孫慧伶佢⋯直接錫咗張景彥一啖,明知我地喺後面⋯!

我唔知孫慧伶係有心定無意,但我肯定岑諾新宜家一定難受到極致,我望向佢,見到佢下意識想迴避

「陪我去一轉文具店呀~」我拉咗岑諾新一下,然後拉住佢回頭走

當然,我唔係淨係為咗佢,而係我都想迴避一下

「哦。」岑諾近回答我嘅時候,已經比我拉住走



我拉住岑諾新行遠咗就停低,至少喺呢度見唔到佢地先

「做咩喺呢度停?唔係去文具店咩?」岑諾新見我停咗落嚟企喺度便問道

「夠啦⋯!」我鬆開佢嘅手,打咗佢嘅背一下,「難受咪講,我又唔會嫌你煩⋯」

岑諾新望住我嘅表情愕一愕然,然後輕輕一笑,但佢始終冇開口講任何嘢

「我都喺度啦,你有一個人忍住嘅必要咩?」我問道



有時覺得佢真係好勁,定男仔都係咁樣善於將自己嘅感情收起?佢明明就好在意啱啱孫慧伶嘅舉動,但佢宜家卻忍耐緊

「嗯⋯」岑諾新輕輕嗯一聲回答,然後伸手攬住我

今日嘅擁抱同平日嘅擁抱有啲唔同⋯我感覺到佢一直收窄緊雙臂嘅範圍,將我緊緊地攬實喺懷中,生怕我會走咗去一樣

我唔太識講嘢安慰人,所以我由佢攬住,忍耐咗都會爆,我察覺到佢啱啱嘅不安,所以先要逃離現場

「你唔洗一個人承受⋯」我緩緩開口講道,「我同你一齊分擔⋯」



岑諾新將我攬得更緊,佢一定收起咗好多情緒,一個人默默地承受咗好多⋯佢嘅堅強,真係單純地因為堅強嗎?

到底我地⋯係因為啲咩事而覺得心痛難耐⋯?

「到時真係有感覺嘅咪繼續囉~冇感覺嘅話咪按番你地本來嘅打算囉~」

我又諗起今日詠妍同我講嘅嘢,最衰就係詠妍,同我講埋啲咁嘅嘢,搞到我宜家一見到張景彥同岑諾新就會諗起

「我Okay啦,冇事。」岑諾新鬆開手對我講道,「可以番去。」

望住佢嘅從容,我卻覺得佢唔係完全冇事⋯不過我咁講,好似講緊廢話一樣⋯但我冇再追問落去,既然岑諾新唔想再講落去



我坐喺梳化上,雖然電視開住,但我完全冇睇嘅打算,只係單純地將電視開住,想喺只有我一人嘅屋企中有啲聲,唔會覺得格外孤獨



「同岑諾新一齊嘅話,真係會放低得比較快⋯?」我嘅手放喺梳化扶手上托住頭,「咁樣真係比較好咩⋯?」

「咔嚓—」

我聽到屋企門打開嘅聲音,我坐起身行到門前,見到我媽抽住一袋二袋番嚟

「你又買咁多嘢呀?」我閂上門,望住我媽行去廚房,將啲嘢放低喺手洗盤旁邊

「買定嘛,屋企啲公仔麵同零食都就嚟食完啦嘛,買定啲番嚟。」我媽打開櫥櫃,將啲公仔麵放到櫥櫃上

「哦。」我朝廚房望咗一眼,然後就行番去梳化坐低

我坐喺梳化上睇手機,我托住頭拎起手機打算解鎖嘅時候,螢幕彈出一條訊息通知



岑諾新:果然,心情都係有啲唔好

「真少有⋯」我望住岑諾新send嘅message不禁一笑,默默地起身番房

岑諾新:唔係真係好差,只係想搵人講下

「我就係不二之選」

岑諾新:要等時間去沖淡嘅話要等幾耐⋯感覺上要等好耐,但又冇其他方法

岑諾新:佢係唔係特登,我同你咁大個人喺後面,佢真係會睇唔到咩

岑諾新:好煩,得佢一個放低咗,但我都係未可以做到零反應

「一連三個message呀⋯」我望住岑諾新連續send過嚟嘅message,平時佢好少一次過send咁多嘢過嚟



睇嚟佢嘅心情真係唔好得去邊呢~

要等時間沖淡嘅話要等幾耐⋯呢個問題我點知,順其自然,講得輕鬆,但係實際上點樣順其自然?

見到自然會唔開心,見到自然會在意,順其自然,同順住自己嘅心而行完全冇分別

「慢慢就可以忘記到啦」

岑諾新:咁樣嘅話,我怕我地去到畢業都仲要繼續一齊

「呃⋯應該唔會⋯」

「咩啫宜家,同我一齊好委屈你咩???」



岑諾新:怕委屈你?

「點解係疑問句」

所以我話,詠妍講嘅方法係唔會行得通;岑諾新對孫慧伶嘅中意,大概會令佢冇辦法中意其他人掛

詠妍將我地都諗得太簡單⋯我又好,岑諾新都好




IG Link: https://www.instagram.com/nd_cotttoncandy/?hl=zh-tw