我果然都係做唔到,我忘記唔到佢,佢一個眼神、一個笑容,什至一個側身都可以強烈地牽動着我

我知道,過咗去就係過咗去,放低一個唔愛自己嘅人之類嘅道理我都知

但係要實踐起嚟嘅時候,真係好難

要壓抑自己嘅情緒,真係好辛苦

雨水積聚喺烏雲裏,我嘅難受積聚喺心裏,我又可嘗唔想我好似一舊白雲一樣無憂?



「噓⋯」岑諾新嘅手搭喺我嘅後腦勺上

「我做唔到好似你一樣自然,我做唔到⋯!」我搖搖頭,「但我地都講好咗要放低,但我真係做唔到!」

「你今日放唔低,咁點解當初你要答佢『唔緊要』?點解唔喺佢面前大喊一場?」岑諾新問我同時輕輕將我推開

「佢都唔中意我,我做咩要留佢喎⋯!」我用手抹着不斷湧出嘅眼淚,「做咩要留住一個唔中意自己嘅人啫?佢個心都唔係喺我度⋯!」

「咁咪係,原來你仍然知道佢唔中意你㗎?」岑諾新平靜地問道,「你答佢唔緊要,佢梗係覺得你唔緊要。」



「我唔知呀⋯!」我搖搖頭,「我真係做唔到⋯!我真係好中意佢⋯!我真係、真係做唔到好似你咁樣,就算見到佢迎面行嚟都當冇事⋯!」

「你覺得我好自然咩?你覺得放低一個人真係咁容易咩?」岑諾新輕輕一笑,認真地問我,佢臉上掛着嘅神情一啲都唔自然,「我地當初一齊,都只係因為我地同病相憐,咁你覺得我又可以有幾自然?」

本來心情唔好嘅岑諾新比我再咁樣煩佢,佢開始有啲躁,面都黑得更厲害

「我真係,好中意張景彥⋯!」我感覺到岑諾新嘅煩躁,忍唔住喊得更厲害,「我真係好中意佢⋯!」

「你覺得我唔中意孫慧伶咩?」岑諾新皺起眉頭,「你好中意張景彥係唔係?我都好中意孫慧伶,但我可以點?我地可以點?」



岑諾新嘅語氣格外認真,但喺認真嘅語氣當中夾雜着不捨、不忿、煩躁⋯

我從來都⋯冇見過咁樣嘅佢

「你既然咁中意佢,你唔去同佢講?」岑諾新壓抑着自己嘅煩躁問我

「我同佢都冇關係啦已經!佢已經唔係我男朋友啦都⋯!我同佢講做咩啫?」我抽抽鼻子,抹着眼淚講道

「你都識講啦,佢唔係你㗎啦。」岑諾新講道,「該放低嘅都係要放低,你都唔努力試,我地同一間學校一定會見到㗎啦!你試咗一下就想放棄,放低一個人係咁㗎啦!」

岑諾新咁樣一講,我完全冇反駁佢嘅餘地

我真係有努力,我都唔想半途而廢⋯

「唔好半途而廢呀!」



嗰一日,我係咁樣同岑諾新講,我同佢講話勾咗手指尾,即係承諾咗⋯

「叫我唔好半途而廢嘅人,唔係你咩?」岑諾新就係呢個時候問我,講出我地勾手指尾嗰日,我對佢講嘅嘢,「但宜家先過咗幾日你就想放棄,你當放低一個人係幾簡單嘅事?」

岑諾新遞咗包紙巾比我,我抽咗一張

「你唔好再喊,陣間其他人以為我整喊你。」岑諾新望住我用紙巾抹眼淚,淡淡地講道

我不禁失笑,一邊喊一邊笑,真係笑喊啦今次

「點呀?你係唔係放棄?」岑諾新問道

我一邊抹眼淚一邊搖搖頭,抽抽鼻子



「唔啦⋯」我講道,「唔放棄啦⋯我同你講好咗㗎嘛⋯!」

「知就好。」岑諾新無奈地望咗我一眼

我望住岑諾新,岑諾新望一望我,無言地搖搖頭

「點呀,我番得去未?」岑諾新問我

「番得去。」我笑一笑,然後將包紙巾遞番比佢,「我唔會半途而廢㗎啦⋯!」

「最好真係,勾咗手指尾。」岑諾新露出淡淡嘅笑容,「你真係唔好半途而廢,講好咗。」

「知啦~」我笑一笑,「拜拜~」

我番到屋企,孭住書包行入房,將個書包放低喺書枱旁邊,喺換衫之前我拉開張櫈,疲倦地坐低喺書枱前



「呼⋯」我深呼吸,仰起頭望住天花板,「好攰⋯我真係做到咩⋯?」

岑諾新嘅提點就好似一言驚醒夢中人

「佢唔係你㗎啦。」

其實岑諾新講得啱,張景彥都已經唔係我男朋友,佢宜家係孫慧伶嘅男朋友

「你好中意張景彥係唔係?我都好中意孫慧伶,但我可以點?我地可以點?」

啱啱岑諾新嘅表情同語氣我都係第一次,三個月嚟,我從來都冇見過佢好似今日咁⋯咁大反應⋯






IG Link: https://www.instagram.com/nd_cotttoncandy/?hl=zh-tw