［愛情純愛］既然忘記唔到佢，不如試下中意我⋯？: 33. 考慮好了？

我地都對於「嗰個人」太執着，明明我地都想放手、想忘記，但我地卻喺不為意之間更加用力地捉住嗰段記憶

岑諾新：我都開始唔知可以點做⋯

岑諾新：有啲麻煩，心情有啲唔好

「同我講就係啦，我地係同路人，我會明白你嘅感受」

「物以類聚」



岑諾新：呢個物以類聚好似唔太好，我同你加埋只會成為失敗者俱樂部

「好執着，我同你都⋯」

岑諾新：或者真係應該順其自然

⋯

「點呀點呀？你考慮成點呀？」詠妍喺一放小息嘅時候，第一時間跑到我個位問我



「咩考慮成點？」我疑惑地問道

「岑諾新呀！」詠妍一臉訝異地講道，然後又望一望向坐喺位嘅岑諾新

你唔想岑諾新聽到嘅話，你做咩要咁驚訝仲要有啲大聲咁講⋯

「你呀，係唔係將我地都諗得太簡單⋯？」我托住頭，一臉無所謂地問道，「佢好中意孫慧伶，我好中意張景彥，就係咁。」

「你地唔係都係想放低㗎咩？」詠妍坐低喺我前面嘅坐位，細聲地問我



「嗯，係呀。」我回答道

「咁唔係應該試下咩？」詠妍努力地說服我，「你地真係中意咗對方，都唔係一件壞事呀～」

「唉，真係唔可能呢～」我無奈地拎出手機，將我琴日同岑諾新嘅對話開出嚟，然後將手機遞到佢嘅面前，「你睇下就明。」

詠妍拎起我嘅手機，一臉認真地睇，然後一臉不忿地抬頭望住我

「所以放棄你呢個念頭同想法啦⋯」我托住下巴，將手機拎回嘅同時將手機螢幕鎖上

「但佢咁講都唔算係拒絕你又或者反感呀⋯」詠妍仍然死心不惜地對我講道

「如果佢係對我反感嘅話，咁我就唔會係佢『女朋友』啦係唔係呀⋯？」我真係無奈到頭上都要有黑線

「但你都可以問下佢㗎嘛～」詠妍講道，「我唔係講笑㗎！我認真建議你㗎！」



詠妍微微鼓起兩泡腮，有啲嬲咁打咗我嘅手背一下

「我唔想你一直都放唔低佢，佢咁對你，你就放低佢啦！」詠妍講嘅嘢嘅時候我都感覺到有火出嚟，但下一個瞬間，我卻見到詠妍扁着嘴，「你同佢一齊，唔係就係想放低張景彥咩？如果係咁嘅話，就算你真係中意佢都冇問題呀！」

「唉⋯」望住詠妍心疼我嘅模樣，我不禁嘆咗一口氣，「我唔否認你呢個係個好建議，只係⋯」

我望向坐喺位溫緊默書嘅岑諾新，高大靚仔、專一⋯都算嘅、忍耐力強、有啲溫柔⋯或者佢真係比張景彥好，只係⋯但佢嘅好，唔足矣令我中意佢呀⋯

「機會都放到喺你面前啦，你就真係唔認真考慮下⋯？」詠妍細細聲地再次問道，「真係要認真考慮清楚！」

「嗯⋯考慮下⋯」我無可奈何地點點頭

反正如果我唔咁答嘅話，詠妍一定每日同我講十次，洗我腦一樣



⋯

「你今日做咩一直都唔出聲？」岑諾新忽然間開口問我

「嗯？」我望向岑諾新，佢有啲疑惑咁望住我

「你今日唔講嘢嘅？今日完全冇見到佢地。」岑諾新講道，「平時你一定會講啲咩，今日咩都唔講，好奇怪。」

「呃⋯我只係諗緊嘢啫⋯」我尷尬地笑道，連我自己都覺得自己嘅笑容一定好唔自然

「諗緊啲咩？」岑諾新罕見地追問道

「冇咩，小事嚟。」我微微一笑，只係答佢係小事一樁就算

我推開家門，企喺玄關將皮鞋除落嚟之後直接行番入房，書包隨手放低喺衣櫃旁邊嘅小櫈上



我將長袖冷衫除落嚟，拉開背心裙嘅拉鍊除下校裙，捉住校呔左右搖兩下同時向下扯，解開裇衫嘅衫鈕，將雪白嘅裇衫除落嚟，最後將長襪除落嚟後換上居家服

「呼⋯」我坐低喺床上，然後將髮圈除落嚟，長髮一下子散開

距離上次答應詠妍認真考慮已經過咗四日，呢幾日我真係有認真考慮詠妍比我嘅建議

呢幾日佢每日都同我講一次「岑諾新好過張景彥」，我都只係敷衍點頭就算，但我答應咗佢要認真咁考慮，所以我唔可以反口

我認真考慮並唔係因為詠妍嘅建議，唔⋯佢嘅建議都係原因之一，不過我都係為自己考慮

我唔知我要用幾耐先可以放低張景彥，我真係唔知道，但我的確想快啲放低張景彥⋯我唔想再因為佢嘅一舉一動而令自己悶悶不樂

岑諾新的確係一個唔錯嘅選擇，都講過好多次，我地互相明白對方嘅想法



佢嘅性格亦唔係真係好差，雖然有啲冷淡，但其實有時都會出其不意地溫柔




IG Link: https://www.instagram.com/nd_cotttoncandy/?hl=zh-tw