我到底期望緊啲咩⋯?

就算我擰轉頭見到佢又可以點⋯?我可以做啲咩⋯?

明明我⋯好想放低佢,但我好難受!



嗰啲回憶一下子湧出嚟,我果然做唔到

我個心仲係好中意佢,我忘記唔到佢,我做唔到!

今日我同岑諾新坐喺巴士嘅下層,岑諾新一直耷低頭冇出聲,我望住車窗外好似走馬燈一樣閃過嘅街道,腦海中亦亮起有關張景彥嘅走馬燈⋯

「張景彥你會唔會同我分手?」「唔會,好難搵到一個比你好嘅人。」

「你中意我啲咩?」「中意你⋯中意你笑得好睇,中意你善解人意,中意你好識體諒我囉~」

「你唔洗同我講對唔住⋯我早就知道你中意佢⋯」

「你中意孫慧伶嘛~我知道⋯早就知道⋯」「倩盈,對唔住,你嬲我又好怪我都好,你唔好答我唔緊要⋯」

「你幸福就得啦,我明⋯唔洗同我解釋⋯」「對唔住⋯」



沿路行番屋企,我腦海中都係得張景彥,我咩都冇諗到,淨係諗到佢⋯

「聽日見。」岑諾新停咗落嚟

我回神抬頭一望,原來已經番到嚟屋企樓下

「嗯,聽日見⋯」我微微點頭,然後打開雙手,「攬一下得唔得⋯」

「嗯。」岑諾新行近我一步將我攬到佢嘅懷中

我將頭埋喺佢嘅頸窩,心裏彷彿覺得自己嘅依靠終於喺度,眼眶都冇得到我嘅批准就自然而然地濕潤起嚟

「我番去啦。」岑諾新想鬆開手



唔得⋯!我唔想比人見到我喊⋯!

「等陣⋯!」我自己都感覺到自己把聲正輕微地顫抖,「等陣⋯岑諾新⋯」

我嘅手將岑諾新嘅腰抱緊唔比佢行後半步,我唔想比人見到我喊⋯絕對唔想⋯!

「你做咩⋯?」岑諾新嘅聲線中帶點愕然

呢三個字一從岑諾新嘅口中講出嚟,我嘅眼淚瞬間止唔住

「我做唔到⋯!我放唔低呀都係⋯!點算呀?岑諾新,點算呀⋯?」我哽咽着道,手用力地捉住岑諾新嘅裇衫,「我果然都係唔得⋯!我都係做唔到⋯」




IG Link: https://www.instagram.com/nd_cotttoncandy/?hl=zh-tw